CNF te zum hon nawnloh khitteh mabanding

Aki gelhni: Saturday, 03 March 2012 01:05

Agelh: Rev. Zam King Mang

Bangzahvei kisimkhin: 276

Share

1 Comment

Dear lai sim teng,

CNF te zum hon loh ding vai in, lung hi mawh in mi khempeuh in amun mun pan in i vai hawm na hang in CNF's SC te in "Tedim-Tonzang gam ah mipi deih na omlo in na sem lo ding.." cih thu ong suak sak uh hi.

Mi tul70 te suaikaih na vai hawm TYF te, Tedim-Tonzang USDP makai te, ZAUS, ZIUSA, ZIF, LZI leh net sung pan lai at teng khem peuh vai hawm na thupi hi. Democracy ngah ki sa in i ut peuh suak ta tak in i gelh ziah ziah aa zak nop sa in i ki pak mah mah hi. Guai aw thu tatak ngaih sun in sep ding hun ta hi.

Mipi deih na bang in Tedim-Tonzang gam ah CNF te in zum ong hong nawm loh khit teh en, sep ding bang gel na i nei hiam, ki kum to nuam hi hang.

Mi te in bang sem cih en pak phot leeng, ki tawng, ki ko, kihaza, ki dem, ki lang neih sang in ki pum khat in ki makaih siam ding athupi lam tel ding hi hang.

Kawlgam Mualmi dang te in asep a bawl na te uh leitung bup in a theih na ding leh amipih asapih te un theih pih in tha apiak na ding in sim tat lo, imlo sello in taang ko khia pah pah uh hi. I theih sa tek ahi, CNF's SC a pian khiat na ding in $60,000. bei uh hi. Chin Land Club ah mi 3000 members te in kum khat in $150. ta pia uh hi. US ah Chin Churches 50+ om khin in kum sim in Chin State affairs (Zogam phat tuam na ding in vai hawm na ah $ 20000.+ pia khia uh hi.

1. na na sim un. CNF's SC meeting Feb 23-24, 2012 man ciang in makai pa Dr. Za Hlei Thang Chaing Mai ah thautawi mualmi teng meeting ah va ki hel hi.

2. na nasim un. ACR (KL Zomi tampi ki helna) makai khat ahi Zo Tung Mung ki hel in Chin Refugee te gam thum na a tun theih na ding in Refugee Council USA (Sponsors by Jesuit Refugee Service/USA, Lutheran Immigration and Refugee Service, U.S. Conference of Catholic Bishops, Women's Refugee Commission, and World Relief) te tawh vai hawm khawm uh hi.

Hih avai hawm na ong taang tung zen zen leh KL ah CRC te in ei Zomi te ong dei dan ci aa lung kim loh sang in, tubang in nasep i ki pat kholh ding ki sam hi.

1. In recent peace negotiations, the Karen National Union, Chin National Front, New Mon State Party, Shan State Army – North, Shan State Army – South and Karen Peace Council have all signed preliminary agreements with the government’s union level peace delegation to obtain cease-fire agreements. http://www.mizzima.com/special/kachin-battle-report/6679-burmese-government-troops-must-withdraw-kio.html

2. Dan Kosten, the chair of Refugee Council, USA, a coalition of U.S.-based refugee resettlement agencies and human rights groups concerned about refugees. An estimated 100,000 Chin refugees from Burma now living in Mizoram State, India, need immediate humanitarian attention, according to a report to be released on March 6 in Washington, D.C. The report’s sponsors include Jesuit Refugee Service/USA, Lutheran Immigration and Refugee Service, U.S. Conference of Catholic Bishops, Women's Refugee Commission, and World Relief. http://www.mizzima.com/news/regional/6688-chin-refugees-in-india-need-international-support.html
Zomi te hanlungciam khangto diam. God bless Zomi.

Topa thupha.

King Mang
Portland, OR
1 800 234 2446 x 1425
503 257 2230 x 1425

CNA/F leh Zogam aom Nulehpate

Aki gelhni: Sunday, 26 February 2012 14:12

Agelh: Thawn Tuang

Bangzahvei kisimkhin: 102

Share

1 Comment

Lung hi mawhna khat ciat ki pua vilvel sam ahi manin tulai thuthang pawl khat hangin ei hih theihna pan mun ciatpan dottheih, dotmawh ki dongin laitawh a ki gelhte i simna tungtawn panin CNA/F te leh Zogam aom Nulepa ten a muhdan uhleh a ut dan uh tawmkhat ka gen nuam hi.

