Singapore ah Kum 64 cinna Zomi Nam Ni kibawlding

Aki gelhni: Saturday, 21 January 2012 23:09

Agelh: Admin

Bangzahvei kisim: 33

Sanggam u le nau te,
Singapore ah Chin Christian Fellowship in panmun la in Singapore a' om Khamtungmi te in Singapore ah a masa peen Zomi Nam Ni (Kum 64 cina) bawl ding in hanciamna a om hi.

Nidang in a kibawl zel zel hang'in biakpiak kikhopna tawh a ki bawl hi aa tu tung in a thupi zaw in kibawl sawm a hi hi.

Eimi laphuah/lasak siam, Sangpi panpihna leh CCF makaite hanciamna khat tek hang in a kibawl zo ding suak hi.

Zogam thu theihsak na, ngeina lam leh puan lah na te, Zosuan lasa minthang te leh itna/meltheihna tawh hong kihel Kawlgam lasiam minthang te in lasak na te kihel ding aa hunzeekna te zong kawlgam pan aa amin thang Tin Moe Lwin leh Thet Mon Myint te in hong zeeksak ding uh hi. Eimi a hi lo lasa min thang Wai Su Khine Thein leh L Lunwa te zong hong ki hel ding hi

Zosuan lasa. kawlgambup in hong theih pih Sangpi, Thawnkham, Sung Tin Par leh Chaw Su Khin te in lasak na hong makaih ding hi.

Tua ciang in ei minam lak-a a minthang, ei lam pan in Esther Cingsan. Falam pan in Susan, Lai pan in Van Dawt Cin, Mara pan in Hlaing Mary leh Mizo pan in Lalnunsanga te in zong la hong sa ding uh hi.

A masa in Mizoram pan in hong pai ding geel na om na pi, man lo a hih man in Tahan pan in hong pai ding hi.

Tumging peen Desert Rose te hi ding aa Lead: Cung Aung. Bass: Cinpi. Drum: Seng Aung. Keyboard: Mung Mung te hi ding hi.

Main Sposor peen Myanmar Airways International (MAI) hi in Co-sponsor te peen poster tung aa kigel bang a hi hi.

Chin Christian Fellowship (Singapore) peen 1991 kum in Zomi Christian Fellowship ci in kiphuan khia hi aa khamtungmi te kimuhkhop theih nading leh biakpiakkhop theih na ding ngimna hi in Falam te Sia Fung Dun in hong makaih hi.

1995 kum in kipawlna ngeina bang in kipuah pha in Chin Christian Fellowship, Singapore (CCFS) ci in tu ni dong kum khat in nga vei ta kikhop khop na kinei den hi.

Kumsin in tukpeng tournament kinei den in Zomi Innkuan in a khatna (azah vei zong thei nawn keng,
3 veina maw 4 veina maw!) ngah den hi.

CCFS ah anuai aa kipawlna Fellowship (Kipawlna) 4 leh Eimi te makaihna Church (Pawlpi) 5 a' eimi teng kipawl khawm hi.
1. Zomi Innkuan, Singapore
2. Falam Chtistian Fellowship
3. Lai Christian Fellowship
4. Mizo Christian Fellowship
Hih kipawlna teng in eima pau ciat tawh biakpiak na nei hi.

Church min tawh hong kihel,
1. Mara Evangelical Church (Mara pau)
2. Elim Myanmar Christian Fellowship (Elim Church). Kawl pau. Pastor- Rev. Esther Cin Lam Ciin.
3. Church of Singapore (COS) Kawl pau. Pastor- Rev. Dr. Cho Manaling.
4. Full Gospel Assembly (FGA) Kawl pau. Pastor- Rev. Cin Kim Pau.
5. Hallelujah International Church (HIC) Kawl pau. Pastor- Sia Zam Suan Kim

Zomi te le Zogam, thuphangah mi le gam hong suak ta hen.

Thupuak,

Pau Khan Thawn
Thuvanpi (2011-12)