Interview with Pa Suan Pau

Aki gelhni: Tuesday, 10 January 2012 12:34

Agelh: Rev. Paubawi

Bangzahvei kisim: 25

Share

0 Comments

Zomi leh Zogam ading ih muan leh ih suan mahmah ahi PA VUNGH SUAN PAU Managing Director of Hornbill Enterprises Co.,Ltd. Tedim, Zogam Lungdambawl leh Kumthak hun sungJapan ah hong zin thei ahih man in Zo Leen Taang tawh anuai a bangin holimna ki nei thei hi.

ZLT – Papau na min ka na zaza uh aa, tun na mel kong muh theih uh nuam mahmah ungh. Cisaisai leng na tangthu atom thei in nong gen ding ut si ungh e!!
PAPAU – Kei zong ih ki muh theih nuam mahmah ingh. A thuin ci leng kei pen LAILO khua mi ka hi a, Sakollam,Tedim ah ka na teng uh hi. 1985 kumin B.A (History) tawh sang ka man zawh ciang sumzon na sep limtakin ka na sem hi.

ZLT – Pa Pau tutungJapan nong zinna abang zah vei na leh bang ngimna tawh hong zin cih tawh nong gen thei ding maw?
PAPAU – Kalai hong gen thei lua ning. Japan zinding kasawm sau vei hi na pin tutung Pasian lampi honsakna tawh ka zincil na hong suak hi mai cih ding hi. Athuin ci leng tung kong zinna pen Mawtaw vai hi sam na pinJapan gam aom Zomi te tawh ong ki muh theih ka lungdamna lian Topa tung na ko ingh.

ZLT- Tua leh na Company min tawh bang teng sem cih ko theih ding a ki lawm te nong gen thei ding maw?
PAPAU – Athu in ci leng Hornbill Enterprises min tawhIndia pan in Fertilizer (Leiza) kawlgamah puak cih tua na sepleh Hornbill Nursing Home (Zato) tua te gel tu lian in sep lian in na nei ungh.

ZLT – Kailai Papau lung lut huai mahmah si e! Tua leh Tedim ah ZATO (clinic) khat zong nei cih na za ve ungh tua tawh kisai in tawm nong hawmsawn thei ding maw?
PAPAU – A thu in ci leng ka tapa (Dr. Gin Deih Piang)India ah a sang kah lai in Piang aw Siavuan (Medical Doctor) nong suah leh Tedim ah Zato khat hong ni cih ka na kam ciam ngei hi. Pasian in lemsa hi ding hi ven 2008 in ka ta pa inIndia pan MD hong man thei tak pi hi.

ZLT – Tua leh Papau Zato inn ding bang cidan in gel a zang cih tawm hong gen lai ve leh!
PAPAU – 1999 Sakallam mei katna hangin ko inn zong lamkik ding hong hih teh ka lung sim ah ih Pasian hau mahmah cih leh na khempeuh hih thei hi cih kit el cian na khat ka neih ciang tua a inn ana lam zo suak ingh. A zenzen in ka inn kang kei zen leh Zato a ding a lem lo ding tam mahmah ding cih ka mu thei hi.

ZLT – Lungdam huai mah se e Papau. Tua leh Zato tawh ki sai in Siavuan leh Siamah bang zah bangin na sem aa, cina bang zah bang lum thei cih te lung lut huai sa ungh tong gawm nong gen lai diam?
PAPAU ua kim ten– Tu lai tak in Siavuan (Medical Doctor) 3, Siamah (Nurse) 10 leh na sem teng tawh a gawm in 30 bangin a sem uh hi. Tua ban ah a pua lam pan kah OPD ci na ni sim in 30-80 ki kal pha den in asung a lum ngiat pen 35 bang om cih thu hi.

ZLT – Papau aw kana zakna sangun thupi zaw sa ungh. Hih na sep na hangin ih mi pih te in ham phatna ngah mahmah ding cih na tel ungh. Tua banah SING HALH zong nei cih na za ve ungh in bang ngimna nei cih mipi te nong theihsak ding ut lai si ungh.
PAPAU – Hih tawh ki sai in ih Tedim khuakim teng hong keu luat mahmah the guah tui na ngawn hong man lo in tam pi ki lamdanna hong om teh 2004 in Lamzang te gam lo ciing’h 500 val bang ka lei a, Mawtaw lam, mei, phone leh tui zong ka tung sak hi. Tua ban ah hih singhalh te a cingh dingin innkuan 4 inn lamsakin ka om sak hi.

ZLT – Kalai Papau mailam thu na mu khol mahmah cin lungdam huai mahmah sa ingh. Tua banah dam loh vai leh vai pha mawh lam ah zong ma na pang den cih za ve ungh tua tawh ki sai tawm hong hawm sawm lai ve!
PAPAU – 1984 kum a ki pan ka mawtaw neih te tawh Tedim khuasung leh khua ta te dongah dahna kahna ah anei zolo te ka mawtaw mah tawh aki sam bangbangin ka na zang sak hi. Tuaban ah Kawlpi-Mandalay dongah zong aki sapna bangin huh na kana pia hi. Tua hi in hih na sep pen supna in ka na tuat kei a Pasian na sepna in kana ngaih sut the sum ka ki sa kei hi.

ZLT – Aw…. Lamdang na sepna hi. Tua lo adang mi piheih pih khol loh bang na sep sak aom lai a leh?
PAPAU – Pasian heh pihna tawh Tedim khua sung a om Zum teng zong amau ki sapna tawh ki zui in huhna hong ngen te ka hih theih zahzah in na pan pih hing. Tua banah .Tedim tansawm sang (No.1) nung lam ah zong mawtaw lampi khat leh ki mawlna inn kim lei atamkim theih na ding cih na tawh set tawh ka nawt pha sak hi.

ZLT – Papau aw lungdam mahmah ungh. Hih ci bangin ihgam elh ih mipih te ading na neihsa nah un te itsik lo in nasep lianpi nong neih pen ko na ang tang mahmah ungh. Mi ngam it leh Zogam it cih pen nang hi mawk teh. Papau aw topna ding bang nong vaikhak nop aom hiam?
PAPAU –Japan gam sung a om Zomi te’ na han ciamna uh thupi sa mah mah ingh. Hih lai pan na ngah uh pilna leh siamna te uh hun khat ciangin ih gam leh ih mi nam a ding na lian pi a sem zo ding lamet na lian pi kong neih sak hi.

ZLT- Lungdam mahmah ungh hih ci bangin Japan nong zin sung ka mi pih te kiang mah ci-in nong van aa, ho limna ih neih theih ko a ding a man pha mahmah hi. Ih biak Pasian in Zomi leh Zogam ading na ZUA LUNGTUP tui bang hong tung sak ta hen cih thu na ngen ungh.

Interview by:
Rev. K.L. Paubawi, D.Min., Ph.D.
Editor, Zo Leen Taang
Tokyo, Japan

VAI....... INTERVIEW

Inn phawkna La agelh & asa – Vai

Aki gelhni: Monday, 09 January 2012 00:24

Bangzahvei kisim: 506

ZomiDaily :: Ei Zomi sungah lasaksiam leh laphuahsiam tampitak ihneih lakah tutung ZomiDaily ii “Zomi Star” Column ah suahsakding in “Vai” tawh kana kimuthei uhhi. Amahpen “Vai” cihciang bektawh ki tamtheihzaw himah taleh aminpi atheinuam tampi ki omding ahih manin, aminpi tawh kong pholak masading uhhi. Aminpi Vai Suan Lian hi a, Rev. Suan Khen Mung leh Nu Sian Lun Niang te tapa upenpen ahihi.

Vai pen Zomi sungah Alter latawh ihtheih masakpen cilengzong ki khiallo khading hi. Ama laminthang mahmah ahi “Inn” cih lapenzong Album ah akibawl mapek in amin thangkhin hi a, Zomi akua maciat inzong ih bilkha ah aomden lahoih mahmahkhat ahihi. Athu ahoihban ah a laphuahdan, lasakdan mahmahzong midang tawh kibanglo in Pasian in thupha apiakngiat khat ahih banah tulaitak khangnote leh ei Zomi tampitak in ih angtanpih mahmahkhat ahihi.