Zogam aom pawl khat in CNA/F te i deihloh hangin Zogam ah Zomi min tawh na hong sem a om keileh amau mah zuih dingleh amau tawh pangkhawmin sepmah kul ding hi. Ei deihleh ei deihloh thutawh ki sailo in hong sem penpente mah thapiak kulzaw ding hi. Mun tuamtuam ah Zomite ki pawlna ka zak uh om mah hi. A mau mahmah in Zogam ah na hong sem uhleh ka ut pen, ka lunggulh penpen uh hi. A hi zongin Zomite ki pawlna mundangah om kawikawi cihthu ka zak uhtawh ki tonin Zogam ah CNA/F ten zum hong ding cihthu a om ciangin adang min tawh Zogam ah na sem om keileh amau mah ka zuih uh kul hamtang ding hi. Hun khat lai-in hong simmawhna hong bawlsiatna uh a tam mahmah hangin tu-in amau mahin zum hong uhleh ut in ut ta keileeng amau thu i man mah kul ding hi. Hamphatna tampi i ngahloh ding hangin a khateh neng kia uh zong i ngahloh sang' hoihzaw lai ding hi, ci uh hi.

Ka ut taktak uhbel Zomite giat in Zogam hong puah in hongzuun uhleh ut taktak ung. Tu hunteh Zomi Pasian thugen minthang zawdeuhte leh min neih zawdeuhte Zogam ah muhzawh in om nawn kei ei. Khuasungah i muan i suan zaw deuhten lah khuapi/gamdangah hong paisan ciat uh, khuasung gamsung a vaihawm zolo teng inn-ah om ung ei. Ki ukna ahoihloh mahmah koimah a pusuah zolo te adingin hoihlo zawlai hi. CNA/F te Zomi ahihloh uh hangin Zogam a puah sawm cih ka zakbek uhzong lungdam khol ung. Hi thei hileh Zomite giat mahin Zogam hong uk in, hong angvaan uhleh ut taktak sam ung. Tu'n lah Zomi ki pawlna tampi omta cicin vua guaite aw..,ci uh hi.

Zogam leitangah om bangin ki ngaihsut lecin, bang tengteng nangzong na ngahsun kha tam aw!!! Zogam ah CNA/F ten zum hong honding uhleh CNA/F cih min limlim ih deih kei hi. Zum hon nop uhleh amau gam ah tampi hong uhleh phamawh kisa lo hi, ci uh hi.

Zogam in Zomite bekmah hong mitsuan hi.

Thawn Tuang
Zomi Angvaan
http://zomi-angvaan.blogspot.com

Lungsim "HOIH IN" Ngaihsut sia "KHUAK" ki khelsak tading

Aki gelhni: Sunday, 26 February 2012 13:53

Agelh: Hau Thang

Bangzahvei kisimkhin: 75

Share

1 Comment

Thukong honna:

Minam kiciantel diktak in ahong dingtota ZOMI cih tinten na pen neihsa sum kicin man hilo, pilna kici'n man zonghilo, minam min itna lungsim hoih sinpha mahmah na pan ahihi. Abeisa hun in akilung kaka hun ahihi. Banghang hiam cih leh ZOMI cih minlawh lian ding in tu a hong pantah Zomi mipil misiam ih neih teng pen Kawl leh Vai namdang lak ah khat leh nih kihel kiukiau ahihi. Mipil neih sun teng mihau tate Company nei te sung pan akhangkhia hipeuh mah lo in Zogam Mualdawn laaho, thaangling lak a simsi, baalsi cianglawh tawh akilui an nam te ane Zomi sung pan hong khangkhia ahihi. Hih bang mun pan hongkhangkhia Zomi te Lungsim hoih na in tuhun khangthak ah' angah kimu tading in Ni hong suak hi.

Lungsim "HOIH IN"

Nidang hun pan in Zomi cih minsapna namdangten hongneih loh uh hang Zomi te Lungsim hoih in tung siah te sawlna bangbang thumang mahmah te i hihi. "Nu le Pa thumang anah lawh peek" tawh kipantah te ih hihi. Adiakdiak in tomgen leng mikang ten Zogam lading hong kuantoh teh pilna leh sum leh paai kicingtakei seh leh do in anang teta ihihi. Galhiam kibanglo thatang kikim lo ahih man amau khutsung tungta in ih om hi. Tua zawhte Piantit ah amau sep noploh gal maiding ding, Van giktheithei puading hong sawl teh zong Lungsim hoih tak in thumang aazui ngeungeu te ihhihi. Namdangte phat tuam nading in akizang Zomi thatang leh hunbei te hongngaihsut saklo uh hi.

