Tuzawh Kum 100 Ciang

Aki gelhni: Thursday, 19 January 2012 07:10

Agelh: Dr. Hau Za Cin

Bangzahvei kisim: 46

Share

1 Comment

BBC news ah tuzawh kum zakhat ciang i nuntakdan ding a kigen lak pan a thupi deuh sawmnih Zolai tawh sim theih dingin kong gualsuk nuam hi.

Kum 1900 kipatciil in America mi civil engineer John Elfreth Watkins in ‘tuzawh kum zakhat ciang thupiang ding’ cih khat na gelh ngei hi. A genkholh tampi tuni in tangtung takpi hi. Tua hun in a kingaihsun banlo leh a ki-um ngamlo thu tampi tangtung mawk hi. Tukum, kumthak 2012 a kipat ciil in zong mailam thupiang ding a lunglut ngiat mi nih Ian Pearson (IP) leh Patrick Tucker (PT) te in mailam kumza cin kik ciangin mihingte nuntakzia ding a nuaia bangin genkhol uh hi.

Hitheilo ding, piangtheilo ding, umvet keng cihte kingahlo a, na khat peuhpeuh a piang thei hiveh e cih ngaihsutna nei kawmin sim suksuk ding ahi hi.

1. Tuipi tungah ann kicing dinga, tuipi sungah ngasa kikhawi ding hi: Mihing billion 10 phata ding ahih manin nek leh dawn ding kicinglo ding hi. Mual leh guam bek ah kicing ann tawh mihing nekkhop kingah zo nawnlo ding ahih manin tuipi tung ah zong ann kilim ciin mahmah ding hi. A nuai ah ngasa kikhawi in, a tungah buhsih leh vaimim kicing ding hi. Ngasa ann dingin tuipaan (algae) tampi kisam ding ahih manin tuipaan zong kilimciin mahmah ding hi.

2. Mite ngaihsutna kitheita ding hi: Khuak manlang in ngaihsutna leh thu theihna hoih mahmahta ding ahih manin khat leh khat kimuh bek in zong a ngaihsut thute kitheihpihta ding hi. Mi khat in a ngaihsut pen en zong kitheihpih dinga, kiciamtehpih thei ding hi (tuhun internet pan thu leh la, milim leh video nangawn i kikhak ziauziau bangin tuzawh kum zakhat ciang mite khuaksunga thute kiciamtehpih theita ding hi). Ahang pen khuak khat leh khuak khat kizopna, kihona leh thu leh la kihopsawnna khempeuh pen electrical signals vive ahih man hi.

3. Mi a pil mahmah, a si thei nawnlo in kibawl theita ding hi: Mihingte khuak pen electronics tawh kizom thei ding ahih manin a nuntak sauna kibelhei thei dinga, electronics tawh a kizopna a siat mateng tua mi si thei nawnlo ding hi. A pil, a pillohna zong ama khuak sungah a kizoppih electronics a hoih leh hoihloh in sai ta ding hi. Pilna sang deuhdeuh ahih manin tua banga khuak tawh kizopna kizang ding electonics vante tawmno khat bek man dinga, mi kim phial in kileizo thei ding hi. Sihna kigo zo ahi mai ta diam, tua hun ciang?

4. Khuahun kiheizia ki-uk theita ding hi: Huipi guahpi leh meikai dingte bangtan hiam kikhawlsak, kipiangsak thei ding ahih manin khuahun zong a tamzaw kiuk thei ding cihna hi. Ahi zongin a heina van leh nate bel tawm man khollo ding hi. Tuhun laitak in zong mihing bawltawm khuahun heina tawh gam khat leh gam khat a kinawngkaisak khak ding uh a dalna ding a ngaihsunsun pawl om khinta hi. Tu zawh kum zakhat ciang bel tua pen nasia mahmahta dingin ki um hi.

5. Leitaw gam ah sumbawlna uang mahmah ding hi: Tu laitak in Antartica ah kuamah tenglo, vukkhal in tuamcip himah tase leh tuzawh kum zakhat ciangin a nuai a leisung pan van manpha tampi kitokhia in sumbawlna phualpi khat suak dinga, sumbawl mite kileh ziahziah ding hi. Ahi zongin a vukkhalte leh mual leh guamte kisusia gawp cih bang hilo in zusa kua khuat bangin a kisam van manphate lakna ding kivut siuseu bek ding hi. Leitaw gam Antartica bek hilo in leilu gam Arctic zong kilim bawl mahmah ding hi. Leilu leh leitaw ah sumbawl theihna ding kidem in gam tuamtuam kikal ah kinawkna pawlkhat zong piang thei ding hi.

