Leitung ah apapenpen "Ascend P1S" Smartphone

Aki gelhni: Tuesday, 10 January 2012 15:39

Agelh: ZomiDaily

Bangzahvei kisim: 69

Share

0 Comments

ZomiDaily :: Tulaitak leitung Technology khantohna huntawh kituak in Mobile Phone leh Laptop Brand tuamtuamte azaang theitheih, apa theithei (Light & Slim) ki demdem uhhi. Chinese Telecoms Company lianpikhat ahi Huawei te'nzong United States leh Europe gamte ah amau Product akizat nading gamkekna in "World's Slimmest Smartphone" akici apakhia mahmah Phone khat bawlkhia uh ci'n Monday ni-in tangko uhhi.

Tua Smartphone pen "Ascend P1S" kiciding a, 0.26 inches (6.68 mm) bek sahding cihi. Pencil khat ii asahna sanginzong panzawlai cihi. Tulaitak leitung ah aminthang khiamahmah Apple Company te iPhone 4S zongpen 0.37 inches (9.3 mm) asah hi a, tu Chinese Company Huawei te bawlkhiatding pen tuasang in pazawlai hi.

Huawei Device Chairman Richard Yu in hih Ascend P1S pen leitung ah Smartphone aomlakpan apapenpen ahih hangin Performance zong hakmahmah veve hi ci'n tangko khia hi. Las Vegas ah akibawl Consumer Electronics Show (CES) ah Richard Yu in hih Ascend P1S ii hoihna leh Performance te pulakkhia hi. Khutsung ah tangzangtak in kitawi liklekthei ahih manin zattangzang mahmah ci'n phatmahmah hi.

Ascend P1S pen Google te ii Android Software kizangding a, Europe gamsung ah tukum March kha ciangin ki leithei tading hi. Tuazawh khakhat khitciang in Europe gam banah United States leh adang gamtuamtuam ah ki hawmkhiading cih kiza hi.

Tualeh bangzah mansakding cih akidot ciangin tulaitak Telecom Carriers tetawh akikup laitak uh hi a, ki gencianthei nailo cihi. Ahi zongin US$400 pawl mantheiding in ki lamen hi. Ascend P1S ii Screen golna pen 4.3 inches (10.92 centimeter) pha a, anung leh amai pan Photo leh Video ki zaihtheiding cihi.

Chinese Company ahi Huawai Company pen Sengam ah aminthan mahmah hangin United States ah kuaman natheihpih khalo ahih manin, hih Ascend P1S Smartphone tawh amau leh amau aki pholaknuam uhzong ahihi. Tuabang ahihleh a Product uhzong American mite lungkimzawh nadingin Quality onghoih teisam lodia mate... ZomiDaily