Thailand & Malaysia om Nasem, Nek zongte masuan

Aki gelhni: Saturday, 21 January 2012 16:13

Agelh: Hau Thang

Bangzahvei kisim: 69

:: Ih gam ah akicing nekzon ding hamsa in gamveng India, Thailand, Malaysia ah Nu le Pa, Zi le tate vak nang in Kawlmi genloh Zomi te zong alomlom phial in ki om hi. India gam sung nekzong Zomi te adingin Laibu, Permit cihte akisap loh hang in, Thai le Malaysia om te ading kisam ahihi.

Tu in Thailand ah Kawlgam pan pai -in nekzong nasem kitam mahmah a, Zomi tezong honpi khatmah Thai gamsung ah ki om hi. Maikha Febuary hunciang in Kawlgam phalna laibu neilo, phalna omlo kipialo a nekzongte, Tawmvei omtheihna laidal tawi/neilote Thai kumpi in mat kipan ding in Tawmvei nekzon theih phalpiakna zum pa'n thu zak sak na nei uh hi cihi. Thaikum pi-in agamsung a om gamdangmi nasem khem peuh zan ni January 20, 2012 ma in Thai kumpi phalna Permit bawl ding cih thu zaksakna aneih sa ahihi. Tua hi in pawlkhat in bawluh a, pawlkhat abawl lo zong om uh hi.

Malaysia zong abeisa hun in Permit tawh nakisem masa hi in Pautheilo, nasepzia tello, Agent ten hon khat ne, Malay kumpi lam pan in naseptheih phalna, Pass Fee Rm60, Levy kumkhat ai Rm1200, Visa Rm19.50, Process Rm50, akigawm in Rm 1329.50 bang Kumpilam ten hong la hi in, tuaban ah Agent te'n bangzah hiam? khat nasepna Company Boss te tung ah na lasak theilai hi. Nasep kipan cil in Rm 20, pan 35 bang bek hi a, Inn lam khak noptawh nek dingtawh phone sum tawh kicing zolo in hamsat mahmah teh Laibu nu sia in apua lam ah kitai khia ahihi.

Apua lam ah sep ciang in omom na hong zong in hong manman mai uh ahihi. Atawp na lam teh bei zo tuan lo a, amauzong gim zong tawl uh hi. Tua teh athu hong khel in O (bem) tawh aom te permit pia kik in 6p hong vai hawm kik ciang in atai teng in bawl kik leuleu uhhi. Haksa ta leh kithuak tentan ahih man mithak te sang in, pautheizaw, nasep kisiam theizaw, adeih hun in kizawh sak zaw, Khasum zong kicingzaw ahih manh nasep neite'n hong zang zaw ahihi. Malay kumpi in zong alunggulh nasem te tung pan sum ngah theikik a, 6P bawl nuamte zong Jan/10 anunung pen bawl ding cih thu zasak na aom hang in tu in abawl nuam aom lai leh kha 4 ciang bang kisang lai ding hi cih thunei lamte sung pan khat in imkhia hi