Sia Do Khup' "Ngaih Ang Lai" Video pan lasa Cingpi tawh holimna

Aki gelhni: Saturday, 14 January 2012 16:30

Agelh: ZomiDaily

Bangzahvei kisim: 82

ZomiDaily :: Kalsim in ZomiDaily ii "ZomiStar" Column pan Zomi lasaksiam, lagelhsiam, kineihsiam, Music tumsiam, leh adang siamna tuamtuam neite suahsak zelding pen ka lunggulh mahmahkhat uh ahihi. Hihhangin ih ZomiStar te leh mipi zong kinaina, ki maingapna ongkhangsak dingin ka lamen uhhi. Ihki pakpih mahmah ZomiStar tepen sumlepai tawhlah bangmah ki panpih zolo ahih manin ZomiDaily pan mipi theihpihding pulakkhiat sakna (Advertisement) tawh kong panpih uhhi.

Tutung ZomiStar Colum ah suaksakding in Zogam tawngpek ah kanazong kawikawi uh a, Tonzang Township sung aom Kansau [A] khuapan khangkhia lasaksiam Cingpi tawh contact kong ngahthei uhhi. Cingpi pen Zomi te'n a aw ihzakzakdet ngeikhat hi a, Evan. Do Khup' Video bawlkhiat ahi "Ngaih Ang Lai" sung a "Ngaih Ang Lai Mah" cih lazong Cingpi sak ahihi. Tuaban ah adang ladawng tampizong Evan. Do Khup' Video sungah sa ngeikhin hi.

Evan. Do Khup phuah ahi "Tunnu Tunnu Aw" cih la zong Cingpi sakmah hi a, a aw hoihin asaksiam ahih manin aza angai khate lungsim onglawng mahmah hi. YouTube: http://goo.gl/HJhgJ
Cinpi leh Cingpi sakkhop ahi "Sem Khawm Ni" cihlazong na ngaihnopleh YouTube link kong koihsak uhhi. YouTube: http://goo.gl/7iXBO

Zogam sung Gospel khualzinna pan aciahphet Cingpi tawh holimna themnokhat kong hawmsawn uhhi.

ZD: Dammaw, Cingpi?
CP: Pasian hehpihna tawh dam ing ei.

ZD: Na minpi, Nu leh Pa min, Behmin leh Pianna Khua nonggen theidia?
CP: Ka minpi Dim Suan Cing hi. Pa Ngul Khan Nang, Nu Cing Ngaih Vung, Beh: Ngaihte [Hangluah], Pianna khua Kansau [A], tulaitak Kawlpi ah om ungh.

ZD: Hihbang aa, Lasak siam nahihna dingin, ong panpih, ong pantah pen kua ai tam?
CP: Hih dan aa La kasak theihna dinga ong pantah pen ka Pa, ka Ute leh Pasian thupha cihding hi.

ZD: Mipi tampi mai ah, na lasak masak pen hunin, kumbang zah napha aa?
CP: Mipi mai ah la ka sak cil in kum 12 khawng hi in teh.

ZD: Studio lut aa, na Lasak masak penpen Album bang hi a, bangdan hamsat na' na tuak aa?
CP: Studio ka lut cil a ka la khui min uh pen "Thuphangah Minam" Vol. 2 hi. Ka lawm Suanno leh Nuam Lek tawh ka sak uh hi-in haksat luatna ka gen ding thei keng. Ahih hang ka mangngilh theihloh khat ah, nitak khat a dawng (10) tak ka zawh uh pen ka ngaihsut kik ciang lamdang sa ing.......

ZD: Nangguak Single Album aom ta hia? Lasiamdang te' tawh Album bangzah sung ah nasa ta aa?
CP: Keiguak "Singel Album" bel om nai kei in, Album 25 val deuh khawng ah la na sakpih khin ing........

ZD: "Cingpi" ci aa ong ki theih khiat deuhna LA pen nong gen thei dia?
CP: "Cingpi" ci a a tamzaw ong theih khiat na la bel Sia Do Khup "Ngaih Ang Lai" Video khui sung a kasak "Ngaih Ang Lai Mah" a cih pen hi.

ZD: Zomi sungpan Lasiam minthang, Thawn Kham ii "Zomi Live Show" sungah, "Kei' Nang' Aa" cih Duet nasakpih khakna thu tawm nong gen thei dia?
CP: U Thawn Kham tawh "Kei' Nang' Aa" cih ka sak khop khakna bel, State Show khatah ong kisam khawm in, ka lataih khawlpak sungun, tua la ka sakkhop mawkmawk uhleh nitakciang, hih zong sa ni ci in, ka sak uh hi a, ama SHOW teh zong asasuak hi mai ungh.

ZD: Thawn Kham’ Album thak "Ka Sinthu, Ka Zaila" ahzong Duet sakpih nahia?
CP: U Thawnkham ii  "Ka sinthu Ka Zaila" cih khui thakah zong Duet khat sakpih kik mah ing ei.

ZD: Kawlpi pan ki hawmkhia Kawlla Album khat ah zong, La sakpih ngei hilo nai hia?
CP: Kawlpi pan a ki hawm khia “Ye Yit Chin Neh Kha Yi Set” a cih Kawlla khui sungah zong dawng 3 na sa ngei mah ing ei........

ZD: Zomi sungah Lasak siam nasak mahmah, na zahtak mahmah (Pasal / Numei) khat tuak nong gen thei tam?
CP: Eimi sung ah lasiam kasak mahmah leh ka zahtak mahmah pen V.C Mang leh Senboih (Helen Baby) hi.

ZD: Vocal tawh kisai sinna naneih leh na Sia leh athu atom, aki cingin nong genthei dia?
CP: Vocal tawh kisai sinna cih bang a tuam in nei tuan keng.

ZD: Lasa siam Cingpi acih, nang' lo khat om hilo hia? Tua Cingpi pen tawh ee, na ki thei kha uh hia?
CP: "Theisen Tongsan'' a cih zawlla a sa khat om mah in, kei tawh bel ki thei lian kei ungh.

ZD: Rev. Pau Khan Khai tawh 2010-2011 sung, Japan pai nai vua leh!
CP: Pasian in lemsa nailo deuh hi in teh, Visa ngahlo in, kei pai thei kei ingh. 

ZD: V.C Mang in Iron Cross Band tetawh Album thak abawlsawmna ah sakpihding cihkhat?
CP: Aw, tuasung ah sakpih khamah ning ei.

ZD: Lungdam ei, hihbang aa, lungduai tak, nong dawnkik man, ihbiak Topa'n thupha tampi ong piakbehlai tahen!
CP: Kei zong lungdam mahmah ing ei, no zong Topa'n thupha ong pia hen oo...

ZD: Oh, khatlailai... nang ong contact nuamte adingin email nongpia theidia?
CP: Aw, hih ds.cingpi1@gmail.com hiven, ong hopihnuam aomleh lungdam mahmah, ahi zongin email bel check man pakpak keiveng inmaw.

ZD: Nang Lasak te' tha ong piaden, Mipi te' tung ah bang' na gen nuam aa?
CP: Tha ong pia den mipi tung ah ka lungdam mahmah... Tha ong pia lai un. Ken zong ong hanciam lai ding hing.... No ong thapiak na mah tawh, hihciang a tung hi'ing...... Hih bang a mipi tawh ki zop na ding a ong vaihawmsak ZomiDaily pan sanggam te tungahzong lungdam mahmah ing ei...

Topa Thupha.......

Presented by ZomiDaily/10Nang