Kawlgam suahtak nading in zong Zomi thatang leh hun bei khutkawng khetawng nu'n na bei, alomlom in om leuleu ihihi. Suah tak ngah zawhteh zong Shan gam ah Sen kangte, Deekte gam ah kawlgam ai tangding in akisawlna bangbang ah sabeng ding hi lo gamkuan na in' lungsim hoih nei a thuman dik na ahihi.

Zogam ah tuni dongciang adawl sang siamsinna saang hongkoih' hongkipia tase keimah leng zong Eilai lopi, eitangthu lopi teng asinsinsak in hongsawl na te amang ngeungeu Zomi Lungsim hoihte ih hihi. Kha lawhsum naleng innkuan nuntakna ding akicing in kingahlo, kipialo silah nungta "Hing na pi'n Nungta lo" te hihang a, ahih hang kicinglo kikhomlo ci'n thumthum tautau se lo Zomi te ih hihi.

Na ngeina uh zanglo nalai uh sinlo' hong ci zong, aki mang hi a, Minam Ni ci lo, Pyi nee Nih ci ci leh zong athu mang ih hi hi. Ahih hang hongzawh thawh nop na thu gen kiat loh hang athei gige Zomi te kiom veve hi. Tua ahih man in Biakna lam pan ahi zong in, Laphuak na lam pan ahi zong in Lungsim moi milmel Zomite Zomi ih hihi. Ka mel ahoih hi. Zomi bang in ka nungta dinghi cih thu ki guanguan ta hang a, Nambangte hong sapna 'C' peuh ki za thei nawn lo hun hongtu'n to Pasian leh Zomi minnam lungsim hoih in leitung zel ta ahihi.

Ngaihsut sia "KHUAK"

Nidanghun pan kipan galmai samai ah ading' na hamsa theithei teng hong sem sak in Zomi min in kisam lo a, Chin lay, Chin ma, Chin pouh' cih teng thuak dekdek laihang a, Na ngeina uh phiat, ko azui, nalai uh sinlo ko asin, na la uh sa lo ko asa, zum (office) sung ah nopau zanglo ko pau in pau, galkap dingin gam kuan in, ciah teh akap lo pa, minngah zakhang, kha lawh khang, akap taktak pa, khanglo, lungkim kei leh Pension tawh khawlsak hi. Hih in ngaihsut sia khuak ahihi.

Hih khuak in hong pumvalh tumding a kithawi gul gol mahmah Thaam pi tawh kibang ahihi.Tu ni ciang dong mahin hih khuak in nasem gige hi. Ana sepzia amu khol gige leh ama pumpi mahmah tawh atuak kha Zomi pilna nei, Sum nei lomhon khat ki om hi. Athuak kha taktak ten bel nasa lua ahih man gen khiase lo a, Lai in zong gelh ding in ngaih sun selo in atu ate tung ah Ei Zomi ih hihi cih kam mal bek hong vaikhak khin khian ahihi.

Hih Ngaihsut sia Khuak in abum khak mi peuhmah pen akpi kang lai avom in gen khiasak thei hi. Gensiam mahmah zawlai hi. Zogam khuapi ding Kawlpi sang in Hakha deih zawk na tungsak hi. Nekding Buh piang lo in Sumtam pi bei Kawlpi pan Hakha ah nek ding pua ta sak nainai hi. Hih Ngaih sut sia khuak in angal khat pan in en hit hiatin nuihsanlai in ka umhi.

Kikhelsak tading:

Zomi cih kam mal kiukiau in ahong kipan toto biakna lam pan in ahi a, leitung lam pan ahi zong in kizel mahmah ta hi. "Ngal haa paaksa tum kik ngeilo" cih pen khangno te sisan sung ah lampi in kisialsial a, amit kik nawn lo ding in Zopuan pi in Zomi naupang no khat dong ah tuam cip lingleng ta ahihi. Tu lian in Zomi cih hongpantah te Zomi mipil misiam te' khangham ta in teekta leh Lungnuam ta ding dinmun khangno te kitungta hi. Lungkim huai bang in ngamtat khiat sepkhiat zia ding masuan om gige hi. Zogam ahih leh banghun teh Chin min kikhel ding hiam? cih pen Namdangtung sang Zomi, Laimi, Chomi ten ihzat loh hun ciang in manlangtak in Lungsim "hoih in" Ngaihsut sia 'khuak" kikhel sak ta ding ahihi.

