Mikang Gamkekte leh Zomite Kidona (Alunglutte)

Dear Netters,

Mikang gamkekte leh Zomite kidona Pu Thang Siangh in agelh alunglutte sim dingin hong khaksawn ing.

Paul Thangpi

............................

Myo-Ok Suamna

Khamtung Ukpi a hong om ding, mipil pawl khat in a theih ciangun haza mahmah uh a hih manin, Ukpi a ngah zawh a sawt lo in Thangkai lam pan mipil thum Kaptel khua ah va hawh uh a,  hi bangin thu va kuppih uh hi: “Pu Thuamthawng aw, tu’n ei Kumpi tawh kilem khin khong ci leng, gal a bei ding hi ta a, na tapa Paudal in lah gal man nailo, mi’ thah,  mi’ mat gal et bek a om ding, nang  ukpi’ ta buang dingin kilawm sa na hiam? Tua ahihmanin, na tapa in gal a mat theih nadingin vaihawm theih bangin vaihawm khawm leng hoih ding hi, ci a deihsakna tak tawh hong hawh hi ung. Tu-in Thaangpi ah Mr. Carey, Khamtung gama om Mikang makaipi (Political Officer) om in, mi tam hetlo uhhi. Va pai in va thatin a van teng uh va lak sak lel leng, Tedim gamah ei a ahau pen ih suah ding banah galman saman suak ding hi hang,” ci-in va zol thapai uh hi. Tua bangin azolzol uh hangin Thuam Thawng in Kumpi tawh a kiciamna uh phawk gige a hih manin utlo hi. Sau veipi a zolzol khit uh ciangin, a zolte siam lua mahmah uh a hih manin,  hong ut dektak hi. Nisimin zu lehsa  tawh zol den uh a, a tawpna ah a zi Thang Ning zong hong thukim hi. Numei in zawh lah neilo ih cih mah bangin, Thuam Thawng in zong Kumpi tawh a kiciamna uh mangngilh kha in, atawpna ah a nupa un hong thukim uhhi.

Tua bangin a nupa un hong thukim uh ciangin, a zolte in zong, ih ngimna tangtung ding hi ci-in tha ngah mahmah uh a, “ahih leh va mawk kuan peuh mah kei ni in, ih pu ih pate in na khat peuhpeuh a hih ding ciangun, mang ai mah na san khol tangtang uh a hih manun, tu zan ih mang ai san phot dih ni in, ih mang a hoih leh va kuan bek ni, mang hoih ih mat kei leh khawlkik mai ni,” ci-in hong lum uhhi. A zingsang ciangin hong tho uh a, “Tu zan bang mang man nei vua leh, na mang uh a hoih na? Ih kuan ngam dia,?” ci-in ki dong uh hi. Khatpa in, “Ke’n mang khat mang khat man takpi ing, khia dih un, Tu zan ka mangin, Thangmualpi panin zaangva honpi hong lengto in, Kaptel khuakhung ciangpi a khup ding ciangin musan hon khat in leh nawh sukkikin mual khum uh hi.” Ci-in a gen ciangin, “Tua bang a hih leh ih ngimna tangtung thei kha ding hi,” ci-in a lawmte’ phuahtawm a hih lamtak theilo in Thuam Thawngte nupa in zong tha hong ngah mahmah uhhi.

Tua ciangin a zolte zong ih ngimna tangtung  thei kha ding hi, ci-in tha ngah takin ciah pah vingveng uhhi. Tua ciangin Mr. Carey in bang deih hiam ci-in kansim phot uh a, Saiha ka khat deih pen hi cih a thei uh ciangin, Kaptel khua a om Thuam Thawng in Saiha ka khat nei in Mr. Carey pia nuam ing hong hawh hen, ci-in gen sak uhhi. Ahizong in tua ni tektek in tungsiah pan Mr. Carey mundang pai dingin sawlna om ahihmanin a ma tang in Myo-Ok akici Rakhaing (Arakanese) te Mikangte tawh nasem khawm khat Kaptel khua ah Saiha la dingin a galkap (30) tawh hong kithawi uhhi. Tua banga apai khiat ma un Mr. Carey a zol ding a akiseh, Thuam Go tawh hi bangin thu hong kipia sim uhhi.

