Kawlpi ah Motorcycle in Nupi 2 petlum

Aki gelhni: Sunday, 04 March 2012 11:07

Agelh: Peter Khampu

Bangzahvei kisimkhin: 231

Share

0 Comments

Kawlpi khuasung accident vai tawh kisai ahi hi. I zakkhak a om theih zel banah i zakkhak loh zong om tham ding ahi hi. A mimal tawh kizui-in accident tuak pen kitam lua mahmah den ahih manin thangpaihna lungsim tawh i thu-lu-ah, "cycle in petlum/keilum" cih kong zang hi. Nidangin humpi sahangte leh tualgalte ki-lau bek a, tu-in ahih leh a etlawm mahmah, a zat nuam mahmah, hoihtakin zangthei hi leng i ngal i tha hong dawn mahmah Pasian' thupha a kicitheih ding khat hi ta leh mi tampi in i zatsiam loh manin i gal lian pen in, "Motor Cycle" ahi ta lawmlawm hi. Kawlpi pen lampi kibeh lap lo-in, mei lah om tuan lo-in, motor cycle lah nisimin a honhonin kibehlap den ahih banah a hawlte zong ganhing khuak tawh thuah uh hi liang ding hiam, mi nawk lum ziahziah lel uh hi. Lampi neu leh mitam man cileng lah Mandalay sangin nakpitakin mi kitawm zaw-lai, cycle zong tawmzaw tham lai ahih manin a zang mite mahmah gina lo lua hizaw hi, cih kimu thei hi. Tua lo a liam a bai mah zong nisimin clinic te-ah om denden hi.

HONG NUSIA I NUTE GEEL:-

1. Nu Hau Go Cing (Kum-52) Khualui Tungzang, teenna, Paangpi veeng, Kawlpi pen Feb.29,2012 ni-in nasem kuan ding a innpam uh panin a lawmte tawh lam kankhawm pen numei cycle hawl khat in nawklum hi. (A kigen teh college sangkah te hihtuak kici a, mi namdang lua zong hi khol lo dingin ki-lamen zaw, cih kigen hi). Taisuak ta leh hih nu pen kithei kik veve ding hi, cih lamen uh hi. Zanni March 2,2012, 2:00 Pm. hunin vuina neikhin uh hi. Nu Cing pen meigong hi a, taneu nih nei hi.

2. Nu Ngiak Za Niang (Kum-55) khualui, Suangdawh hi a, tulaitak Singunau ah teeng uh hi. Zan ni, March 2,2012 ni-in a inn pam uh, Siyin Baptist Church sakdeuh panin Kawlte cylce hat hawl mahmah khat in taih hi. Gim lua ahih manin Tapyinwe Hospital ah kipuak a, cih nading a theih loh uh ciangin Madalay ah puak dingin paisukpih uh a; Yarkyi khua panin dam zo lo-in hong nusia a, innlam hong kipuak kik a; tuni March 3,2012 (3:00 Pm) hunin vuina nei uh cih kiza hi.

Hih ih Nu Niang pen a taih te taisuak sawm uh, tai khinman lai a, a deuh uh ciangin kiman kik ahih manin hehna, thangpaihna kithuap lua ahih manin a hoih bek khom khat mah liausak, gaamh uh cih kiza hi. A gen te in, Kawlte khawng a tuak uh hi leh thudeuh zaw lai ngel ding uh hi, kici hi. Khai leh khai leh Zomi ahi a, Tapidaw khempeuh in ahizongin meigong tagahte leh a huh a panpih ding om lo phadiak mite beek i khual, i huutna-in i khuasung vai ngaihsut theihna a tuampikhat pankhia ta lo ding i hi hiam?

VAI THUPI KHAT HONG GEN BEH LAI NING, NA SIM SUAK DIH UN:-

Tunung diakmahin Gamdang panin Mikangte nih Kawlpi hong pai uh a, Nitha Phungzi mangpi'pa tawh a kimuhna-ah lawmte' hong deihsakna tawh kei zong hong kizawn kha zenzen hi. A thugen uh ka ngaingai a, thupi kasa mahmah khat leh amau kitamkup pen thukhat in hih bang ahi hi. Kawlpi khuasungah Motor Cylce hangin liamna baina bektham lohin sihna thu tampi om denden hi. Tua thute i ngaihsut ciangin hibangin ka mu hi, ci hi.