Vai pen lasaksiam bek hilo in, laphuah zong asiam mahmahkhat ahihi. ZomiDaily tawh kamkupna kaneihkhit uhciangin ama laphuah bekbek dawng 50 bang phakhinta cih katheikhia uh a, ka lungdampih mahmah uhhi. Tua aphuahsa late sungpan pawlkhatbek Album kikhumpan a, tampi takzong ki khumnailo cih Vai in ong genbeh hi. A laphuah a kihelna leh ama lasakna Album enpakleng: “Lai Mai Thak” leh “Na Ma Hong Vang Ding Hi” cihbang in ki muthei hi.

Tulaitak zong Vai in ama Album thakdingkhat a hanciam mahmah laitak hi a, Music khempeuh tumkhinta, asakdingbek kisamlai cihzong ZomiDaily tung onggen theihi. Asawtlo in Album thakkhat ong hawmkhiading nahi gige ahih manin ih ngaklah mahmah hi.

Vai tawh kamkupkhopnadan lianlian in pawlkhat:

ZD: Namin pen banghang in “Vai” bek ci nahia? Minno Nickname adangkhawng na neihia?
Vai: Neimah ing, kaneu akipan ka nulepa in Lianpi ci’n ongsam uh hiven.

ZD: Tua aihleh banghang “Vai” malkhatbek tawh ongkisam ahia? Ahang nonggen theidia?
Vai: Lawmte pawlkhat in “Vai” cihtawh ongsamzaw leh Lianpi cih minzong tampianta ahih ciang a hehehe... (nuikawm in)

ZD: Na laphuahkhit pen tammahmah khintamawk cileng, tuasung pan nadeih penpen?
Vai: Ongsuakding Album thak sungah akihel “Ka Kumpi Nu” cihpen hi.

ZD: Why?
Vai: Hih latawh kisai mikhat ka lungsim sungah om ahih ciang a (ahem...)

ZD: La nasaksa khempeuh lakpan na deihpen eleh?
Vai: Inn lamah hipah.

ZD: Inn lapen ki deihmahmah cileng nangzong naphuah in bang Feeling tawh naphuah aleh?
Vai: Kei innbek ah aomdenkhat upmawhlohpi innpan gamlapi ah katunciang inn ii anopna leh kanu kapa te ii hongkep honghuaina teng athak in phawklua kaihciang a kaphuah hi.

ZD: Aw himaw. Tualeh lasak pen kum bangzah khawngin kipan nahia?
Vai: Keimaw, iiii... Tan 9, Tan 10 pawlpan la uk in, lasak akipan hi’ng.

ZD: Leitungbup hita leh Zomi sungah hitaleh lasasiam nadeih penpen?
Vai: Mr. Big Group te deih mahmah ing.

ZD: Laphuak eleh?
Vai: Mg Mg Zaw Lat siam sa ing.

ZD: Tulaitak nabawlthak Album pen Pasian’ la ahia, Zawlla?
Vai: Zawlla Love Song lam hizaw.

ZD: Love Song phuakin sa cilengbel lawmngaih tawh na lungtang kitam (heartbreak) khawng aom ngeihia?
Vai: (zumpipi in) hehehe khatvei bel...

ZD : Hih bang a minthang lasiam laphuah tawh mi hong theih khat na hihna pen bang hang a ki
um mawh na?
Vai: La tawh kisaibel uk mahmah, hanciam mahmah ing. Tuaban ah ka Pa pen aneutung akipan la uk mahmah leh Music uk mahmahkhat ana hihna tawh keizong tua sisan mah om ahihman hi’nteh. Hihdan a mihongtheih dinginbel ki lamen ngamngei kei-ing, ahihhang Pasian hehpihna hang hizaw.

ZD: Tualeh na neu akipan na sunmang e?
Vai: Engineer (Design) lam hi.

ZD: Na lungsim hong siangthosak, hong nuamsakthei mahmahkhat e leh?
Vai: Video etmah hipen…

ZD: Na Crazy mahmah vankhat…?
Vai: ROMP Jean

ZD: Zomi te La leh Music tawh kisai namuhna eleh?
Vai: Zomi sungahbel La tawh kisai ih theihna, ih siamna tampi kisamlai in mu ing. Kei akipan…

ZD: Tulaitak na gennop velvel thukhat hong kidongleh?
Vai: Na ngaklai un (innkuan pihte tungah)…

ZD: Tualeh ZomiDaily ah onghawh Zomi te tungah na hawhsawnnop aom hia?
Vai: Hih ZomiDaily ong phuankhia te akipan ma apangkhawm leh asim mimalkim tetung ah lungdam mahmah ing. Mailam ahzong mapang khawm laini…

CIN PI INTERVIEW

Bass Cinpi (Lazy Club) tawh holimna

Last Updated on Thursday, 02 June 2011 11:48 Written by Admin Saturday, 28 May 2011 17:11

Share

Kawlgam ah Tumging (Music) lamah minthangte' sungah akihel khat ahi Lazy Club tumging pawlte Bass a tum Pu Gin Suan Cin (a) Cinpi le Chin World Mediate holimna tulaitak le mai lam khangnote in etteh theih dingin deihsakna tawh Tongsan pan Zolai ah lek khia in kong suaksak uh hi.

C W:  Guitar tawh na nuntak zia akipatna pan tawm nong gen thei diam U Cinpi?
Cinpi: Midangte zong hanciamna mah tawh kipan hi cih hanciamna lungsim nei hi mai ing.

C W:  Guitar siam khat hihna dingin bang tengin hong tawsawn penpen ahia le? 
Cinpi: A masa penin Pasian, innkuanpihte, hong hilh Siate, naseppih lawm le gualte akipan hanciamna ,cihtakna le thuakzawhna cihte thupi pen sa ing.

C W :  Hong hilh hong pantah Siate kua bangbang ahia le U Cinpi?
Cinpi:  Ka siate pen Ko Eddy Kyaw (Pin Oo Lwin) , Pu Zalian, hong musak siate bel tampi mah cih ding hi.

C W :  Guitar na kipatcil le tulaitak na muhna dan tawm nong gen thei diam?
Cinpi:  Guitar pen uk lua hi mai ing. A kipatcil lam le tulaitak ka uk zia kibang den lel hi.

C W :  Lazy Club a pankhia khat na hihna tawh kizui-in, Lazy Club tangthu tom nong gen thei diam?
Cinpi:  1989 kim pawlin Lazy cih ding ka neu lawmte tawh phuak khin hi ung. Maung Maung (Lead), Ma Rakhin ( Drum), Ohkaota ( Keyboard), Cinpi (Bass), Ko Moe Naing ( Rhytm), Tulaitak Guitar friend, Vocal pen Thura-Cencury, cihte tawh kipankhia hi ung. 1994 Kawl tuibuah pawi in Naing Zaw, 2008 in Okka Ota tangin Myo Zaw City labeh ung.

C W :  Lazy Club na kipat cil lai un, Music group ciang bek ngimna bek mah maw?
Cinpi:  Ka kipatcil un lawmte tawh gualnopna ciang bek mah tawh kipankhia hi mai ungin, tu lamlam ciangin nuntakpih ding nasep (Professional) khat hong suak hi.

C W :  Cinpi cih min koici bang a hong minthang khia thei ahia le?
Cinpi: Gen ding tampi om in, a bulpi ah Pasian thupha taktak hi.

C W :  Guitar tum bek mah ukna nei maw adangdang zong nei na hia?
Cinpi:  Lasak zong uk mahmah lel ing. 1992 kumin khui bawl ngei ingin, thu tuamtuam hang tawh hawmkhia zolo suak ing.

C W :  Studio na khumna tawh kisai amasa pen na tuahkhak thute tawm nong gen diam?
Cinpi:  Studio ah tum cil lai pen ciling gawpin, lawmte tawh bel nuam kisa mahmah hi mai. 

C W :  Salai Zalian pen Bass siapi khatin Guitar bass siam tampi in adeih ciat uh hi. Midang bass siamte tawh koici bangin mu na hia?
Cinpi: Salai Zalian pen a tum siam, laisim hatna le siamna tuamtuam ah thupi sa mahmah ing.

C W :  Tuhun khangthakte' Guitar tum zia tawh kisai U Cinpi muhna nong gen thei diam?
Cinpi:  Siam sa thei mahmah ing. Tuhun khangnote siamna Reason? Idiot cihte deih ing.

