Kalay University pan a (6) vei Buaihpiakna kinei

Aki gelhni: Thursday, 08 March 2012 11:02

Agelh: Peter Khampu

Bangzahvei kisimkhin: 39

Share

0 Comments

Dear Laizomteng,

A hun hong sawt khin dek hi ta leh Kalay University ah sang zosa pawlkhat leh a kahngei, gamdang omte' mitkha a muhtheih nading deihsakna tawh tukum KU in a (6) vei buaihpiakna maan pawlkhat hong khak ing. Nungkum a buaihla ding honkhat pen tukum kingaksak ahih manin buaila pen tam mahmah mai hi.

A tawp ni sim loh nikhatin nihvei, zingsang lam leh nitak lam neiden uh hi. Mipi pen lokuan maban bangzahin nisimin ki kuan to ngekngek a, nopci mahmah hi. Siapiteng zong picing thei mahmah, zahtak baang thei mahmah uh a, buaihpiakna Hall a kineih nai loh bek mah a kisamin ka mu hi.

Hih buaipiakna tawh kisai-in tukum buaih la a tamna zahkhatin sangmante in zong inn ah limphatakin lengla donna leh lawpna limbawl ciatin kigen hi. Saluang go tam mahmah a, tualote'n zong saseh la, ahih kei leh niangtui leh moh tawh thungetna leh lengla dona neiciat uh hi. Munlai RC (Tuipi) te khat bang pen tanu khatbek a neih uh sangzawhna hong ngah tak ciangin bawng 2 leh vok 3 tawh lawmvakna nei uh cih thu kiza hi.

KIZEEMNA SAI, BEAUTY PARLOUR TE'N KHAWNG PHA MAHMAH UH:-

Hih buaihpiak hunsungteng kizeemna saibawlte'n limkhot mahmah uh a, sumlut hoih tuak mahmah hi. Zingsang lam a buaih ladingte'n pen nitak khuamial in kizem khol pah uh a, sai khempeuh mi dim ahih manin kigual keei uh a, a manhakte zan 11,12 ciang manpan uh hi. Tuate ihmu le uh a kizemna a man khak ding a lau manun ihmu ngam lo-in zanhak liang uh hi. A zingsang ciangin breakfast ne le uh a muksanza uh man zel ding ahih manin bangmah ne ngam lo-in gilkialpi-in buaihla ding kuankhia uh hi. Nuambuang, phukhong vei dekdek cihdan buang khatin buaih hong la uh a, i lungdampih mahmah hi. Zomite mah buaihla tampen kici hi. Namdang pawi uap honkhatte'n ahih leh amau minam puan silh tangtang ciat zaw uh, cih kimu thei hi.

(Kizeemna tawh kisai pen a rehearsal ni'n zong nasiatakin kizel loh phamawh ahih manin sum nei pha lodiakte' adingin vaitam tuam mahmah hi. Nih vei kizem uh; a tawmpen khatvei kizemna pen tul 15-25 bang bei hi. Hibang a hong kizem uh ciangin lah etlawm mahmah uh a, zoliate zong midangte mah hong bang keei sam uh hi. Buaihla dingten motor mah cial ngiatngiat uh a, motor zong Kawlpi adingin tam khia mahmah mai hi).

Kalay University in Hall kician a neih ding uh a kisam pen leh deihsak tek hi hang, cih zong mipi' theih dingin i pulak nuam hi. Mailamah i ta i naute'n degree sangpipi hong la to zel ta uh hen. Mailam-ah pilna degree sangpipi hong lak toh zel ding uh i deihsak mahmah hi. A kicing zaw leh a kician zaw a thei; hopsawn ding a kilawm a thei i om leh zong a ban hong zom le uh teh ci hang.

Deihsak Thupuak,

Peter Khampu
Kalaymyo