Hau Thang
ZomiDaily' Writer

THAWNKHAM INTERVIEW

Dr. Vum Son laigelh diklo khat

Aki gelhni: Saturday, 25 February 2012 23:43

Agelh: ZOKHUP

Bangzahvei kisimkhin: 311

Share

1 Comment

January 26, 2012 ni a Tongsan Online Magazine a suak, Dr. Vum Son gelh Zogam ah CNF/CNA te tatsiatna tuamtuam ciamtehnalai cih sunga Tuithang khawmi Thuam Go Pau tawh kisai, thudiklo khenkhat om hi, ci in Tuithang khawmi Charlotte, North Carolina a om Pa Sum in, mipi in thudik atheih ding deihsakna tawh, hih blog ah taklang sak dingin hong request hi. Pa Sum genna anuai a bang ahihi.

Pa Sum in agenna ah Thuam Go Pau pen Kawlpi a teng hilo in, Tuithang khua mah a teng ci hi. Tua banah amah pen migenthei khat ahih banah, a mi asa mahmah zong tha lian lualo khat hi in, Tuithang khua ah zong kuamah tawh kisel kibuai ngeilo, midaipaam leh hehpihhuai khat ci hi.

Kawlpi leh Mizoram kikal sumbawl a zin hilo in, Mizoram a thatang tawh sum thalawh, alawmte tawh innlam ciahlai kikaplum ci hi.

Akikaplupna pen Meitei Guun kiang hilo in, Phil leh Cituilui acihna munlam hi zaw ci hi.

Tuabanah hi thu hong piangna pen, anauia a bangin gen hi.

Thuam Go Pau pen Mizogam pan sum thalawh, alawmte tawh hong ciah uh ciangin, Buanli khua tung uh a, Buanli Khua atu'n uh ciangin, inn khat ah annhuan uh ci hi. Tua a annhuana inn vuah CNA te zong na tungkhin uh a, ann na huansan laitak uh ci hi. Tua inn a annhuan khawm a , a om laitak uh CNA te'n amau a etdaan pen dik phalo in, hi laplap keei uh ci hi.

Amau zong lung himawh kawm a a om lai tak uh, CNA te annhuan man masa zaw in, mapai uh ci hi. Thuam Go Pau te zong annhuan khit ciang ne samsam uh a, Thalmual lam zuan uh ci hi. Tuabang hun laitak in ni zong atumtum ta ci hi.

Hibangin khualam zuan a vaiciah laitak uh, mun khat atu'n uh ciangin, lamsak lam ah sakhi tai daan in, kheging kiza in, amau makhelhkhelh daan khat om ci uh hi. Amau zong lau kawm pipi in, innlam zuan uh ci hi.

Tuabanga innlam zuan vaiciah pai, Phil leh Citui lui acihna uh atu'n uh ciangin, tawlnga in meiphual uh ci hi. Tualai tak in singkung tungah CNA te khat om in, apamlam ah zong om ci hi. Tua panin CNA te'n bukap gawp uh a, Thuam Go Pau amun mah ah sipah ci hi.

Thu omzia pen adik hi daan hi zaw ci in, hih blogger pa kiangah Pa Sum in hong gen ahihi.

Tua banah Pa Sum leh tua lai a CNA lak a kihelkha khat, India khawpi Delhi ah kimukha ngei uh a, a dot cian leh, tua CNA pa in Thuam Go Pau kakaplup khit uh ciangin, na khualam uh zuanin kapai uh a, akha in ka mailam vuah hong khiangkhiang niloh ci hi. Tua banah tua tungtangin apaipai na lam vuah, tuahsia ngekngek in, Tungzang khawkim ah amaumah bang Myanmar Army tawh kituak in, kakikap leuleu uh ci hi.

A sakhanlam uh zuan dinga aciahkik uh ciang zong, Tauleng kiim ah Myanmar Army migilote tawh kituak in, kikap leuleu uh a, tuamun ah Thuam Go Pau kaplumpa sipah ci, ci hi. Thuam Go Pau kaplum CNA pa pen abengngong pian khat hi ci hi.