C W :  Music siamna (Artist) khat pen gam mite ading bek a ci lah om ee,, pawl khatte in lah  amau ading bek a ci lah om ahih teh nang bangci muhna hia? Cinpi:  Music siamna i cih pen kei muhna ah mi khempeuh ading in sang thei ing.

C W:   Kawlgam ah G-3 le Solo Show cihte tuhun kihih zo ding na lamen hiam?
Cinpi: Um mah ing. Ko Zaw Myo Htut ( Mizzima Hlaing),le Ko Zaw Myo Htut ( Emperor), Boy , Yan Naing, Yawng Latt te in Album khat bawl cih za ing.

C W : Kum 10 lomkhat nih sung bang Music nasem khat na hihna sungah na mangngilh theih loh diak na nei hia?
Cinpi: Tua bang a lamdang lua om tuan kei. Ka tum khitsa Albumte mipite in deih bilbel ahih manin ka lungdam mahmah hi.

C W : Guitar pilna/siamna tawh kisai na muh zia tawm nong gen thei diam?
Cinpi: Leibupbul level ah Music pilna pen kithupisak mahmah in Subject khatin kisin hamtang hi. Ei gam ah bel ei le ei hanciamna ciang hi mai hi. Sangah ahi a, biakna sangte ah limtak kisinsak ding deih huai sa mahmah ing.

C W :  Tongsan Media tungtawn in Zomite khangnote na vaikhaknop om diam?
Cinpi:  Mai lamah Zomi guitar siam tampi piankhiat lai ding khangnote hanciam semsem ding cih vaikhak nuam ing.

C W:  Holim hun nong piak manin lungdamna mahmah ung. Music siamna tawh Pasian min thang sak semsem dingin Zomite Pasian in thupha hong pia hen.
Cinpi: Kei zong ka lungdam peuh mah ei.

TUN TUN INTERVIEW

Tun Tun tawh Holimna

20:50

Share

Tongsan le Tun Tun (IC) Holimna

Pasian nasem dinga kipiakhia Kawlgam lasa minthang Tun Tun (Iron Cross) le alawmpa Sia Tun Naing-te San Antonio, Texas,USA ah hawh uh a, lametlohpi ong baang thei uha, San Antonio khua aa om Kawlgam pan gambel minam tuamtuamte tungah Pasian thu limci tuamtuam tawh hanthotna pia thei hi.

San Antonio khua aa inntek bul khat ahi Pa Billy Kampi ( International Tongsan Consultant, Texas) vaihawm siamna tawh Sia Kimpi (Tongsan Tanupi) tawh kithuah in Starbucks karfi sai khatah Tun Tun holimpihna (interview) hun tomno khat kineihpih thei hi.

(Theih Ding: Holimna pen Kawlpau akilawm bangin Zopau tawh kiletkhiakik ahi hi)

Tongsan Reporter: Amasain San Antonio, Texas, khua ah Pasian lamlahna tawh lametlohpi in no tegel ong puak thei ahimanin Topa min i phat-a hih tenga om Kawlgam mite tawh akibang lungdam takin kong muak hi. Hih khua nong tam sungin hih khua aa omte bek hilo mun dang gam dang aa omte in zong na teci pannate tungtawnin tha alak theih nadingun hawmkhawm thei dingin holimna hun pha nong piak manin lungdam mahmah ing ei, Sia.

-Amasain na tangthu atomin nong gen thei dia, Sia?

Sia Tun Tun: Aw, he. Kei pen 18 Dec 1968 ni in Insein, Zangkong ah suak ing. Unau 5 ka phakna sung vuah kei bek inn aa suak hingin adang teng zato ah asuak vive uhi. Ka pu ka pa hun lai aa akikhop denna uh ahi Insein Yuama Baptist Church mah ah biakinn na kah ingin, 1990 kum in ah Iron Cross tumging siamte tawh kithuahin la ka na sa hi. Tua khit ciangin 1994-95 kum in ka la khui masa pen bawlkhia zo in tua tawh lasakna lamah lawhcing bilbel ing. 2003 in Los Angeles, USA, ka tunga 2007 kum sungin alamdang taka Pasian lamlahna tawh ka nuntakna ong kikhel mawk hi. Tua akipan ka nuntakna sungah Pasian ong teng tatak-a tudong mah ahi hi.

TSR: Lungdam ei, Sia. Pupa hun pek-a biakinn pai ci leng na pu na pate zong thu-ummi mah hi ve uh?

STT: Hi mah. Kei theih ciangciang ka pu le pite pen Christian na hi uhi. Sia U Tin Maung Tun, Sia Tin Maung Nyo, Sia U Myo Chit cihte pawl zong ka nu lampan kinaipihte vive uhi.

TSR: Kawlgam ah na om laiin Pasian phatna la tuamtuam na sa-a, ahizong 2007 kum ciang nuntakna kikhel ing ci leuleu cin, akoici banga tua hun lai Pasian la na khum lai in na nuntakna dan ong gen pak ve.

STT: Dena kong gen bang hi. Kei pen khanggui zom Christian khat ka hi hi. Ka neu lai in Christian ka hi-a biakinn khawng kahin la zong ka sa thei zel hi. Lasa minthang ka suah ciang zong la sa ding ong kisam, kicial bangbangin ka sa, ka huh hi. Ahizongin tua banga phatna late ka saksak hangin ka nuntakna bel atuampi khat na na hi hi. I gen zelsa mah bangin khanggui zom tapidaw ka hi lel-a ka nuntakna in ahih leh lawki mite tawh kibang ahi hi. Amau mah bangin zu ka dawn, zatui ka zangh, amau hih hih ka hih lel hi.

TSR: Lungdam ei, Sia. Na innkuan sung vai tawmkhat nong gen thei lai diam?

STT: Hoih ei. 1995 kum in Leh Leh Wai tawh ka kiteng uhi. Amah pen Kyaukkong aa Kanbeh Baptist Church pan hi. Tua hun lai in MBC pan akikhahkhia Chindwin mission sungah zong akihel ngei khat hi. Kei ka hih leh ka siapa ahi tulaitak aa Australia aa om Sia Zaw Win in Kanbeh ah Gupna Thu tentan khat bawl sawm-a la sa ding, la hilh dingin kei ong sam hi. Tua ka zuihna panin ka zi ding tawh akimu ka hi uhi. Tun Pasian ong piak von 3 ka nei uha John Tun, 14, Angel Tun, 12, le Julia Tun, 9,-te hi uha Alhambra City ah ka innkuan un ka om uhi.

TSR: Lungdam zel ei le, Sia. Tun ah US na tun zawh  2007 kum in alamdang takin na nuntakna ong kikhel hi, ci naihteh, tua kikhelna tawh kisai atomin nong gen thei lai dia?

STT: Aw, hi mah. 2003 aa (US) tung. ka tun akipan senpi vetlo hi'ng. Innkuan sung zong senpilo. Om dan, khawl dan zong lemlo. Kei pen la bek asa thei pa ka hi-a vaite ong senpiloh takteh kei zong suahtakna ding lampi ka zonga zu le zatui ah ka tung hi. Sun le zan in zu ka dawna zatui ka zangh toto hi. ( Zop lai ding)

ZEN LIAN INTERVIEW

Tg. Zenlian tawh Holimn

Share

Zomi sungah guitar siamte sungah a minthang khat ahi Tg. Zen Lian pen abeisa 1993 pan 2000 kikal sungah Zomi Album kibawl teng 98% banah guitar atum sak khin khat ahi hi. Tua banah Kawlgam a guitar siam minthang Aces Band te' bassist KAM ZA LIAN i khut nuai pan Guitar asinna pan akhangkhia to ahi hi. Tu laitak in US ah om in leitungbup Zomite sungah guitar siam Zen Lian cih in kithei ta hi.

Tg. Zen Lian i tangthu leh a guitar siamna akipatkhiat zia cihte tulai khangthak Music lunglute in a etteh theih ding deihna tawh ZomiOnline (ZOL) te in Tg. Zen Lian tawh aholimna (Interview) anuai a bangin Tongsan tanute in kong khah khia sawn uh hi.

ZOL: Pu Zen Lian, nang toh ZogamOnline houlim thei ding i hih man lungdam hi. ZogamOnline na veh ngei hia?

ZLT: Kei zong lung dam mahmah ing. www.ZogamOnline.com en zel mah ing ei. Hoih sa mahmah ing.

ZOL: Nang n’ong kigen masa diam?

