2012 kum Bunglung khua ah Khuakhal Music sinnading vai
- Aki gelhni: Friday, 02 March 2012 21:04
- Bangzahvei kisimkhin: 145
Bunglung Kawllak Khuakhal Miuzik sinna
pen a masa in March 6-10, 2012 a kisawm ahi hi. Ahi zongin Tan 10 lai
kivuan nai lo leh tua hun zung a mau kiangah kawl pawi (a ngein) om ding
thu nih hangin March 19-23, 2012 sung kibawl ding hi.
Kawlpi a miuzik vankawmna Pa Than Thon
in zong a miuzik vanteng nitak khat a mawkna in hong zang sak ding ahih
manin March 24 ni khat ki behlap ding hi.
Bunglung khua, khuasung makaite tawh
kimu ding in kei zong Bunglung ah Sia Khupneu, Siama Cingcing tawh 23
March ni in kileh in ka va pai thei hi. Khua sungah Tuiphum (Emmanuel leh
Leipi) pan pawlpi 2 om in, AG pawlpi khat om a, Presbyterian pawlpi 1
om hi. Tutungin hih pawlpite minvawh ngam nailo in amau sung pan a makai
2 tawh kimu in khuasung makaite tawh ka va kimu uh hi. Amau zong lawp
peuhmah bilbel in, nidang a kingah ngei lo Khua sung sang huang hong
kawmsak uh a, Pasian thupha tawh zatkhuan kingah bilbel hi. Tua hangin
khuasung ah zattheih nading ngetna in Ks. 45,000/- bei hi. (Khuanawl ah
kawlpawi bawlna stage khat zong om a tua zong kingah khin hi. Ahi zongin
ih lawmte giah nading, kisil/dailen nading, tentan room ding, stage
ding hi h teng mun khatah a om khawm ding deih tentan ka hih manin khua
sung upa te kiangah Siapinu tawh va kimu hoh ni ka cih teh amau ko na
vaihawm nung hong ci uh a, Pasian hehpihna tawh Sang huang a ngah suak
hi hang.)
Tentan hun sungin Thawnkhamin na makaih
thei ding hi. Sia Khupneu, leh a lawmte 3 in miuzik vante hilh tuam ding
uh a, Siama Haukhek leh Siama Cingcing te lawmta mi 5 in Music Theory,
Basic Vocal Techniques, leh la tuamtuamte sinpih ding uh hi. Nitak
sialin stage show om ding hi.
Amau khua sungah a uktawm a van a lei
tenghteng khangno pawl khat na om a, "Sia aw hih tentan man teh ko zong
Kawl Tuibuah pawi a ding kisin suak pah nung", hong ci uh a, "Ko zong ka
lem uh leh hong sim nung. No zong December teh X'mas Concert hong bawl
nungin la khawng hong sa un maw", ci in ka vaikhak hi. Kei a makai pa om
thei lo ding ka hih manin ci in khua sung upate limtakin ka vaikhak hi.
Tu in nakpi thungetna kisam ding hihang.
A mun leh a hun hong lemto suak a, Bunglung khua sung pan Miuzik uk
mahmah khangno pawl khat ihngah zawh ding ih tupna hi. Sum leh pai zong
kisam lai ding hi.
Rev Dr Go Chin Zamte innkuanin Ks.
100,000/- hong panpih uh hi. Siama Liansen (Dorcas) Malaysiate innkuan
in zong Ks. 50,000/- tawh hong panpih dingin hong kamciam uh hi. (Tu
bang a sum pen Kawlpi tung khin ta ding hi).
Cinpi (Lazy) leh Sangpi (Laphuak/lasa)
te in Ks. 50,000/- tuak hong hanciampih zo uh ahih manin ih lungdam
mahmah hi. Zamnu in Ks. 100,000/- hong panpih ding hi. Tua hi a,Vanpuak
nading mawtaw saap, Ks. 100,000/- Diesel man ding Ks. 100,000/-, Miuzik
van kawm man ding (Ks. 300,000/- in sam lai) hih teng a beupi in kisam
lai ding hi. Tua lo neekledawn, lungdamkohna cihte pawl zong kisam
mahmah lai ding hi. A phualpha ih sanggamte lungdamkoh nading kigeel zo
nailo hi. (Gel huan ni).
Tua hi a, mun tuamtuam a om Zomi
Miuzik-siamte in Pasian hong piak i talent zui in ih MISSION nasepna
thupi mahmah khat hi ding ci in um hi hang. Atam atawm cilo in kihel
dimdiam le hang, thu-um nailo khangthak tampite tungah miuzik zui in
Thu-upna kiguan zo kha ding hi.
ZOMI MIUZIK-SIAMte KISIN CIAT DIH NI!!!!
US pan a kihel nuam khempeuh in hong zasak un. Malaysia pan a kihel nuamte in Rev Lian Za Huam tawh hong ki thuza un.
"IH UPNA ZAWHZAH TOPA' DEIHBEL HI"
"Nupi nu' upna bang nei peuh leng, atam atawm cih om kei ee...."
"Nupi nu' upna bang nei peuh leng, atam atawm cih om kei ee...."
Topa'n thupha hong pia kim ciat ta hen.
No comments:
Post a Comment
hih sung a ong lut ong ih u leh nau a kua mah peuhgh. it na khut tawh ban zal khut ong len in