( Hih thu pen Pa Sum in net a kigelh amuh ciangin, a lungnuamlo ci a, phone tawh hong gen teng, agen bangbang a kisuah ahihi. Pa Sum pen US Casino khawpi Las Vegas a om ngei hi in, tu'n North Carolina ah om hi. Hih blog in guptuam paihtuam neilo a, thupiangte kieukim pan kisuahsak ahihi.)
Zokhup
www.zokhup.com

CNF in Tedim ah Zum hon ding CNP in thukimpih

Written by Admin Thursday, 23 February 2012 21:53

Share5

Zogam(Chin State) leilu lam Tedim khuapi ah CNF/A te'n kizopna zum (Liaison Office)ahon sawmna uh tawh kisai Tedim Tsp., leh Tonzang Tsp., sung a om Zomi khempeuh in akideihloh kawmkaal pan Tedim Tsp., sung om Chin National Party (CNP) Committee te'n lungdam takin na muak/ sang uh cih thukiza hi. A diakdiak in CNP,Chairman leh(The Presentative of State Hluttaw)ahi Pu Zo Zam (or) Zam Cin Pau makaihna tawh abeisa January 31, 2012 ni-in Myone level a kimuhtuah thukikupna(Meeting)aa thukhensatna No.(1) leh (3)te tungtawn in Tedim Myone a om CNP (Public Delegates)te thamlo CNP Members teng khempeuh in nasiatak athukimpihna thukhensatna (letter no/1/2012)ah adeihna teng uh genkhia lai uh ci hi.

Hih thutawh kisai Tedim myone sung CNP,(President) Pu Kam Za Dal in agenna ah, " Tedim khuapi sungah CNF(A)te zum hon ding
alungkimlo leh a thukimpih lo mi pawlkhat om hi. Ko ngaihsutna ah tulaitak i Kawlgam khuahun om zia tawh kizui in, ei Zomi(Chin) minam tuamtuam teng pen minam khat sungah kigawmkhop mengmeng ding hun hoih pen laitak ahi hi. Zomi (Chin) kici sungah Kumpi theihpih Thautawi/ langpang pen CNF/A te bek om ahih manin, a mau tawh kipawlkhop ding le amau makaihna thukimpih loh ding pen hoih lo hi " ci in gen cih kiza hi.

Tua bek tham loina a ma genbehna ah, " gam khat ahoih lam a aki'kheltheihna ding i hanciam mahmah hun laitak in sihna,manna te leh supna bainate athuak kha zong om theih kha mah ding hi. Kawlgam sung om 'kumpido aa thautawi mualtung mite (Ethnic group) khempeuh in akibang akithuak ciat ahi hi " ci in genbeh hi.  Tua ahih manin, Kawlgam kalsuan zia pen ahoih lam manawh a hong kikhelsawm laitak in, abeisa thute kimaisak zolo a ih gengen thapaih sangin, Zomi(Chin)te kipumkhat in gam leh minam khantohna ding bangci bangin semkhawm thei ding cih ih ngaihsut zawk ding hunta hi" ci in Pu Kam Za Dal (CNP President- Tedim Tsp,) in genkhia hi.

Hih thu kipatna pen abeisa January,5-6 sung akinei Zogam (Chin State) level tawh kilemna abawlpawlte(The Chin State Govenment Representatives)te leh CNF Thuneih Palai Pawlte (CNF,Delegations) kikupna leh kithukimna tungtawn pan hong piangkhia thu hi a, Tedim khuapi ah hon ding vai Zomite in anial hangin , Than Tlang leh Matupi gam sung mipite'n niallo in thapia mahmah zaw uh cih kiza hi.

Matupi Khuapi sung Ulian khat i genna ah Kumpi te leh CNF te kikaal aa kilemna(Peace)apian theihna ding leh akipawlkhop theihna ding in, kimaingat aa nasepkhop nading uh thupi mahmah hi. CNFte'n azum (Liaison Office) amanlang a hong hon mengmengna ding uh ka ngaklah mahmah uh hi ci in gen hi. Tua bek hi loin CNF galkap a om a ta anau te uh tawh akimuh kaal angaklah mahmah uh ahihna thute gen uh hi. Zomi (Tedim kampau)te khuapi Tedim khuapi ah CNF zum hon ding phalna le muakna anei CNP makaipi le naseppihte Zomibup in mai lamah limtak etcik sawm mahmah ta cih kiza hi.

Source: KNT
Translated by: Pa Kham Khan Suan (Tongsan Translator)

ZAUS in CNF/A te'n Tedim-Tonzang ah zum hohloh nading laikhak

Aki gelhni: Wednesday, 01 February 2012 08:40

Agelh: Rev. Zam King Mang

Bangzahvei kisim: 80

Share

View Comments

Dear lai sim teng,

Zomi Association of U.S. pan in Tedim-Tonzang gam ah CNF/A te in zum hon loh na ding in CNF/A makai te leh Chin State kumpi te tung ah lai ki khak hi.