ZLT: Aw. Kei ka min Zen Lian Thang hi. Ka pa Rev. Dr.Go Za Kham, ka nu Siamah Ngan Foong hi. Unau pasal 6 leh numei khat sung pan a neupen ka hi hi. Ka suahna pen Leilum,Tedim hi-in, 1987 kum a kipan Rangoon ah om, 2001 January pan Great Britain England ah, 2005 March pan United State ah ka om hi.

Education lam pen Rangoon University ah (B.A Geography 3rd year ciang kah, Information Technology Skill lam pan COMPtIA A+ certified COMPTIA SECURITY Certified, Microsoft certified Server Engineer laivuan ka kigin lai tak hi.

Pawlpi pan in, Evangelical Baptist Church(E.B.C), pawlpi mi ka hi hi.

ZOL: Na hobbies…

ZLT: Music, Laisim, Lawmte tawh thu kikum khawm leh nui khawm.

ZOL: Music lam bangchi dan a ana lunglut kha?

ZLT: Inn Kuan sung pan ki pan. Ka U te in music uk uh a hih manin kei zong hong lawh to hi dingin um ing.

ZOL: Kum bangzah na phakin guitar na tum thei?

ZLT: Kum 3 leh alang pawl ka phak ciang guitar tum theita ing.

ZOL: Mipi ma a na tum masakna pen..

ZLT: Ka kum zah lian bel thei nawn kei ing in, Biakinn bang ah bel kum 11 kim pawl a hi tam maw.

ZOL: Guitar ah kua in hong influence ahia?

ZLT: Influence.. Tu laitak Jeffbeck, Chet Atkin, B B King, Eric Johnson ka maturity tawh kisai in kikhel zel.

ZOL: Zen Lian i chih chiangin LEAD guitar lungsim ah hong lut pah hi. LEAD kia tum na hi hia?

ZLT: A tam zaw pen Lead guitar tum ing, ahihhang Bass zong U.S ka tun khit ciang a kisap nak leh tum ing. Keyboard pen Kawlgam ka om lai in tum ing in, professionally in album (2) sung ah tum ing.

ZOL: Bangbang band ah na kihel ngei a?

ZLT: 1993 in HornBills ah tum masa ing.Tua khit ciang Session in tum in, tawm vei sung ka lawmte tawh ki pawl in Friends Acomppaniment cih min tawh kawl la pawl khat tum ing.

U.S ah Christ Church (Bethesda) Praise Band ah Bass tum, A.M.E (Baltimore, MD) te project ah Lead guitar

ZOL: Bangbang Zomi album ah music na tum ngei a?

ZLT: 1993 pan 2000 sung aa a ki hawm khia Zomi album 98% bang ah ka ki hel kha hi.

ZOL: Guitar compettition ah na tel ngei hia?

ZLT: Kei hun lai in Guitar compettition khat vei zong omngei nai kei, khat vei zong kidem ngei keng.

ZOL: Concert na kihel khakna koi nuamsa pen?

ZLT: A taktak pen nih hi ding hi. 1997 kum kawlgam aa Karen minamte kumthak pawi Phadu khua ah a tum ding in hong cial uh, mipi 5000 bang tawh la sa khawm, a kam uh tawh guitar solo bang hong tum pih uh, tua pen a gam lum lam pan a nuam pen khat sa ing.

2003 kum East London Woolwhich Threater ah Christian Band minthang teng in concert pi khat nei in, tua sung ah Next Movements Band ten hong cial in, tua show zong a gam dai lam pan nuam ka sa mahmah aa, tu dong mah ka phawk phawk lai hi.

ZOL: Zomi sung ah kua guitar siam nasa pen?

Zomi sung ah Guitar Siam mi hong om ta hi. India lam pan in Pu Go Hau siam mahmah hi. Kawlgam lam pan khang thak sung pan Pu.E Tuang siam mahmah hi. A dang a siam tampi om lai in teh.

ZOL: Kawlgam sung leh kawlgam pua ah la?

ZLT: Kawlgam pan pen Moe Kyaw (RIP), Han Ngwe Thun, Chit San Maung tua siamsa pha diak ing. Kawlgam pua lam pan, internationally in, Jeffbeck guitar siam dan pen tuni dong mah lamdang sa lai ing.

ZOL: US bang chi tunkhak na hia?

ZLT: U.S pen England pan a pai suak hing.

ZOL: Tu’n US ah bang nna sem?

ZLT: Ka part time nasep pen Music tum mah hi. Ka main job pen na sep a zong2 lai hi ing. Information technology lam hi.

ZOL: Zomi music siam khat a dingin US ah bang opportunity om ahia?

ZLT: Hih dawtna pen zai mah mah hi. Ka siam tawp in hong dawng ning. Hihteng aa te tawh siamna kikim nak leh ki vakkhop theih phial na ding oppotunity om hi. Local music agencies te tawh ki zom leng music sep na ding om thei hi.(hih pen Events hi) Ih omna state, innteek dong om in, lawm leh gual i hauh nak leh nasep ding om thei hi.

ZOL: Kawlgam ah la?

ZLT: Kawlgam ah pen major band nih leh tum aa ding in hoih den hi na pi in, major band a a ki hello t’a ding ki nungta zo a hihhang khat veivei hak sa thei hi.

ZOL: Zomite international music scene a kilang pha dingin na mu hia?

ZLT: Tu laitak lian pen, international scene ah haksa lai in the. Ahihhang a piang thei lo bel hi kei. Ni tumna gam lam ah pen, midangte tawh a ki banglo music tuam vilvel khat (or) style tuam vilvel khat na bawl zawh leh tua in international scene hong tung sak ding hi.

ZOL: Bang brand guitar hoih nasa pen?

ZLT: Guitar brand pen tam simsim tum ta ing. Ernieball Musicman te guitar bawlte hoih sa deuh ing.

ZOL: Kawlgam khonga musical instruments, sound system na zatte uh toh US khong ate a kikhai hia?

ZLT: Kawlgam ka om lai aa ka vanzatte uh pen hih teng ah ki zang zo lo hi. Tam man lua hi. Kei aa ding in kawlgam aa ka van zatte pen na hoih mahmah lel hi.

ZOL: Kawlgam kik na sawm hiam?

ZLT: Ciah kik sawm mah ing.

ZOL: India gam na zinta hia?

ZLT: India gam pen ka ut sawt napi tung zo nai ke’ng.

ZOL: India a kipan Zomi album bangbang na ngai kha? Na muhdan..

ZLT: Zomi album pan in Niang Bawi (Gloria)la te ngai zeel ing. A aw hoih mahmah, aw pi nei, a lamal leh a aw pen ki connect sak mahmah hi. A mah bang la siam ih neih Ei Zomi te aa ding in ki paakhuai mahmah hi.

ZOL: Zosuante lak ah kuate misic lam a sangpen in na mu? La sak lam ah la?

ZLT: La sakna lam ah, hun lui lai in sanggam Mizo te pen la siam sa ing. Tu hun ciang Zomite mah siam zawta ka sa hi. Khang Thak pan Gloria Ciin Lian Niang, ZamNu te, a lui sung pan Esther Cing San, Lian Sen, NoPi (Zo Pa Tong), Lia Lian cih bang Pasal ah TaangKo Tua Mung, PauNo, ThawnKham, kawl la sa SangPi - hihte pen lasiam taktak mah ka sa hi.

ZOL: Lasak zong siam ding hive teh aw..

ZLT: La bel sa sam ing in, guitar tum lam ki pia zaw ing. Kawl la album 5 khawng ah harmony arrangement bawl leh a harmony sa ngei ing.

ZOL: La phuah la?

ZLT: La phuak zong ka hih theih nop mahmah khat hi mah, dawng 5 khawng phuak ngei ing in, ThawnKham bek in za ngei in teh.

ZOL: Tangval lai himah teh maw?

ZLT: Tang val lai ing.

ZOL: Nungak tam mah in teh maw?

ZLT: Nu ngak bel tam in, kei aa ding tam nai lo hih tuak ei. Ha ha ha.

ZOL: Hahaha. Dawng siam mahmah chiai. Khangthak music ukte bang na advice nuam a?

ZLT: Advice maw..

(1).Basic pen na up mawh zah sangin na thupi zaw den ding hi. A Basic teng a zawh mah2 na ding han ciam in.

(2)Chord nam tampi tak theih ban ah, Chord voicing lim takin zong in.