6. Leitungbup ah sum khat bek kizangta ding hi: Tu mahmah in zong a thu bek tawh sum tampipi kikhak, kipia, kilei theita ihih manin tuzawh kum zakhat ciangin bel sum nam khat bek mah kizangta ding hi. Tua pen a sum taktak tawh kipiak vanvan zong om nawnlo in a thu leh la tawh, electronics tungtawn in kikhak, kipia, kilei ziauziau ta ding hi. Tua ahih vet kei leh lah kilehbulh lian dinga, electronics tawh kipiak theih hilel ei ciin mite in amau khua ah, amau gam ah ‘sum tuam’ na bawl behbeh thei zawsop ding hi.

7. Khuak manlangna dingin computer tawh i khuak kizomta ding hi: Tuzawh kum sawmnga ciangin mi pawlkhat in a khuak manlangna dingin a khuak leh computer zomta ding uh hi. Tua zawh kum sawmnga a cin kik ciangin mi khempeuh phial in a khuak leh computer zomta ding hi. Tuhun a phone model tuamtuam a kidem toto, a hoih deuhdeuh bangin tua hun ciang khuak leh computer zopna a hoihzaw mite kidemtoto tading hi.

8. Robot no i ciamtehnopte kiciamteh thei ding hi: Tu laitak in bel robots tuamtuam mihing nasep panpih dingin kilim zat lua nai kei in, a kizang toto hipan lai hi. Ahi zongin tuzawh kum zakhat ciang bel kilim zat mahmahta ding hi.

9. Nuclear nam tuamtuam gawm dan kitheita ding: Tua bang gawm dan kitheita ding ahih manin meitha leh energy khat peuh nuclear pan kingahta dinga huihnung pana tha ngahna cihte kithupisak nawnlo ding hi.

10. Pau nam thum bek kizangta ding – English, Spanish leh Mandarin:

Pau tampi a kisapna kiam ding ahih manin pau nam a zang mihing tam peuhpeuh suakta dinga, a neuzaw paudangte beimang kei mahleh kizang nawnlo ding hi. Pilna sinna leh sumbawlna, kizopna leh kihona khempeuh ah pau tampi kisam nawnlo ding ahih manin a tunga pau nam thumte bek kithupibawlta ding hi.

11. Mi a tamzaw nu-nu, pa-pa kiteng hita ding: Kiten dan a tuamtuam lak pan tuhun kitendan ettoh in a lamdang mahmah nam khat nu-nu pa-pa kitenna (gay marriage) pen uang semsem ding hi. Mihing suahtakna kiuang gen semsemna mun ah mite in suahtakna ngah semsem ahih manin a ut leh nu-pa kitenna zui thei a, a ut leh nu-nu pa-pa kitenna zong zui thei hi. A ut leh laih kawikawi thei lai ahih manin upmawhloh lama kihei ding upna lian mahmah hi. Biakna hat leh khauhpai mahmah gam simloh ah tua bang kitenna uang diak ding hi.

12. US gambup ah California inntuan masa pen ding hi: Tu mahmah in zong California inntuan nuam, gam tuam suak nuamta cih kithei khin hi. A suak masa pen zong himai dingin kiummawh hi. Nisuahna lam gamte zong inntuan pah zangzang dingin kiummawh hi. Ahang pen state khat leh khat kihuh den ding cih pen mipite lungsim ah dau deuhdeuh a, kihuhloh theih hileh ut semsemta uh hi.

13. Huih lak ah khualzinna nuam mahmah ta ding: Tuhun huihlak leh vantunglam zuana khualzinna cihte tuzawh kum zakhat ciang ol mahmah tading a, zong tawm man mahmahta ding hi. Mikim zin theihna dingin kibawl ta mai a, tawlngakna leh nungak tangval zawllenna in kizangta ding hi.