Mipi in i ngaih sut ding leh i sep ding tampi om lai cih ong phawk sak nuam ing. Atom in ong kumnuam ing, akicing zaw in Kawlgam Kumpite laihawm tadensa te ah na sim le uh cin Kalwgam vai tampi ki tel ding hi.

1. Kawlgam kumpipa U Thein Sein in ASSK tawh thukim na a neih khit ciang in America kumpi akipan,nitumna gam teng leh UN te in Kawl kumpi te vai hawm na hoihsa in thu kim pih uh hi.

2. Kawl kumpi in thautawi kumpi lang pang Kayin, Shan, Mon etc teng tawh ki lem na bawl uh hi.

3. I. Dawl khat na, State level ciang thuki kup na leh thukim na bawl uh hi.
A. Kikap nawm loh ding (ceasefire). CNF leh Chin State Government te hi phot hi.
B. Thau tawi lo in khual zintheihna ding.
C. Kizop na ding zum hong ding.
(CNF/A te in Thantlang gam ah zum zon ding phal na ngah uh aa, ahi zong in Tedim-Tongzang ah zum hon ding vai pen tung siah lam ah akhuan ngen lia uh hi.)

Tulaitak aa ii buai thu pen, CNF/A te'n Tedim- Tonzang ah zum hon loh ding vai ciang bek hi in, hih thu ciang bek tawh khawl ding maw, anuai a maban te ah bang ci ngaih sut na nei i hiam?

4. II. Dawl nih thuki kup na. (Hih hun ciang a ding Zomi ten bang ci gel khol ding.)
5. III. Dawl thum thukikup. (Naypidaw level)

Tulaitak i buai pih pen number 3. I. Dawl khat na ciangbek hi. dawl II & III te ah maban ding gelna ngaihsutna te kikum to lai ni.

Topa thupha.

Zam King Mang
Chairman
ZAUS

Mipi te deihna in Zomi Nam Ni

Aki gelhni: Wednesday, 01 February 2012 08:34

Agelh: Hau Thang

Bangzahvei kisim: 122

Share

 :: A kum (64) cinna Zomi Nam Ni hongtung ding hita hi. Leitung muntuamtuam gamtuamtuam atung Zomi khempeuh sung pan Makai upate'n Zomi Nam Ni bawl zia ding, amun, aphual dingte, Ngeina lam namtuamtuam, Ngei na la aw nam tuamtuamte Minam puan ih neih nam tuamtuam te, Minam vai ah Zomite masuan nasep zia lam hil/lamlakna Thutangkona (gamthu, pilna thu, sumbawlsum zuak thu) nam tuamtuam te neiding in thasan in sun in zan in ih mulo hun hi ta hi.

Pianna Zogam ah ahih leh Minamni cih ding pen nung kha in ngetna om zo napi Zogam PM in sang zo nailo hi. Delhi ah Meetting pai CNP pan Pu Zozam in azenzen kei-in PM asem hizen leng mipideihna zui in Minamni ci-in kabawlsak hamtang ding hi cihi. Ka Za akiat leh kiat, mipi deihna kamang dinghi cihi. Zomi gam State PM in asan zawh loh zenzen hang Tedim CCJ khawmpi ah Dr Enno in "Katuntun na ah Zominam ni ka bawlding hi" cih kiciam sak zo ahihi. Malaysia ah GZA khawm pi hun in Dr Cin Sian Pau in"Zomi Makai te cih bangbang mang in kazui dinghi" ci-in kiciamsak leuleu hi.

Kawlgam ah kumpi Thein Sein nangawn in mipi deih na mang in Irrawady gun tui dal pi khawl sak hi. Mipi deihna leh getna bang in gilbeem om ahonhon alomlom in lungnopsuahtak na pia zo ahihi. Hihbang hun in Gilbeem om te nangawm lungdam in awngziahziah in aom hun lai tak in, ih Zogam ah Zomite gilbeem sung om lah hilo suakta tak in Minamni bawl theilo ding tawh kibang ahihi. Mipi gilbeem khuazing sung om te suahtak kipiak laitak hun in Ei Zomi tezong mipi deihna zui in lungnuamtak in MINAMNI hun ah nuih sak hun ahihi.

Kawl mangpa in ami te lungkimsak nuisak ziahziah, Lungdam thu gingziahziah sak a,ahih man mivom mikangte leh Leitung na gawn in kipakta hi. Zo Mang pa in ahih leh amipih aminam nuisakzo nailo,milungdam kohkoh hun in hong kitheih mawh bawl in Zogam munkhat ah zomi hong bu cip sak ahihi.