(3)Music style khat bek tung ah ding lua ken, Music style pen kum 10 ciang a dang khat hong piang lel ding hi.

(4) Tu hun internet panin guitar sin theih na leh guitar tum dan a tuamtuam baih takin ki mu theita a hih manin lung kiat na ding om lo hi.

(5)Guitar na kisin nak leh achievement goal khat nei den in.

(6)Na khutme bek ki sin ken. Na khuak zong thu ngaih sun sak le cin tam pi tak a zai zaw in mu ni teh.

(7)Lung duai ding, lawp bawl lua lo ding, nisim in ki sin ding.

(8)Nang sang aa a siam zaw na sakte tawh tum khawm (Jam) ding, midang a tam thei thei tawh tum khawm ding.

Thu tampi tak om taleh hih a tung aa teng bang kei aa ding thupi ka sak pen hi.

ZOL: Dotkhak louh gennop na nei hia?

ZLT: Dawt khak loh gen nop, MUSIC PRODUCTION vai ah.. Nung aa Pu Go Hau na interview na uh ka sim kha aa ,La Album 1 pen ni khat peuh tawh ih bawl cih hong gen hi. Pawl khat in a market neu lua hong ci pah kha ding hi. Market zai ih deih leh mi deih, music hoih mahmah ih bawl kul ding hi.

Ei ZOMI te pen La phuaksiam, Lasak siam, a tumsiam chih bang ki om kawi kawi ta hi. La ih khum ding ciang in attitude ih khelkulta ding hi. La khat a piang thei ciang aa ih ngaihsut ding hun hi nawn lo in, la hoih khat baih tak aa a ki zuak ziau thei, a ki khawng ziau ding in ih ngaihsut kul ta ding hi.

A piang thei ciang pen mang ten DEMO ci in, tua pen raw material level mah ah om lai gige hi. Kei bang kawlgam ah 24 tracks bang tawh ka khum ciang Guitar nai 10, Keyboards nai 10, drums & Bass 20 cih bang in ka khum mah uh hi. Mi pawl khatte’n a track tam leh a hoih pah ziau ding sa kha in, a track tam pen tampi tak kithuap thei cih na hi. 24 tracks aa ding in nai 10 pen tawm lua mahmah hi. Kawlte nangawn in hun la in la khum buang ta sam uh hi.

Tu hun, Zomite in la ih bawl ciang in plan khat nei ta ni. Tua khit ciang ih kiim ih paam ah bang la te minthang, mite in sa aa hoih, ken sa leng a hoih veve diam cih dan. Kei la sak pen tua ci pian cih dan ki sittel kul pianta mawk hi. A kipat aa kipan in post production dong ngaih sun khol, gel khol in gamta leng vai hawm hong nuam in, music hoih hong piang thei zaw ding hi. Nawhtat gawp leh gim khit nung aa music na seppen a result hoih lua ngei lo hi.

Tua a hih man in ih music market khan ni in, ih ngaihsutna leh ih zat den ngeina pawl khat ih khel ding hun hong tungta hi. Tua hileh ih muh kholh loh, theihkholh loh hamphatna tampi ngah ding hi hang.

ZOL: Hilua ei. Zomite a dinga phatuam nong genkhiak thupi mahmah hi. Na musical career ah bang na angtang pen a?
ZLT: 2003 kum mah in, London Royal Academy of Music sang ah music tum ding in ka lawm ten hong zawn in, ka lau peuhmah hi. Uk mahmah ka hih manin ka pai gemgam aa, Jazz Music bekbek kitum in siam thei taktak mah ka sa hi. Kawl gam ah Jazz music lam ah hong ki muang pawl ahihhang in, tuate aa te tawh teh ding in kei aa pen hong neu lua mahmah hi. Ka lawmte tawh ka et kawmkawm un Blue's Jazz lam tum ni ci in ka thu ka khel kik uh hi. Instrumental Improvisation dawng 4 khawng ka tum uh hi. La dawng khat ta ka man sim un mipite hong ding in khut hong bet ziahziah pen lamdang ka sa mahmah aa, ka nuntak sung ah ka aangtang ni khat hong suak hi.

ZOL: Music a Professional na hihma in bang tupna, ngimna na nei a?
ZLT: Kei kipat chil lai-in chi leng Guitar siam sunsunte pen zatui zang ding leh zuu khamkham den ding in ki um in kuamah nu-leh-pa peuhmahin a tate guitar siamding deihsak lo hi. Kei hanciamna ah - Music siamte miten a zahtak, a hih thopthop louh na ding, Music siamna tawh sum-leh-pai tampi pi zong zo ding, mite muan theih mi khat suak ding cih pen ka mission ahi hi.

ZOL: A turn out la, a hoih hia leh?
ZLT: Atung lam teng bel mite in kiphasak hongsak tuak sa ing, anung lam ciang bel ka ngimna tangtungta ki ci thei phial ing.

ZOL: Professional musician khat na hihna a na theihkhiak/na muhkhiak nong share thei diam?
ZLT: Musician pen modern culture a dingin mun khat ah panmun ana la gige hi mawk sa ing. Example Lengtong Pauno minthan cil lai-in ci leng ih gam ih lei teng ah sen or shan aw nam musicte hong ging keei hi. Thawn Kham hong than leuleu ciang in PoP music teng tawh ih gam ki zeel hi. America bang ah ci leng traffic light ah khawl leng HipHop musicte ging ziahziah hi. Hihte pen modern culture taktak hi.

Tua ahihman in ei musiciante in, music ih bawl ciangin tu a sanga a zai zaw in thu ih ngaihsut mahmah ding kisamta hi. Na nung ah culture in hong nungzuih hi.

ZOL: Na hun manpha nong piak man kipak lua ung. Mailam ah lohchinna leh khansauna kong deihsak uhi. Lungdam mahmah ung.

ZLT: Kei zong lungdam lua ing. Topa in thu pha hong pia ta hen.

INTERVIEW

Ngabeng te tawh Holimna

Last Updated on Friday, 04 November 2011 23:23 Written by Admin Monday, 31 October 2011 19:41

Share

Zomite sungah Pasian huhna tawh lasa siam  tuamtuam ahi Solo, Duet, Trio le Quatet cihte ah lasa siam a khangkhang in om kiukiu ta hi. A diakdiak in Pasian phatna (Gospel) tawh Zomite sungah Pasian hong zatsak ahi mi 4 lasakna ( Quatet) lasasiam "  Nga Beng te - Fisher Quatet " kici pawlte' lasak zawh (kum 25) cin phawkna October 20,2011 ni/in Agape  AG biakinn , Kawlpi ah Tongsan Media Group min tawh October 20,2011 ni-in holimpihna ( Interview) limcitak kineihpih hi.

Tongsan :  Amasa in Ngabeng lasate hong piankhiatna thu tomkim nong gen thei ding uh hiam?
Ngabeng :  Ngabeng lasate min hong piankhiatna pen abeisa 1986 kumin Sia Suantawng tawh lasakpih ding lawm zong ding Phaiza ah ka pai uh hi. Pasian geelsakna mah tawh Sia Sianpau le Sia Nenglian tawh kimu thei/in lasakna kipan thei hi ung. Sia Neng Lian pen ahun hong pia zo nawn loin singtang vakin sum zong hi. A hi zongin a mah tawh kum 10 sung bang kithuah man veve ung. Amah hong lem theih nawn loh ciangin Sia Khen Mang tawh tuni dong kikhawl to hi ung. Ka kipat kum lian uh pen 1986 kum hipah hi.

Hih bang a ka kipatkhit uh ciangin, lasak kipawlna min ding zong kingaihsun toto in, abeisa hun khat lai-in i pawlpi sung ciatah lasakna pen cimphawng le mipi ngakna dan bekin kingaihsun hi. Ahi ding zah le aman takin akisakloh ciangin Pasian min phatna la hi buang si, la mahmah ama hihna a kilang khiasak zo ahimanin Sia Khaino tawh kikupna tungtawnin hih Ngabeng kipawlna hong piang khia hi.

Tongsan  : Ngabeng lasa pawl in na Ngimna le tupna uh tomkim nong gen thei ding uh hia?
Ngabeng : Ngimna le tupna bulpite pen anuai abang teng hi.
(1) Pasian pahtawi theihna ding,
(2) I minam sungah La aw kim tawh Pasian min phatnopna le Khangthakte sungah aw kim tawh lasak kipawlkhop theih semsemna ding.
(3) La sakna/ phatna hang a suahtakna le gualzawhna, damna cihte om theihna ding.