1. Lampi thukhun te a kigen gen hangin kuaman zui lo; kilamdang lua lo mawk hi. Tua ahih manin tulaitak tapidawte sung diakdiak ah thupi khat peuh a om leh mite' theihkim nading leh a man theih pen nadingun Pastor te' tungah kinga pen kasa hi, ci hi. Ko zong hi kasa tek uh hi. Pastor leh Pasian nasem a kipan kumpi nasem leh makai zaw deuh, pilna maban nei a kisa deuh te peuhmah in hih thukhun zui masa photphot ding hi hang. Tun a hih leh na heh kei un; Pastor te nangawn a zui tam lo phial in ka mu hi, ci hi.

Thukhat lampanin mipi lampizui leh lampi kaan' te' tungah zong tampi kinga veve hi. Siksakol zangte bang pen nih khawng a tangin kiton khawm sese, lampi awn nuam lo zong om thei lai mawk hi hang. Tua leh cylce hawlte' lampanin lukhu khu lo cih zong tamlai hang. A poipenpenin ahih leh hathawl lua mahmah i hih manin a kituak pen hi, ci hi. Tua lai a hong pai Mikang siapi'pa in zong hibangin gen hi. Kei zong ut het lopipi-in ka motor tawh mi a that kha dekdek hi mai ing, motor ka hawl ciangin lau mahmah ing, nuammawh sa mai ing, ci hi. Amah pen international Driving Licensed a nei khat ahihna tawh motor hawlin vak kawikawi ahi hi.

Tua ahih manin biakinn, pulpit tung mahmah panin limphatakin gen ciat le uh. Tuaban ah veengsung hausa teng tawh zong kimu khawm zelin hausate leh thunei te'n zong limtakin panpihin a tawpna-ah tua a zui lo teitei, zukham sa leh a hathawl lua cihte peuhmah pen action lak a kul leh lak cihbang i hih kei leh i gam lah a suakta tektek ding dan hong hi ta ahih manin hih thu pen ngaihsut tham kasa lua hi, ci hi.

(Amau phungzi lampanin cycle accident a tampha diakna mun khat mun nih te-ah a honin pai uh a, amau thungetna, apna tawh lampi tung siansuahna cihte na nei ngei uh a, a photo zong hong lak hi. Tapidaw pawlkhatte bek siahsuahna a bawl i sak leh amau zong a na bawldan uh ahi ta ve!). hih thu Zonet & Tongsan bekah kong puak hi, group mail dang ahi a, ki-hopsawn nop dang a neite in na kikhak sawn mai un.

Hong nusia ih nute geel dahpihna tawh,

Sanggam, Peter Khampu
Kalaymyo

Nu Elizabeth Man Za Niang - Hungelna

Aki gelhni: Wednesday, 29 February 2012 11:30

Agelh: Admin

Bangzahvei kisimkhin: 15

Share

0 Comments

Tenna - Tui Khiang Khua, Tonzang Myone
Behmin - Samte
Suahni - 07/07/1949
Sihni - 27/02/2012
Vuini - 29/02/2012

Hungelna
St. Jude Church – Rawang
(1:00pm)

Biakinn sungah
La
Kipat thungetna
Inteek pan thugenna
Mangpha khakna la
ZCCM pan hanthotna
ZSM pan thungenna
Tuikhiang khua pan mangpha khakna
La
Missa Biakpiakna
La
Tawp thungetna

Hanmual ah
Han thupha piakna
ZCCM pan hanla paihna
Tawpna la

NU ELIZABETH MAN ZA NIANG TANGTHU ATOM

Nu Elezabeth Man Za Niang Pen 7th July 1949 ni-in Sei Tual Khua ah suak hi. Pu Suan Khaw Zam (Gualnam) leh Pi Nian Za Ngai (Naulak) te’ tapa nih leh tanu nih lakpan a thumna a hi hi.

Amau unau pen;
Pu Gin Min Thang + Luan Goih Cing (Kawl pi)
Nu Don Dim Cing + Ngul Cin Khup (Kawl pi)
Nu Man Za Niang + Pa Tel Go (Malaysia)
(Pu Pum That Pau) + (Nu Saw Chia­)
Pu Thang Tel (Samte)+ Pi Diah Tel in ta 4 leh ta nu 4 nei a Pu Nang Do a nautumpen a hi hi.

