7 vei tukphial zongin 8 veina ah kitho veve

Aki gelhni: Friday, 20 January 2012 11:09

Agelh: Hau Thang

Bangzahvei kisim: 185

:: 1990, Kawl gambup kiteelpi na ah' agual zo a, minthang belpawl Singtang gam minam Party lian 4 in Register bawl dingin gimna neita uh hi. Hih aminthang Singtang gam minam Party Register bawldingte in Zogam leh leitung dongah aminthang ZNC, Rakhai gamke ah aminthang ALD, Mon gamke ah aminthang MNDF leh 1990 kum kiteelpi in kawlgam buppi ah Mee tam pen nihna leh Shan gamkee ah a khatna angah SNLD te ahihi.

ALD Party te in Febuary kha kipat lampawlin Register bawl dinguh a, ahih hang in Kalhelh kitelna lutnailo in cidam, lokhohna, Pilna leh minam vai ah kisam asak phat diak teng sem in, Party gimna pa'n sunglam kihahsiang masak ding in Makai U Aye Ta Aung in gen na nei cihi. Tua mahbang in ZNC leh MNDF te zong Febuary kha sung ahih keileh Kalhelh kitel khit zawh ah Register bawl ding gimna nei zo cihi.

Tu in Kawlgam ah NLD in Kalhelh kiteelna lutding in phaalna hong ngah takteh amunmuan aphualphual ah Zum inn kihong nisim cihbangphial in omto ta hi. Mipi lungsim nasia tak in lawng aa, Kawlgam kikelzia ding Mivom, Mikaang, Thunei zaw diakte, amin thang thuphuang khia Media makai pituamtuam te, Sumbawl sumzuak lam ah nasem Company nei te in Kawlgam ah nasep dingbekbek lunglut in, Zawlleng tawlnga mahmah lo ahihi.

Hihbang kawmkal sung ah Ei zong ahun lem cici lo zaw in zekailo a, ihsep theihna bangbang ah, Minamvai in dinkul ta hi. Kawl lutol, talsan te nangawn Paukibang, minam kibang, biakna ngeina, lai kibang zang khawm zong minam vai in ding ziahziah uh hi.

Tu in Zogam ah Unau khat hihang cih zenzen den hang "K" ten hong nawkzenzen leh khat nguak nan zawh pak honghilo ding ahih man in, Zomi mintawh vaiding ZNC bang in Party register hong bawl theih zenzen leh Zogam sung ah Suakta tak in ngam tangthei ding a, ih deih vetvet loh cnf/a kibuphual nading Tedim ah zumphut ding vai zong mipi kilom khawm thukim natawh kinolh theiding lam et huai mahmah hi