Phatna lasakna i cih pen Pasian nasepna hi a, Lai Siangtho sung bang i et tak teh lasakna hanga Khaninte taikhia, lasakna hanga Pasian vangliatna Kha Siangtho a kilatnate kimu thei hi. Nidang in pulpit zepna bek le Sermon huhna bekin la kisa a, la i cih pen pulpit zepna bek hiloin Pasian phatna ah panmun lianpi taka om ahihna i mipihte’n hong theihna ding deihna bulpi kinei hi.

Tongsan : Ngabeng min tawh khui (Series) bang zah bawl khin?
Ngabeng: Series 7/8 ciang tungta ung. Series 1-2 na pen Sia Mungtawng in hong bawl sak. Series 3-4 na pen Mandalay EZBC pawlpite in hong bawlsak hi.

Tongsan  : Na lasakte uh le la awte nomau bawl (Own tune) vive mah ahia ?
Ngabeng : Hi kei...Mangla pan kilet veve hi. Tualsung suak sangin Mangla pan akila hizaw hi. A diakdiak in hong nusia khin Sia Lianbawi i bawl Agape labu sunga te ka sak kik uh tam zaw hi.

Tongsan : Pasian le Zomi ading a beisa le tulaitak nasepnate’nong gen thei uh dia?
Ngabeng : Ngabeng min tawh Zomi tangin Pasian nasepna tavuan hong kipiakna cih lian a om loh hangin, Mipite deihsakna mah tawh gam sung ah pawlpi deisan het loin, hong kisapna le kideihna peuhah kihelden ung. A diakdiak in gampua lam Zomite omna ahi Singapore, Malay khawng hong kisaptak ciang ko le ko i mipih tangin nasem bangin kingaihsun in angtang mahmah ung. A beisa April/ May 2005 kum Singapore a hong kisap laitak bang in eimite hilo, pau zong kithei loin lasakna ka va nei uh a, minam aitang mahin ki angtang mahmah hi ung. Tua bangte zong lamdang kasak mahmah uh thu khat ahi hi.

Tongsan: Ngabeng kum 25 cinna ah Live show nasiatakin abawl dingin hong kilamenna pi'n, Live show bawl loin, Pawlpi tuamtuam vak kawikawi zaw na hi uh hiam?
Ngabeng: Ko ngaihsutna zongah Agape biakinn mah zangin live show bawl ding ka cih mah uh hi ven, kote lakah Sia honkhat nei kai vevua. Tua ka Siate uh pen Sai Zambawi (Dr.), Sia Go Nang, Sia Daniel, David Sum, Sia Mungtawng le Sia Mangpute pen ko ading hong panpih mahmah Siate ahi hi. A mau hong genpihna ah, " Hih bangin live show bawl le uh cin, mi tam hong pai zolo dinga, tam hong pai zawh mahmah le 1000, 2000 ciang hibek ding hi. I Zomite lakah hong lungdampih mi tam mahmah ding ai teh pawl tuamtuam hong sik le uh teh muibun zaw ding hi " hong cihna tawh kizui in Live Show bawl ding sangin mipi tampi tawh lungdam khawm thei zaw ding cih amau ii ngaihsutpiakna tawh Pawlpi tuamtuam akipai hizaw mai hi.

Tongsan  : Hih na lasakna tungtawn un a piangthak, damna ngah le na lamdang piang cihte a om ngei hiam?
Ngabeng : Om mah ei. A sazian in bel ciamteh lian kei ung. " Zeisu in hong lawng hi " cih la bang kasak uh ciangin mipite lakah natna neite kiangah a natna uh lawngsak in, Zeisu hong lawn ding na lunggulh uh leh Topa’n hong damsak takpi ding hi ci-in la kasak uh ciang, hih la tungtawn a damna ngah, teci pang tampitak om hi. Pasian in lamalte mahmah zong thupha pia mahmah hi.

Tongsan : Lasa in na zinna uh khua bangzah apha diam?
Ngabeng: Khua 200 val ah pai khin ung. Pawlpi deidanna om loin hong kideihna khempeuh ah kipai, kisasa mai hi. Nunga la hong khumsak Tual Lian Tung bang UPC pawlpi aive ... Banghang AG papite lasak peuh khum nuam si teh ka cih leh kei tembaw tungah no late ka zak pan kipan hihte tawh kikhawlin khui khumsak ding cih ka thunget zawh kum 2 hong phata hi. Cihnopna ah AG bek hipeuh mahlo, Tuiphum, EBC, UPC Pawlpi deidan cih bang nei vet kei ung. Mandalay Sevenday te bang in lasa hong samin nekkhawm tawh kituak ahih cianga kikhop man ciang khe bang kisilsak ngeingai ung he..he..he..he..

Tongsan : No teng pen Pawlpi kem Sia vive cileng na pawl uh le upate in hih banga na zin kawikawina hangin kitelkhialna, paubanna cihte a om ngei hia?
Ngabeng : Pasian min tawh hih bang vai na hawm uh leh Pasian min tawh lunghiang lo takin suaktatakin pai un ci-in lungkimna bang pawlpi laibupi sungah hong ciapteh sak uh ee...Phallo cih thadah kuama saploh Sia i neih sang mi sapnop Sia i neih angtang hang ci-in
lungdam lua ung ci veh ee...

Tongsan :  Music Band tawh lasakna thupi nasa uh hiam?
Ngabeng : Thupi sa mahmah ung. Mite in harmony tawh lasak pen kilunggulh nawn lo e maw... Solo cihte peuh tulai pau leh galkap lasak beka kisa lanlan nuam ta hi. Bangbang ahi zongin aw kim tawh lasakna pen thupilua mahmah hi. Tua ahimanin mi 4 hipah phot in, mi 1 sang mi 4 cih pen kipumkhatna om zaw hipah hi. Mi khat bek lasak sang nih hoihzaw, nih sangin thum hoihzaw sem, 3 sang 4 hoih kankan a, kipumkhatna zong hong lak hilo hiam cici kai vevua. Sia Khaino bang bel a cinatna pan lasakna tungtawnin damna a ngah ngiat hi ei. Tua ahimanin lasakna pen cidamna zong hi. A lungkhamte ading zong lungnopna zong lah hi. Lasakna bel a thupi mahmah hi. Ko mahmah in ka lasakna tungtawnin dam masa phot ngait hi ung.

Tongsan  : Khangthakte sungah lasa band a om zawh nadingin bangci hanciam ding cih na muhna uh nong genthei ding uh hiam?
Ngabeng : Ko lasa masate tung mahmah pan Pasian vangliatna kimukhia le khangthakte’n hong eng thei pah dingin, tua lai pan lasa band piang zo dingin um ung. Kipawlna khat i makaihna tawh kipawl sangin a uuk, lunglutte kimu khawm in kipawl uh leh muibunzaw ding hi. Ngaihsutna kibang khin thei lo ahih manin, mi pattah ding pen ollo hi. Ko teng mahmah kipumkhat photphot in, etteh tak cing phot le ung cih ngaihsutna nei pen ung.

Tongsan  : Lasiam nuam mahmah khat, la asiam theihna dingin bang kisam penin na um uh a leh?
Ngabeng : Lungtupna thupi masa hi. Pasian piak ngait a awte sungah om ding hi. A ut khempeuh pen lasiam mawkmawk thei kei veh aw. Pasian piak ngiat mite in a siam hi mai veh aw. Pau hilo a, aw hi mawk ahih manin pawlkhatte siam gige napi’n kizangkhia lo zong om thei hi.

Tongsan  : Lasak siam le Aw hoih gige mi pawlkhatte a lasiamna uh a zatloh uh a bang hang ahi tam?
Ngabeng : Pasian lamah a kizat theihna dingin pianthakna kisam masa sa ing. Ci le sa tawh lasa zong om thei hi. Pawlkhat bang zong zukham kawm peuhin hong sa thei mawk uh a, tuate pen siamlo hilo siamthei mahmah uh hi. Tua ciang Zomi sungah lasiamte i laptoh ding zahin zong kilamto zolo hi kha dingin um ung. Lam khat leuleu panin  amau mahmah zong Pasian tungah kipia zolo hithei kha in teh.