Pu Nang Do leh Pi Nem Niang in
Pa Tel Go + Nu Man Za Niang (Malaysia)
(Nu Tel Khaw Ning) + ( Vum Hang) (Tamu)
Ngem Ngo Cing + Vum Thang (Tuikhiang)
(Lut Lian Nang)
Pa Tual Gawh Thang + (Nu Huai Za Awi) (Tuikhiang)
Kham Za Kap + Ning Khan Zen (Tuikhiang)
(Langh Do Kham) ta pa 4 leh ta nu 3 ong nei hi.

Pa Peter Tel Go leh Nu Elezabeth Man Za Niang te pen 2nd Febuary 1967 ni-in kiteng uh a, Mimseu 100 Taangseu 100 la uh a 1978 kum’n Pu Pa ngeina tawh sa namkim, Sai ai, Taang ai, Gal zong na ai uhhi. 1983 kum pan’n Pu Pa ngeinalui phiatin Tui Khiang khua ah RC pawlpi naphut hi. Behsung phungsung a tagah genthei teng na cing na kem uh a, mi a suahdong in na pantahzo uh hi. Tua ban-ah a mahpen Nu kician mahmahkhat hi a, a tu a ta te pattahsiam in sum zon pai zon a siam mahmah khat ahihi.

Related news: Pa Zam Dal' nu Nu Man Za Niang in ongnusia

Lia Niang Tan Sen in Motorcycle Accident in ongnusia

Aki gelhni: Tuesday, 03 January 2012

Agelh: Admin

Bangzahvei kisim: 12

Nuntakna khempeuh Topa' khutah oma khuangbang khoh theih loh damtui banga luang i nuntakna hun le nite khempeuh Topa aa a hi hi. Ei aa hi zen leh i kikho nuam mahmaha phamna ciaugal kai ding, i pitek i putekte nangawn kuamah i kiphal kei hi.

Lamet hetloh takin i naunu it mahmah pa Zam Khaw Thawng le nu Kim San Niangte' tanu nautum pen lia Niang Tan Sen in kumthak zanhah ni, zingsang 2:00am pawla motaw circle tawh a ciahna pan accident in, zato kipuak pah pen, a natna nasia zaw ahihna tawh Madalay puak kik uha, ahi zongin kamsiatna tawh a khuakah si lut khin ahih manin hong dampih zo nawnlo-a, tawntung tawlngakna i Pa' angah January 2,2012, 6:00pm pawlin hong ciah san ta hi.

Dah mahmah hang, a it huai mahmah le mailam lametna tampi tak tawh nulepa ulenau khualetui te'n i ngakngak nungakno khat a sum hi hang. Tu laitak a luanghawm Mandalay pan Kawlpi zuanin a puak laitak uh hi-a, lungkim huai takin lei-ah a thuh theihna dingun thungetna ah phawk ni. A dah a kap khempeuh tawh kong dahpihna uh hih i khuanet pan kong suak sak hi. USA a om a ute Manggo le Thangpi zong kong phawk uh hi. Ih Topa mah hi den ei, ih nuamna ih dahna ah, hehnepna kicing hong pia ta hen o, pu Thawng pi Niang le naute kong dahpih uha i Topa' hehnepna khamuanna thupha hong tunna ding thungetna ah hong phawk ung.

Hong dahpih,

Sia Tuangte Innkuan
1624 Westlake Dr. # 2403
Conway, AR 72034, USA

DAH PIH NA

Nu Niang Go Cing (Leilum) in ongnusia

Aki gelhni: Friday, 30 December 2011

Agelh: Admin

Bangzahvei kisim: 20

Zomi U le nau akua mah peuh,
Leilum khua Pa Thuam Za Cin zi Nu Niang Go Cing in 12/27/2011 nitak nai 10 PM pawlin leilum khua, Tedim Myo, atenna inn pan in leitung a nuntakna hong nusia hi. Adah akap ata te Nu Haunu, Tedim; Thang Suan Mung, Khup Mang, Leilum; Pum Za Khai, FL; Go Lian Thang, FL; Man Lian Niang, MD; te Topa' Kha Siangtho in hehnep na hong piaksak ta hen .

