FBI leh US thuneite'n MegaUpload website matsak

Aki gelhni: Thursday, 26 January 2012 02:14

Agelh: ZomiDaily

Bangzahvei kisim: 181

Share

View Comments

ZomiDaily :: Internet tungtawn in File-sharing website minthang mahmah ahi MegaUpload pen "Department of Justice" te'n nung Thursday ni-in matsakmawk uhhi. Zomi sungpanzong Software leh File tuamtuam a download khazel omding hang a, ahi zongin tulaitak www.megaupload.com nahawh le uhcin "This domain name associated with the wesite Megaupload.com has been seized pursuant to an order issued by a U.S. District Court." cih lai akigelh leh US Logo pawlkhat namuding uhhi.

Hih MegaUpload website akimat, aki khakcipsakna ahang pen Copyright Infringement hang hipipen hi. Ih theihsa mahbang in MegaUpload panin Movies leh Television Shows tuamtuam amawkna in ki download thei ahih manin tuapen Copyright Infringement asukha hipah hi.

MegaUpload ongphuankhia Founder papen Germany gammi hi a, Kim Schmitz ahih keileh Kim DotCom cih mintawh akithei mahmah mi minthangkhat ahihi. Hih papen MegaUpload website hangin tulaitak New Zealand ah akiman hi a, amahtawh adang mi 3 zong kiman cih kiza hi. US pan FBI (Federal Bureau of Investigation) te cialna tawh New Zealand gamah akimankhia mi 4 tepen Founder Kim Schmitz (38 years old, Germany), Co-founder Mathias Ortmann (40 years old, Germany), Finn Batato (38 years old, Germany) leh Bram van der Kolk (29 years old, Netherlands) te ahi uhhi.

MegaUpload website banah adang website 18 leh Virginia aom Web Hosting bawlnading in akizang a Servers teng uhzong kimatsak cih kiza hi.

US kumpi thuneite'n "SOPA leh PIPA" cih Piracy tawh kisai thukhunthak nih ongneihsawmna vaitawh tulaitakzong aki buaimahmah laitak ahihi. Nungdeuh in Wikipedia te'n a website uh nai 24 sung Black Out sakkhin uh a, tuaban ah adang leitung website minthang tuamtuam ahi Google, Facebook, Twitter, etc... cihte'nzong lungkimlohna pulak uh cih kiza hi. Hih thukhunthak ahi SOPA leh PIPA te ongki zangtakpi leh Copyright anei Video leh Music cihte pen utbangbang in Facebook khawngah ki Post ziauziau theinawnloding hihtuak hi.

Tua hi'n athupi ah ih website sungah Copyright anei Video, Music te leh Software, Serials tuamtuamte ihkoihkhak hetlohding leh ihkoihsa tezong aki sapleh lakkhiat kikding thupi khading hi