Tongsan :  La tawh Pasian nasepna a kigualzo zo ding maw?
Ngabeng : Gualzo thei mah hi. I pu i pate in zong dawi thoihna dawila nei aive.. Tua dawi late tawh cina thoih uh hi. Ei a dingin hih la tawh i cidamna hi semsem ding hi. Joshua in la, phatna tawh galsim hi. Hi munah zawnna, ngauna i gal ahi kithutuak lohnate lasakna  hangin veng zo ding hi cih a um mahmah kai ve vua.. Gam khatin gam lapi nei hamtang hi. Thu le la pen 50% tuakin thupi hi.

Tongsan : Lamal kikhelsak, kibehlapsak, kiphiatsak cihte om kiukiu thei hi. Hih tawh kisiai in bangci muh na hia?
Ngabeng: La pen ei a phuak i hih leh ei deih banga phuah ding hi. Mi phuaksa i sak leh ama phuak bang tektekin sak ding kisam hi. A aw a malte laihnuam mahmah ahih leh a phuakpa tungah phalna ngen masa hen la, tua ciang laih pan leh hoih ding hi.

Tongsan :  A beisa hun khat lai in, Zomi sungah Tedim labu (ZBC) khat bek kizang khawmin, Pawlpi tuamtuam dahna nopna ah Pasian kiphatkhawm thei in nop mahmah hi. Tuhun ciangin Pawlpi tuamtuam pan labu tuamtuam i bawl pen khantohna maw, kiamsukna hizaw ding?
Ngabeng: Khantohna lamin mu kei mawk ing. Kithutuah lohna lam, ko le no cih i thulu khat hiveh aw., Ei a no a cih pen kipawlkhop theihna hi nawnlo aive maw. Hih pen Satan ii hong phingphialna hi cici kai ve... ZCLS in gambup lakhat sakkhop thei nading i vaihawm laitak hi. ZBC labu tawh kibangto lel in teh. A nung a mai kikoih khial, a laimal kikhenkhialte khawng bek kilaih in teh.. Zomite ading a deihhuai mahmah khat hi dingin a um ung.

Tongsan  : Zomite la lamah niam i hia, sang i hia?
Ngabeng  : La tawh kisai bel i tehna tek kibang keikha inteh.. ni dangin lapawl kithupisak hi. Tu lamah lapawl kisa nawn loin solo vive kisa hi. Hun tawh kizui-in la lamah nakpitakin khangto hang cih mu ing. Ahizongin khangluite’n la pen thu hi a, thu pen la hi a cih mah bangin tulai khantohna i khantohpih khat pen a khiatna nei khollo, ei hong phawng khollo la, gentehna in ah a la a kisa khollo a thu a kigente pawl maw..he..he..he.

Tongsan  : La le music hangin gam le minam khantohna a om zo diam?
Ngabeng : Om zo ding hi. Tulaitak i Praise and Worship te bang leitung level hita hi. I la aw, lamalte zong kuama theihloh kala i khantohna om hi. Gam khangtote ah la zong khangto hi. Khantohna tawh kizui-in lasakna hong om toto hi. I late mahmah in zong i minam hong tawisang hi.

Tongsan  : Sia Khaino in khui ka bawl uh leh, ko bangmah leplawh lo hi ung. ahih hang a noptuampih pawlkhat na om tuak a cih pen khemtuak na hivua le?
Ngabeng : Hi dan hi. Sum ngah nading lampi peuh mah ngaihsun ngei kei ung. Pasian hehpihna tawh sum bel buai khollo hi ung ei. Sum meet nadingin na sem lo hi ung. Tua khui ka bawl lai un TV tawm mahmah hi. Tedim bangah 10 val kikhawng ke’n teh kacih uhi. Khui 100 kabawl sawm uh pen tamlua in khui 20 ka bawl uhi. Ahizongin summit neite in tampi na copy in na metlawh mahmah uh hih tuak hi. Yangon Kala sai mai khatah bang ka lawmte man(Photo) na kisuang velval in khuite na kizuak zihziah mawk hi. Mi’n tua bangin a hih dingin zong lamen het kei ung e.. Tua khui zong lamka a Siapi Hau Khen in hong bawlsak hiven...

Tongsan  : Kum 25 sungah na mangngilh zawh loh haksatna le mangngilh zawhloh lungdamna nong gen thei uh dia?
Ngabeng : Haksatna lamah tampitak om ei. Ka gam manna uh zong om. Sia Khiano genna: Khatvei ka zinna uh pan pai zo nawnlo, lungtang lam natna ahih lam ka theihna a himanin mangngilh thei vet keng. Phaiza ka tun nadingin Sia Suantawng in sakol tawh hong dawn hi. Tauleng, gamngai cih bangte in nasiatakin hong dawnin gamngai bang thau khawng hong lawt gawp hi. Tua mahmah mangngilh zo nawn kei mai ung.

Tongsan  : Mailamah Pasian le Zomi ading ngaimna, tupna, sep le bawl ding na neihte uh nong gen thei dia?
Ngabeng : Pasian in hong damsak leh bel hibang dan mahin hong kithuah toto lai ding hi ung. Ka kum uh zong tam semsem ta in late deihtakin a thakte sin phapah le ung cih gelna nei ung.

Tongsan  : Bang hangin ngabeng lasa ci i hiam?
Ngabeng : Ngabeng cih pen tulaitak US a om Dr. Cin Khua Khai in hong phuahsak hi. Topa Zeisu in ngabeng hihna pan mimante kong suaksak ding hi, a cihna pan akila hi. A taktakin ngabeng hilo zawin miman suaksak ding cih na tawh “ngabeng” a kila hizaw hi. Ngabeng gundunga ngasa manmante pen pilna bang mah nei lo te hi a, ko tawh kituak zo sa bilbel ing. Naupangte bangin amau ngasa nene maw peuh hong ci uh ei .. ha..ha..ha

Tongsan  : A zenzen in Zomibup kigawmkhopna maiah la dawng 4 bekbek hong kisa sak leh bang la teng na sa uh tam?
Ngabeng : Tua khuapi tee zeizai, A hampha, Zion ah ciah kikni, ni aw na khawl lai in ! cihte hi.

Tongsan  : Tuhun ah own tune a deih zaw om hi. No copy la na sak uh pen Pasian deihna hizaw ding hiam?
Ngabeng : Own tune ka zatloh uh pen ka late uh hih zah la ngah theihna ding pen ollo hi. Ko lah laphuak siam kihi khollo ahih cianga, Agape itna labu sunga late ko teng in sa le ung kituakpah lianlian ahihna le leitung bup langaihte ahihna tawh copy late hong sa hi ung. Tualsuakte thupi simlohna hi tuanlo a, manglate thupi bawl luatna zong hi khin tuan lo hi.

Tongsan : Mun tuamtuama om Zomipihte le Ngabengte tha hong pia mipite tungah Tongsan tungtawnin bang na gen nuam uh hiam?
Ngabeng : (1) Sia Suantawng: Mun tuamtuam a om i mipih i sapihte hong itna, hong panpihnate hangin ko kal a suanzo, a masuan thei hi ung. Note na sepna gah ka hi uhi. Sum le pai tawh nong panpihnate hang uhi.
(2) Sia Khaino: A diakdiakin interview tawh kisai pen a khatvei ka tuakna uh ahih manin, Tongsante tungah lungdamna lian mahmah hi.
(3) Sia Sianpapu: A masa in Pasian in hih ciang hong gualzawhpih manin Pasian ka phat hi. Kum 12 ciang Sia hoih teng tawh ka kithuahkhak manin lungdam ing. I mipihte in koikoi i paita zongin tha hong pia in, kum 25 cin Tongsante’n hih bangin itna le deihsakna tawh thudotna nong vaihawmsak uh ka lungdam mahmah uhi.

Tongsan  : Hi banga i kiho theih lungdam mamah ung.
Ngabeng : Ko zong lungdam ung ei. Tongsan Topa’n thupha hong pia hen la, Zomibup ading thukizakna pan Khantohna a piangsak Media nasepna lianpi hong suak lai ta hen.

