Kawl kumpi Piangthak

Aki gelhni: Sunday, 26 February 2012 14:19

Agelh: Zogam Mungno

Bangzahvei kisimkhin: 50

Share

0 Comments

It Zomi te,

Kawl minam makai te in alungsim uh hong kikhel in, hong piangthak ta uh hi. Banghang hiamcih leh galkap sung a, ulian khempeuh in, amau innkuan kinaipihciat tek tawh kawlgamsung ah company leh panmun hoihteng neikhinta uh a, anautang teng leh mualtung mi te kidodo na hang in, alung uh kham le, metna mulo,galvan tawh sum mawkbei lel leh leitung gam khempeuh in, enthei nawn lo, neumuh, huhna khak, kizopna bawlnuam nawnlo lai ahihman in, amau innkuan sumzon paizonna leh adiakdiak in kawl mipi te mahmah zong gamsung buaina hang in, leitung ah azawngpen gam, migam milei tang ah salbang in galtang nasem in aomlam aki etkik, akitheihkik uh ciang in, hongpiangthak ta hi.

Ahizong in,thakhat thu in, mualtung mite amau deihbang in mun leh kiukna thuneihna pia hi leh amausang in, hong hatzawk ding, hong kithutuaklua hen la, kawlte hong zawh kikding lau ahihman in, 8888 kum khitzawh galkap in honglencip na pan mipi tawh kizopna ding roadmap hong bawl pen, athukawng uh aheina step hilel mawk hi.Amausung ah panmun kituh ihcihcih pen sumzonna tawh kisai hilel a, amau bawng meltheih teng in, munhoih leh sumzonna mungpi teng a let khit uh ciang, Leitung gam tuamtuam te ettheih pahtak theihding in, atawm atam in hong ki heihei uh ahihi.

2008 kum a thukhun lampi aomsa bang in, tuniciang kipelhna omhetlo a hong pai toto ahihlam phawk ni. Ciankhaizii party ihcih zong amau innkuan kipawlna hilel a, tuni Nupinu ASSK zong 2010 kiteelna ah lutlo ding a cihsa hong lutkik pen kawl makai te maimom thangkam na sung ah aom ahilel hi.Thukhat cileng Nupi nu in athu hong khel a, kiteelna ah akisam lai Parliament tawmno cika ding hong kipatkik saisai pen,U Theinsein tawh hong kikupkhiat a kipan athusuak ahihi. Hibang a Nupi nu mahmah in, athu hong khel in,khuttum lumlet hong batsak ziauzong pen, apa Aungsan hunlai bang phawkvat hong kul mawk hi.

Theinsein zong kawl te hi a, Nupinu zong kawlte mah ahihi. Kawlgam sungpan mualtung mite atuam in Panglong agreement bang a, ihpaikhiat ding alau tuak mah hilel hi. Tutung NUpinu in Kachin gam Mookawng ah athugennate enkik leng kitel mahmah hi. Nupinu pen leitung gam thupi teng in pakta mahmah a hihman in, galkap makai te in, amau leh amau kihosim a, kawlte phattuamna ding damdam in hun leh kum te kaikai kawm a, hong valhtumna ding lampi hong tawn uh ahihlam mangngih kei ni.

Galkap kumpi uksung in zong,mualtung gam teng gal omcih paulap in amaugalvan kithawina ding ciangciang akisapna leh alotheilo sumngahna ding lampi te bek, lampi ahi a, lei ahizong, meitha leh akisam tui te ahizong puahin zuun uh hi. Kawl te teenna zanggam teng ah, lo te hoihna ding, lampi te puah in, leite bawl in amau ading ciang bek akikhuallam theihgige ding ahihi. Hih mualtung mite atawntung in eikhutsung ah om sakdenzolo ding ihhihman in,atawpna ah eimi kawlte omna teenna teng beek hoihtak puahsawm zuunsawm ni in, ahihtheih laiteng hih mualtung mite kawl hongsuahna ding leh akisapna khempeuh eikiang ah hong pai hong ngetna ding in lampi atuamtuam tawh pan la toto lai ni cih kawlte lungsim ahihi.

Ei utthu leh ei deihthu tawh mualtungmi singnuai om khempeuh kilemna hong la hizenzen lo a, kawl minam te mailam ding leh amau tupna sawmna atangtun nading bek in, kilemna hong bawlpih uh ahihi. Gamthu tawh gilbem sung a om te zong kum tampipi akiatsak uh ahihsa khempeuh zong, angah ding uh metna tawh aetkik uh ciang in, gilbem pan hong pusuaksa uh ahihi. Tua bang in hihkei leh amau hun hongbei ding nai mahmah ta ahihman in, midik mihoih min tangnuam leh amau tupnasawmna ahi mualtung gamteng atailohna ding hencipnopna te tangtung loding ahihman in ut leh utlohthu hilo in, no choice tawh hong gamta uh ahihi. Kawl galkap kumpi in cihmah hun in, amausupna ding bawlngeilo uh a, ametna ding bekmah lampi a zong te uh ahihi.

Kawl galkap kiukna min tawh paisuak leh piangnawn mahmah lo, leiba thangba dim keeita ahihman in, galkappuansuahpah in mipi puan hong silhpak bek hia, leitung gam tuamtuam muannading in Nupinu leh muangtungmi makai te tawh kilemna abawlbek ahihman in, pilvang mahmah ding kisam hi.Nupi nu leh Theihsein te kihosim na zong thuthuk ding a, amau kawlte mailam ding bek khualna hilel ngeel hi.

Zop lai ding,

Tg. Zogam Mungno