Hih bang kong gelh khiat na in Kawl gam khua hun kikhelna zui-in mipi deihna kalsuan nop na leh Workshop on Media Development in Democratic Society om zo ahih na zong ahih

Kachin galtaite Huhna (KRRF) kipiakhia ta!

Written by Admin Tuesday, 31 January 2012 18:56

Share8

KACHIN GALTAITE HUHNA ( KRRF) PIAKHIATNA VAI PULAKNA

A tung a thulu tawh kizui-in, abeisa June 7,2011 ni akipan Kawl galkapte le Kachin galkap (KIA) te' kikapna hangin Kachin mipi 60000 kim inn le lo nusia in, singnuai gammual ah galtai/ dongtuak in om cih i theihsa ahi hi. Tua i sanggam dongtuakte Zomi min tawh huh zawhna ding ngaihsutna kinei-in, Zomi bup aitangin World Zomi Congress pan Kachin Refugees Relief Fund Committee kiphuankhia in Innteek semin leitungbup ah tangkona i nei hi. Hih KRRF huhna piakkhiatna tawh kisai anuai abangin tomkim le limlakna (Photo) pawl khat navawh (Attach File) ah muhtheih/ simtheih dingin kong koih uh hi.

Zomi min U leh nau akua maciat in itna le lainatpihna takpi tawh i piakkhiat sum kingah vekpi US$ 13013.95 pen January 28,2012, Saturday ( 6:30PM-8:00PM) sungin Vickery Baptist Church, Dallas, USA ah WZC makaite le KRRF Committee te in Kachin kipawlna makaipite' khut ah piakkhiatna hunpi nuamtak kinei thei hi. Hih bangin mihing genthei, cimawh le dongtuakte huhna ah neihsa sum le paii, tha le ngal akipan lungsim pumpi mahmah tawh mapang Zomite khempeuh WZC pan KRRF Committee min tawh lungdamna lianpi kong pulak uh hi.

Hih bangin Zomite i mapankhop ciangin Pasian hong piak thuphate i zeeksiamna le i kipumkhatna hong kilangkhia ahih manin, tu le atawntung in midangte le i biak Pasian ading nasem khawm zo semsem dingin Topa'n thupha hong pia ciat hen!  Tua bek tham loin, tutung a i mapankhopna tungtawn in namdangte in ZOMI min athak in hong theihpih semsem bek tham loin, i biak Pasian zong lungkim semsem dinga, Zomite thupha ngah minam hong kici semsem ding hi. Minam dangte tung pan huhna a ngenngen minam hi nawn loin, minam dangte tungah huhna a pia zo tawntung dingin Pasian in thupha hong pia behbeh lai ding hi. Nasep hoih sep ding cimtak ngei kei ni.!

KRRF huhna piakkhiat( ap-na) hun sungah WZC pan maikaite le KRRF Committee ahithei teng banah Dallas Zomi pawl khat zong kihelthei hi. I sanggam Kachin Kipawlna lam pan zong a zahtak huai makai thupi vive hong kihelthei uh hi. Sia Mungtawng ( Lasa siam) in hun hong kem ( Chair person) semin Zomi apai teng leh Kachin lam pan hong pai teng tawh, KRRF sumte kipiakkhia ( Ki-ap) ta hi ci in, pulakkhia in khutbetna tawh hun honna kinei hi. Pu Thang Lian (WZC-GS) in WZC dinmun (political stand), KRRF mapanna leh Kachin te leh Kawlte kikal ah Zomite ngaihsutnate a tomkim cing takin pulakna nei in tha kingah mahmah hi.

Tua banah Pu Thang Lian in WZC i dinpih, ngimna le tup bulpite le maban kalsuan zia ding pawl khat anuai a bangin pulakna nei hi.

(a) WZC in Zomite'n a bukim suahtakna ngahtheihna ding hangsan tak le citak takin ka phu ding uh hi.

(b) WZC in Zomite lamsang/ domsang, cing leh kemin, Zomite ngahhuai (rights), kitualvaihawmna leh,mimal tanvo( Rights) ngahna ding kasem ding uh hi.

(c) WZC in Galtai dongtuakte don leh kem in ka honkhia/ panpih ding uh hi.

(d) WZC in Zomite khantoh nang, hauhna , daihna le nopsakna dingin ka sem ding uh hi.

