A zi lutang Sekpi tawh sat khitteh Taimang pah

Written by Admin Monday, 05 March 2012 17:15

Share

Sagaing Division, Kawlpi-Tahan khuapi pan Km 10 kim a gamlatna Letpanchaung khua mi Lalthantluanga ( Kum19) in March 3,2012 ( 3:30PM) hun pawlin, a zi Lalremruatpuii (Mapuii) i a lutang Sek khat tawh asak / khawn sak banah, a sunghnu sum Ks.800,000/- USD 1000 kim zong laksak in taimang in Mizoram, Aizawl khua kiang Kawnpui khua ah taisuak cih kiza hi. A zi Mapuii pen zato kipuakin kihopih ahih manin, a pasal i nu le pate akipan a thu pian zia cihte bang mah kithei cian nai lo ci hi.

Tua bangin Pa Lalthantluanga in a zi lutang a sat ciangin a zi lung am ahih manin, a nungah apuak atano uh kha 8 apha pan tawh tuibuakna ah tuk pahin khua phawk nawn lo ci hi. A tuksukna hangin a nauno kitatngawh hi kha ding a hih manin nauno nakpi takin kap hi. Inn vengte in nauneu kap a zak ciangin a delh pah uh le a nu Mapuii pen khua phawk loin om ci hi. Palikte sam sam pah uh a, Kalemyo Hospital ah manlang in kipuak pah cih kiza hi. Mapuii pen March 4,( 10:00PM Kawlgam hun) ciang dong khuaphawk loin, kihopih thei nai lo ci hi.

Tua bang a pianni in, Mapuii i nu le a innkuanpih teng khempeuh Biakinn lamah thungetna ah pai khin uh a, Mapuii te nuta bek inn ngak a om ci hi. A ma tukna kiangah a pasal puanlum sisan bang khat kimu ci hi. A maupen pen a teenna Kawnpui, Mizoram pan abeisa 2011 kum pek a, Christmas zang a Kawlgam, lamah a zinsuk tuni dong atamsuak a zinei ci hi. Gamdang mi permit leh visa neilo pi a Kawlgam sungah lut a, a ut a nuam a om khitteh hih bang a mulkimhuai tak a gamtatna pen  akhuasung makai ten theisiam lo ahih manin, a muh mateng uh zongin akisam bangbang in ka bawl ding uh ci in, Kawnpui khua thuneite in gen cih kiza hi.

Kawlgam thuneite le Letpanchaung khuamite in, " Visa lo tawh kum hitanvei Kawlgam ah a om na hangin heh mahmah uh a,  hih bang a a gamtat ding uh leh I sanggam pih CHIN/MIZO hi a, kua kua ahi zongin, visa/permit lo in Kawlgam/ Kawlpi lam hong lut thei nawnlo ding uh a, zan khat zong Letpanchaung khuasung ah giak thei lo ding uh hi ci in khauhtak gen uh hi. Tua banah hih vai tawh kisai thubul akitheih mateng thuneihna sang zaw ah ki tun lai ding ci uh hi.Letpatchaung khua sung khangnote le Palikte in tua migilo Pa Lalthantluanga pen limzon mahmah laitak uh cih kiza hi.

Source: Zofate Chanchin thar

Translated: Tongsan Tanute