Kawlgam Phone Simcard 5000 man vai thudik telsutna omding

Aki gelhni: Friday, 27 January 2012 23:30

Agelh: Hau Thang

Bangzahvei kisim: 223

:: Abeisa hun in Kawlgam ah Phone Simcard khat teh 5000 in zuak ding thu thangzo ngei hi. Tua nasep khiat ding in Swepyi Dakun Company in geel leh sep tuah ding sawm a, Kumpi tungah zong phalna piak ding laiphah zo ahih nathu Swepyidakun Company pan U Lwin Naing Oo in thu phuangkhia zokhin hi.

Tu in tua 5000 man Phone Simcard vai tawh kipawl in Anih vei na thudiktelsutna ding ahi Traders Hotel, Kungbawng Hall ah January 30, 2012 ni-nitaklam daak 1:00pm hun ah diktel telsutna nei ding cihthu Facebook pan kitheikhia hi. Hih 5000 man Phone Simcard project tawhkipawl in sep leh bawlzia ding lamhil diktel genna, tuni dongin Kumpi pan zaksak kikna omnailo hi ci-in Swepyidakun Company pan thuphuan phalna nei Pu Thang Cin Thawng in phuang khia hi.

Hih 5000 man Phone Simcard Project tawh kipawl in phalna ngah uh hi leh Simcard sungah sum omsa Ks. 5000, Ks. 10000, Ks. 50000 sum guansa/omsa hiding a, Simcard mantaktak pen Ks.300 bek man ding hi cih Swepyidakun in genkhiazo hi. Tuaban ah phalna kumpi in pia in, sep theihna a om leh Phone Towers 2800 kimbang phutkhiat ding in geel kholhna om zohi ci-in Swepyidakun Managing Director in phuang khia a, maikum 2013 ah ASEAN kimawl hun Kawlgam hongtun ciangin nuamtak in zattheihding lametna ahihi ci hi.

Adang Company pawl khat te'n zuak zoloding lam en uh hi. Ahi zong in Mipilam pan in Thai & Malaysia ah Simcard pen US$3 mankhawng in zuak zomahmah uhhi. Malaysia bangah Simcard sungah sum Rm8, Rm10 cihbang thunsa in om ahih man in Kawlgam ah zong hihbangdan zuakzo dinghi cih lam en uh hi.