Tua banah KRRF nasepna tawh kisai a genna ah, " sanggam Kachin numei, naupang, pitek, putek dongin Kawl kumpite in cikzia lo takin abawlsiatna le a thahna, inn leh lo suhsiatsakna ,Kachin numeite buanna cihte khempeuh Zomite in Kachin mipite tawh kibangin kong lainatpih, kong thuakpih uh hi. Hih bang a gamtatsia Kawl gamkeekte Zomibup in nasiatak in ka mawhpaih uh hi. Na haksatna uh ka zak uh ciang in WZC in Meeting kinei-in, leitung bup a om Zomite khempeuh kiangah thuzasak in, KRRF min tawh nasep kipankhia hi. Tua banah Kachin te leh Zomite Unau khat hihna thute hangin minam dang bangin ngaihsutna nei loin, sanggam laizom taktak in ngaihsutna kong nei uh hi " cih thute genkhiatna nei hi.

A tawpna ah Kawlgam Union of Burman pen Kachin,Shan,Chin leh Kawlte in,Panglong khawmpi pan kithukimna belpawl gamin dinkhop ding lungkimna hong om ciangin,Union of Burma hong piangkhia ahihna thute gen hi. Tua masiah,ei leh ei ki-uk,kivaihawm thei ziau minamte i hi hi. Tua ahih manin hih Panglong lungsim pua in, minam le gam itna takpi tawh gentheih/ haksatna na thuaknate uh kong lainatpih mahmah uh hi. Tua mah bangin mai lamah ko, Zomite in zong tu aa mah bangin mapankhop theihna khempeuh ah thasial het loin,i ngah ding aa kilawm ngahhuai (Rights) muhmatan no tawh a kibang in kong panpih ding uh hi " ci in gen hi.

KRRF Committee pan Pu Cinpu Zomi (International Co-ordinator) in thugenna aneih khit ciangin KRRF sumte Dallas pan Lia Lalun tawh piakkhiatna nei suak pah uh a,Kachin lam pan Cultural and Traditional Committee pan makaipi huh Sia Htingnan La Sam leh Secretary Sia David Lahtaw te in zong thugenna nei ciat uh hi. Kachin Lam pan Sia David in Kachin galtaite' haksatna leh gamvai a genna ah, " Kachin  dongtuakte pen khawl ding lam manawh nai het loin, tam lam manawh semsem zaw ahih manin, mailam ah zong hahsatna a phu toto lai ding ka hi uh hi. Tutung laizom Zomite in nong huhnate uh dongtuakte ka zaksak uh ciangin lungdamin, thangah mahmah ding uh hi " ci in a thangahna le lungdamkohna thugen hi.

Kachin lam pan Vice President Sia Htingnan La Sam in zong thugenna tomno nei a, " Kachin te in hih banga Kawlgamkek gal ka do uh pen, Kachin mite ading bek hilo in, Kawlgam mualtung mi khempeuh tangin galdo ka hi uh hi. Kawlgam ah Panglong thukimna om ma in ei leh ei asuakta i hi hi. Tua Panglong thukimnate Kawlte in hong awlmawhsak nawn lohna hangin, hih bangin haksatna le buaina kithuak a hihi. Tua ahih manin hih i ngahhuai (rights) te i ngah masiah Kidona tawh kisai kikhawllo ding hi ci in gen hi. Tutung Kachin galtaite vai ah Zomite in nong panpihnate uh Kachin leh Zomite tangthu ah a bei ngei nawnlo dinga, kiphawk tawntung ding ahi hi ci in gen hi. Atawpna ah Dallas khuapi sunga om Vikery Baptist Church ah Pastor Jimmy Gallagner in hunzawhthungetna nei-in, a paikhawm teng khukdinin Kawlgam hoihna ding le Kachin gamah kilemna hong tunna dingin thungetna kinei hi.

Hun man khit ciangin Pu Thanglian te inn, Dallas ah Behte tawh thu tuamtuam holimna leh tutkhopna hun nuamtak neikhawm kik uh hi. Kachin makai lamte in a genna khatah Gam sung a om ka mipihte uh lungdam mahmah hi. Dollor pek khat nangawn mannei mahmah in mikhat zing leh nitak an ding hong lungmuang sak hi ci-in,a lungdamna uh leh i huhna sumte manpha asakna thute gen phapha uh hi. Tua ahih manin, tutung laizom Kachin galtaite i huhna hangin Zomite thupha ngah kipatna le kipumkhat kipatna hi dingin WZC lametna le thungetna ahi hi. Zomite khempeuh Topan hong makaih hen.

Zomi khempeuh tangin,

KRRF Committee,

World Zomi Congress

Headquaters,

Portland, USA