Thuklai lam hong tawn unla, ko Nal Mual ah napang nung, lampi pen sawl them khat tawh na khak ningniang nung in, tua mun nong tun ciangun tha khatin namai lam nawhin tai vingveng in,” ci-in thu kipia sim uhhi. Tua ciangin, Thuam Thawng, Pau Dal, Kai Tuah, Hang Thual, Gin Thang leh gal hang akisa pasal cingteng (145) tawh va kuanin Khuasak khua ah salam hong en masa uhhi. Thuam Thawngte Kaptel panin hong kuan ma un Kaptel khua ah sa hong go masa phot uhhi. Myo-Ok pa zong a galkapte tawh Kaptel lamah zin dingin hong paikhia takpi a, akiciamna mun hongtun uhciangin Thuam Go in thautang kuangkhat a puak, a nung lamah khia vat-in tai a, Myo-Ok pa Sakol tung a tuang Thuam Thawng in hong kap khia pah lian in adangte in zong galkapte nakap pah uhhi. Galkap (30) lak panin (10) si pahin (7) liam hi. Thuam Thawng in Myo-Ok pa akap khit ciangin Kai Tuah in Myo-Ok pa’ lu tannin khat kap lum leuleu in a thau gel la in Singphung khat bel hi. Galkap hinglaite a kap leh alawmte in a thau na selsimsak ahihmanin pawl khat na tai man in avekin that khin zolo uhhi. Tua Myo-Ok suamna ah Kai Tuah in gal (3) that in thau a lak sakna hibangin la khat na phuak hi:

Ka do khuai bang hang lawmlawm e, ka ngial manin ka tawi lentualah khia’nge,

Tun aw suihlung na zuang lo aw, namtem ka tawi ka thah lentualah sua’nge, naci hi.

1893 October kha in Thuam Thawng, Pau Dal, Kai Tuah, Benate manin Kawl lamah ciah pih suk pah uhhi. Pau Dal zong amat taktak hilo napi a nu in, “Pau Dal, nang napa’ sihna mun ding thei kei lawmlawm lecin zi zong nei ngam ding na hiam?” a cih ciangin a zui a hihi. Kai Tuah kum 6 sung Thong ah a om khit ciangin hong ciahto kik a, Kai Tuah’ genna ah: “Hong paipih suk vingvengin Adaman tuikulh ah hongpuak uh hi. Tua mun pen khua khat hi a, zi nei nuamte in zong nei thei uh hi. Thuam Thawngte pata a ci uh hong na in Uisa duh ung a cih uh ciangin, gawh sakin tua uisa ne khial hi ding uh hiam, gilsan vei-in hong si uh hi.” ci-in gen hi. Tua ahih manin Thuam Thawng in ta Do Tual, Pau Mang, Cin Mang, leh tanumei Ngul Khaw Hau, Heh Cing, leh a zi Thang Ning nusia-in si hi. Tuabangin Thuam Thawngte pata hong sih uh ciangin, Kai Tuah in, “Kumpi tawh tuisia ne a kiciamna om hi ven maw, en ih thuciamna palsat ih hih manin ih si mah kei diam,” ci-in hi bangin la na phuak hi.

(a) Lunmaang tawh tongciam hang aw e, damtui luang tong ciam hang e,

(b) Damtui luang tong ciam hang aw e, sun ni tualkiat ciam hange,

(a) Gil bawhal tuam a khum bang, dotan tuam a khum aw e,

(b) Pupa’ theihloh thangvan siakah zangpeh sik henkol khai inge,

Thong sungah hih la gel phuakin, kum 7 degree kipia hinapi, Thuam Thawngte pata hong sih uh ciangin, kum 1 dawhsak in, kum 6 sung thongah khum in amah bek hong suakta hi. 1909 kum in Zampi khua na sat hi. (Source: Pu Thang Siangh, Zomi Messenger)