Hih atunga dahna tawh kizui in FLORIDA ZOMI INNKUAN makaihna tawh tunitak ciangin Plaintation, FLorida ah hehnepna kinei ding hi...Florida sungah aom Zomi akua mapeuh in hanciam in paiciat ni.

Ahopih nuam ih om khak leh,

Pa Pum Za Khai ( 954 )401-3941
Nu Man Lian Niang ( 301 )806-5578

Thu zasak,
TSMang , FZI EC

Artist Kyaw Kyaw Oo' pa Pu Lun Cin Kham in ongnusia

Aki gelhni: Thursday, 29 December 2011

Agelh: ZomiDaily

ZomiDaily :: Tonzang gam, Lungtak khuami Pu Lun Cin Kham in December 27, 2011 ni zingsang 2:55 am in Malaysia, Kuala Lumpur khuapisung aom Sungai Buloh Hospital pan ongnusia cih ihzakkhak manin zomi a kua mah peuh in ki dahpih mahmah hi. Pu Lun Cin Kham pen Zomi sungah ihtheih mahmahkhat ahi Artist Kyaw Kyaw Oo kici Pa Kham Khan Suan ii pianna Pa ahihi.

Pu Lun Cin Kham ii angkawi azi Pi Cing Kho Vung inzong nungdeuh mahmah in ongnusia khindeuh hi a, tu'n Pu Lun Cin Kham in ong nusiat leuleu ciangin anusiat a innkuanpih, tuleta te adingin ih khasiat mahmah hi. Mite Christmas Lungdampawi nuamtak zangziahziah in aomlaitak zato ah cina in kikhoi cihzong anop hetlokhin hi a, tuaban ah ong nusiasuak lailai ahih manin akem adonkhat tanau, tuleta te in bangzah in nasading uhhiam?

Tun December 29 ni-in Pu Lun Cin Kham' luanghawm pen hanmual ah aki vuiding hita hi. Dahna kahna kawmkal panin ongciahsan, ongnusia Pu Lun Cin Kham ii khasiangtho in tungthangvan ah tawldamna ngahtawntung tahen!

DAH PIH NA

Lia Zam Nuam Cing (kum 20) in Kawlpi pan ongnusia

Aki gelhni: Tuesday, 27 December 2011

Agelh: Admin

Bangzahvei kisim: 72

Share

0 Comments

Mun tuamtuam aom Zomite
Kawlpi khua ateng Pa Cin Khan Hau, (Rev. Tun Go Lian naupa) leh Nu Man Nuam Cing, khua lui uh Mualpi, Tonzang te tanu Lia Zam Nuam Cing (kum 20) Dec. 25 nitak nai 9:00PM pawl in motor cycle in taih in aphual ah si pah hi. Tu ni Dec. 26 nitak nai 2:00 PM in ki vui ding hi.

AMC pan
Kawlpi

---

---

Dear Sanggam Zomipihteng,

Hih ih sanggamnu' hong nusiat pen itpih dahpih mahmah tek hi hang. Amah pen Ciimnuai boarding Home ah siamah sem ci in ka za hi. Cycle taihna mun pen Sitnapa te' inn mai teng hih tuak hi. A taihte taimang pah ci-in dahhuai sawnsawn hi. Hi dan tamsim tham ta hi.

Kawlpi pen Motor cycle hawldan leh lampi zuihdante akipan control theihna lampi a tuampian sim khatin ih sep kei mawk a leh bel a lipkhap huai mahmah khauhun hong hi ta mawk hi. Zomi a tampen om na leh hong ki zuanzuan lai ding mun zong ahi hi. Zanhal ni, sunnung ah zong RTC sakah cycle accident hang mahin a liam a bai a om banah mi khat si hiam, hing hiam kitel lo-in om hi. Ih phawk khak loh zong a dangdang om tuak zelzel hi.

Mipi kilomkhatin sawm hial hi le'ng kuama mot hawl ngam lohna dingin lampi om thei kha dingin lamen ing. Kipawlna kipawlna i cih ngakngak buangin hong mapan khia taktak ta dih ve vua leh guai. Khangluite pau danin cile'ng note pen, "Husa nei" diakte hong suak na hih manun maw... Hih thu in, "thu-kin/URGENT NEED" ahi hi. (A diakdiakin unau meltheih hau lo phadiakte in nomau teng mah hong lamen gige uh hi, cih zong phawkhuai hi).

Dahpihna tawh,........................................