Holimpihna ( Interview) hun sungah kihel Tongsan tanute :
- Tg. Langh Do Lian , ( Interviwer )
- Tg. Ngo Thian Tun,  (Camera  )
- Tg. Thang Sawm Kim,( Recording)
- Tg. Thang Za Thawn ,( Recording )

Note : Ngabeng lasa pawlte tawh Holimna hun sungah amau mi 4 sung pan Sia Khenmang pen Zato lamah natveh pai pak ahimanin akihelthei a lawm mi 3 tengin, a lem bangbang in dawnna hong nei thei uh hi.

By-Tongsan Media Group International

Headquarters, Kawlpi

Mung Mung Tawh Ho Lim Na

Mung Mung (Bless) :: Musician, Cameraman, Director, Video Editor

Aki gelhni: Saturday, 31 December 2011

ZomiDaily :: Mung Mung (Bless) pen Video Editing lam akiva mahmahkhat hi a, Zomi sungahzong ihmuan mahmahkhat ahihi. Video Editing tawh kisai ahi Multimedia Course pen Malaysia, Kuala Lumpur khuapisung aom Cosmo Point College pan 2005 – 2009 sung anasin ngiatngiat khatzong nahimawk ahih manin, Video Editing pen aneng atawng in anathei mahmahkhat ahihi.

Editing abawlsak VCD Album bekbek pen khui 50 valbang phakhin a, tuatengban ah Birthday, Wedding tuamtuamzong tampi takmah Edit bawlsak khin hi. Zomi sungbek hilo in Kawlmi, gamdangmi te’nzong Video Edit dingin kicial kawikawi ahih manin buaimahmah denhi.

Mung Mung in Edit abawlsaksa Zomi VCD lakpan ettheih pakding in anuai ah pawlkhat kong gualsuk uhhi.

• Topa Phat Ning (Vanglian Sisan Vol.2) - Rev. TL Mungbawi
• Senlai Ni – Sower Sister
• Zodeih Guallai – Zogam Bawi Niang & Group
• ZOMUS Konsert 2009 Malaysia
• Cinpi (Zomi Idol 2010 Malaysia)
• Na Ma Hong Vang Ding Hi – ZCF kum 15 cinna

Mung Mung pen Video Editing bek asiam nasak khakleh Music lamzong akiva mahmahkhat nahi lailai hi. Music lamah Keyboard tumsiam mahmahkhat nahi gige a, tuabek thamlo lagelh zong kiva laizen hi. Hihzahzah siamna neileng ci’n hampha kasa luamai uh a, ka angtanpih mahmah uhhi.

2002 kum inzong Mung Mung leh alawmte pawlkhat in MODERNKIDZ Group ong phuankhia uh a, “Thu Ma Lo Chin Bu” cih thulu tawh Kawlla Album khat ong bawlkhia uhhi. Tua Album sungah Keyboard tumzong amah hipah a, ama lagelh ngiatzong kihel hi.

Mung Mung phuahsa late pen tulaitak lasiam minthang ahi Sangpi, Sung Tin Par, Mi Mi Khe te’nzong sa uh a, ala ngaih in athu bunmahmah hi.

Ama laphuah lakpan pawlkhat cileng:

• Than Youh Soh – Sa: Sangpi & Sung Tin Par
• (Album: May Khon Myar Yeh A Phey)
   
• Christmas La – Sa: Mi Mi Khe
• (Album: Soong Pa Chi)
   
• Kosaw Shih Dae – Sa: Thangtawng
• (Album: Thu Ma Lo Chin Bu – Modernkidz)

Music atumsak Album pawlkhat:

• Biakpiakna Lungtang
• Nakhut Sungah
• Nagam Hong Piang Tahen
• Zomus Konsert 2009 Malaysia
• Christmas Poem (Kawlla)

cihte banah adang Album tampi ah Mung Mung’ Keyboard awging te kizathei dinghi.

Mung Mung (Bless) leh ZomiDaily ki holimna themcik ong hawmsawn ung.

ZD: Amasa penin na min nung a “BLESS” cih laimal nakoihna ii nadeihna nonggen theidia?
MM: BLESSED Anungta Pasian ka theihkhak mahmah hampha kisa ing. Pasian in hong ompihden, thupha hongpiaden, hong laptohdenna te ka ngaihsut ciang hampha kisa in Bless aci hi-ing.

ZD: Tulaitak na buaipih mahmahkhat? Music lam ahi zongin Video Editing lam ahi zongin?
MM: Sanggam Dai te ii VCD khat leh Laimai Thak MTV hi.

ZD: Na VCD Editing bawlteng lakpan hoih nasakpen, tha nangah penpen?
MM: ZCF kum 15 cinna in akibawl “Na Ma Hong Vang Ding Hi” pen hi in teh. Adangte zongbel hoihsa veve ing.

ZD: Banghang?
MM: Hih khui pen
1) Malaysia aom Zomi khangno te hanciamna
2) Zomi khangno te ki pumkhatna
3) Sia J.K Kam ii “Thangthu Thak “ la mahmah zong nasia sa ing.

ZD: Video apicing ahoihkhat asuahtheih nadingin kisam nasak thupawlkhat?
MM: Video ii hong piankhiatna (Source), Tangthu (Story), Director, Cameraman te avek aa hi mai. Lim leh Mel lak (Actor& Actress) te ading bel a mit hi ey. Ih pumpi tungah gen lo aa a ki tel thei penpen ih mit (Eyes) hi. Ih Feeling (khan sar chat) pen ih mit bek ah ki lang thei, tua pen Director te, Cameraman te’n hong laak theih ciang (Alive) hong nung ta in muhnop pan hi.

ZD: Zomi sungah tulaitak ih dinmun sangin mailam ah bangcihleng Quality nei Video tampi neitheiding?
MM: Thapiakding kisam. Eimi lakah Video lam cimaini abawlpen kitam nai lo. Sia Thawn Kham cihdan mahin hong ci leng khui te DVDs, CDs te Original mah lei sak tek leng mai lam ah tam pi tak ki khangto lai in teh.

ZD: Video Editing nabawlciang natuahkhat hamsa nasak penpen?
MM: Tel mello aa ka bawlciang (Gentekna: Sen la bang hileh haksa)

ZD: Na lungsim ong nuamsakdiak cihkhawng e leh?
MM: Family, ka tanu tegel.

ZD: Nadeih penpen VCD leh Video Film cihkhawng e leh nonggen theidia?
MM: Senlaini (Sower Sister). Video film lianbel omkei mai ei.

ZD: Malaysia ah sang nakahsung hamsa nasakpenpen?
MM: Sangsaap piakding omlohciang.

ZD: Music leh Multimedia bangkum pan lunglutna nei nahia?
MM: Music bel sawtta 1998 khawng hi in teh. Media lampen 2004-2005

ZD: Music lam sinna koici bangin nanei ngei a?
MM: Sia Gin Khup (Lamka) leh Sia Lian (Janpan) (Heavy Thang nau pa)

ZD: La na deih pen khat ong ki dong leh?
MM: Zola ahih leh Sia Thawng Kim ii (Topa aw Hong Muang Ing) a cihpen. Kawlla ah Htoo Ein Tin ii (Kyel Twe Song Tek Nya).

ZD: Thupi na sak mahmah khat?(Mihing, Laibu, etc...) nakhat peuhpeuh?
MM: Simon Cowell (USA XFactor Judge), Zarganar (Ko Thu Ya - Comedian)

ZD: A bang hang aa?
MM: Simon pen mi a hih dan lianlian aa (arnar) lotak gen. (Eg. Lasa siam lopi khawng (arnar) lotak aa siamlo mah cipah lel. Deihleh deihlo cih tung aa hilo, siam leh saimlo cih tawh bek thukhen.

Zarganar leuleu pen mipi ading, paukhia ngam, laulo, kuamah mai etlo, thuman thutak pen ciammuih natawh genkhia.

ZD: Zomi leh pilna, siamna (tulai tak ihdinmun tawh ki zui-in) ong kidong zenzen leh?
MM: Tampi takmah hanciamding ki samsa ing. Computer zangthei (Internet, Email ciang a zangthei zong ki tawm mah mah lai. Ih Zogam ah ci leng pilna lam ah ki thanemlai sa ing.
 

ZD: ZomiDaily ongsimsak Visitor te tungah vaikhaknop aomhia?
MM: Tha ongpia khempeuh tungah lungdam mahmah nacihsak ou.

ZD: Hun awngzong neimello kawmkal ah ZomiDaily tawh holimna nong neihpihtheih manin kozong lungdam mahmah ungei.