14. Numeite a ut hunhun in naupai lel ding: Pasal tawh lupkhop kul seselo in numeite amau ut hunhun in naupai ziauziau ta ding uh hi. Nupa lupkhop kenkan cih zong om nawn selo dinga a kisam khempeuh a kikoihna mun pan la in thun ziauziau lelta ding uh hi!… he hee… A ut uh leh naungek suaksa tuisik pen kemcingin a ut hunhun uh ciang nu gilsungah guangin suaksak theita ding uh hi. Natna tampi zong naungek pianma in a neih leh neihloh kitheita ding hi.

15. Vanlui kepna museums tampi kineita ding hi: Tuhun a i muh van tampi kimu nawnlo in mangthangta ding ahih manin tuate ettheiha kepna mun museums tampi kisam ding hi. Singkung lopa bek hilo suangtum leivui nangawn kimu nuam ta ding hi.

16. Sehnel gam zong gammang lak kisuaksak theita ding: Sehnel gam zong gammang hong suak thei ding ahih manin a kisapna zuiin kisuaksak ding hi.

17. Kitenna khempeuh a hun kiciangtan ding hi: Kitenna, nupa suahna, kopkhat suahna khempeuh pen biakna vai leh upna khauhpai mahmah ahih kei nakleh kumkhat, kumnih, kumnga, kumsawm cih bangin kiciangtan dinga, ‘sihna in hong khen mateng’ cih banga kitenna om nawnlo ding hi. Tua pen tu hun mahmah ciang zong a kilimzat mahmah hita a, a khangto gam leh minam lak ah a kiuangzat mahmah hikhinta hi. Kiten a utlo hilo ding uh a, ahi zongin khantawna kiteng dinga khaukual kiawhsak liang ding bel a ut tawm deuhdeuh ding uh hi, kici hi.

18. Gam tuamtuam a om hangin kiukna, kikepna zia paipi khat leh nih bek om ding hi: Gam khat suak ding cih ahih pah loh hangin kiukzia, kimakaihzia leh kikepzia a paipi khat zuiin leitungbup kikemta ding hi. Tua ahih vet kei leh lah lehpai in eima kual ciat ah ‘kei thu’ cih vive mah tawh kikhen kham bilbel ding hi. Hauhna i zekkhop kei leh a hau a liante in a zawng a ngaute hong ukcip, hong sikcip in sila kisuak ding hi. Nek ding dawn ding leh zinsuk zintohna khempeuh ukcip ding uh ahih manin.

19. Gal kidona peuhmah remote control vive tawh kidona hita ding hi: Mihing mahmah galdo a kuan cih om nawnlo dinga, technology hoih nono tawh a gal pan khutpi mek ziaua kidona, kikapna, kisimna leh siktum suangtum bek tolhsak, taisak, paisaka kiluhna, kidona suakta ding hi. Mihing bek hilo ganhing leh singkung lopa in zong lim thuak mahmah ding uh hi.

20. England leh Zogam ah kikhelna lianpi piang ding hi: A hoih lama kikhekna ahih kei leh a hoihzaw sema khantohna ding kilumlehna lianpi om ding hi (England gam ah; kei upmawhna ah Zogam ah zong). Tua manin khantohna namkhat hong kibehlap kik ding hi.

Thu tuampi honkhat behlap leng: English pen a awsuah tawh a laimal kigelhta dinga, awsuah kibanglote laigelhzia kidang ding hi. Noh innkuan bek nektawm ding annteh lohing ciinna huan bawl ding kiphal nawnlo ding hi. Banghang hiam cih leh leitang mahmah kiciil bawl luata ding ahih manin. Thukhenna leh thudik thuman cih khempeuh pen a kibawlpha thei lai ding hiam cih vive tawh kisuut ta dinga, mawh hi, khial hi cihte om nawnlo ding hi. Thukizakna lai leh internet cihte om nawnlo dinga, mi khempeuh in a theihnop thu khempeuh a khuak ah koih in khol zihziah zawta ding hi. Leitang kiciilbawl luata ding ahih manin sehnel tung nangawn ah ann kicing ding hi.

Ciamteh ding: A tunga kigen khempeuh a piang dinga ‘upmawh’ leh ahi thei dinga ‘ngaihsut’ vive hi a, zong piang takpi thei, zong piang takpilo thei ahi hi. Tua ahih manin i sim kawmin ngaihsutna tampi hong neisak hi. A tawpna ah Zogam leh Zomi vai bel keima upmawh kong behlap tawm hi! Lungdam.

Hau Za Cin
Phuitong Liim