Zota Lungdeih

Zaideih awisiam lengthe hileng
Singdang hoihna awiawi kei ning
Tuunnu Zogam lobang tul zong
Tuunnu lungzuan phawn na'n awi ning.

Siamsin lungcim vabang pil leng
Singta lei ah tham mangh kei ning
Tuunsung khat piang Zo vontawi teng
Giabang zuunin thaangbang veh ning.

Simlei ah Nopna Om Ding

Sinlung sung mah zon ding pha bel
Singlung a mang dikna dikna;
Sinlungtang sung dikna dim leh
Gamtat luheek et in lawm ding.

A mi zata' ciin a pha bel
Gamtat luheek et in lawmna;
Gamtat luheek et hong lawm leh
Innkuan bangkua kithuhual ding.

Nisim Nunzia

Phalvak buh-al hong khuang ngeungeu
An su kikkikh tui tawi keihkeih;
An hawp lualua bawm pua kheukheu*
Vailo zuan in pai suk leihleih.

Tungsunni in hong el vengvang
Tukawl tawi in lokho kehkeh;
Zu va bengin kutsan vengvang
Ankung khang leh nuam lua tehteh.