ZOMI CUP 2012: Vai Lianpi Zong Ih Vaihawm Khawm Zo Hi

Aki gelhni: Monday, 30 January 2012 14:21

Agelh: Admin

Bangzahvei kisim: 72

Share

0 Comments

Zomi te omna ahih nakleh, amaute-in kua hi aa, koipan hong pai, bang thute vaihawm khawmzo hiam ci-in hong ki-en leh, Zomi khangno/khanglai 500 val tukpeng kimawlna tawh kilawmtatna ni (5) sung buppi zangkhawmzo uhhi, cihpen tangthu khat ih gelhzo leuleu hi.

A (3) Veina Zomi Namni Pahtawina-in aki bawl Zomi Cup tukpeng kidemna pen January 23-27, ni 5 sung buppi ki vaihawm khawm thei aa, hizah aa mipi tampi ki kaikhawm aa pawi bawlkhawm cih hiziau lo-in thatang khempeuh san aa khat leh khat kidem ciatciatna leh khuahun hoihloh patauh simsim kawmkal pan etlawm takin kizo thei hi. A kimawl leh a thapia khempeuh ki picing thei mahmah hi.

Team tampen tangthu gelhkhawm
Ei Zomi sung aa kampau kitel sitset Khua (26) kidemna pen, Match (58) pha-in, Zomi Tangthu sungah (theihkhialh kei leh) Team tam kihel pen kidemna ahihi.

Banghang Zomi Cup vaihawm
Bawlung icih tukpeng kimawlna pen, vai dang khempeuh sangin a thupi penpen hilo hi. Ahi zongin, leitungbup huam ah, minam khat ahih kei leh gam khatin vai lianpi tuamtuam aneihte sung en le’ng, tukpeng (football team ahih kei leh football tournament) neilo gam pen om khollo hi.

Tukpeng cih ngiat pen, pawi dang khatpeuh tawh kibang theilo hi. Banghang hiam cih leh, Zomi Cup en le’ng, a kidem lian 11 tuak hi-in, a kimawl ding mah aa ngak apua-ah 9 tuak bang om hipah aa, kihel khakna mi tam in ngahthei pen pawi nam khat cihna hi. Cihnopna-ah khat leh nih kia a kihel hitheilo ahih manin, mi tampi ahih kei leh khangno tamthei pen ii mun ngahna hi gige hi. Tuahang mahin zong, thalawp khopna om phadeuh in, ki pawlkhop kisinna hoih mahmah khat ahi hi.

Hidan teng hang bek tawh Zomi Cup ki vaihawm hi nailo lai hi. Minam Ni mahmah pahtawina-in ih vaihawm hi masa hi. Minam Ni anei minam khat ihihna ki langsak hi.

Tuaciang bek hilo-in, zum tuamtuam leh namdangte muhna-ah ih lahkhiat zawh thu-in, haksatna tampi om himah ta leh, Zomi te-in vai lianpi tampi vaihawm khawmzo hi ungh, cih pen ih lahzawh thupi mahmah hi.

Namdangte hong theih semsemna leh hong etneu ngamlohna dingin zong a kisam vai lianpi khat ahi hi.

Haksa taleh ei leh ei kidingzo
Zomi sungah mihonpi ih vaihawmkhop ding khatpeuh a om simin, hong buaisak pen khat ahi sum leh paii kicin’lohna hiden pian hi. Ih kisuahtak sak hang a suakta hetlo leh ih hihna bangbang ih ngahtheih tawntung lohna dinmun tawh mi’ gam ah ih om hangin, Zomi te-in ei leh ei hanciam in ih dingzota hi. Ei leh ei kidingzo lua na hihi.

Khua (26) kihelna-ah, lutmanh a kikim in ih khiattek khempeuh gawmkhawm aa tuateng lian a kizeek hi-in, apualam pan huhna ngetna ahi zong, sumtang tawh ma hong pan’ sawm zong ki omlo lel hi. Zomi Cup 2012 akihel Khua (26) teng ii sumkhiat teng a kizang ahi hi.

Match kimawl zah buppi (58) pha-in, tua khempeuh hih gammi referee te kawmna-ah ih sumzat beipen hi. Tua zomah, kimawlna tualpi sap ah beipen hi. A Khatna, a Nihna leh a Thumnate pahtawina cih bangin sumzatna bulpite kimu hi.

Ih dinmun omzia khat paulap lo-in hanciam ni cih kampau leh utna lungsim bek hilo aa a hanciam takpi Zomi te ihihi.

LUNGDAMKOHNA

• Zomi Cup 2011 zawhtheihna dingin, a deuhdeuhin, Khua makaite sungpan kimawlna lam makaite khempeuh tung lungdam mahmah hi. Sum leh pai, thatang vaihawm haksatnate puazo bekthamlo-in, athu kisam aa aki vaihawm bangbang pen, HIPAH HEN cihtheihna, cihzawhna nei na hih manun a vaihawm khawm zo hihang. Mailam ah zong hibang lungsimte kep tawntung ding thupi mamah hi.
• Na hanciamna, na suplawh, na bailawhnate, na sepkhoptheihna, na thuakzawhna, lungdamzia na zatsiamna leh na angtan’pih siamnate hangin a kimawl mimal khempeuh tung, lungdam mahmah hi. A ki vaihawmte na zuihzawhna leh na zuihnopna-in vaihawmna ma zangsak mahmah hi.
• Match report vai khempeuh ma hong pang, Sia Pauno (Phaiza), Sia Piang (Kansauzang), Sia Lian (Khuadai), Sia Kap (Cikha) leh Sia Tuangpu (Taaklam)
• Committee ma hong pan’pih Pa Dam (Vangteh), Pa Kam (Pangsak) leh Sia Paupi (Mualbem)
• Ka khuapih tuipihte vaihawmna ci-in Malaysia sung pan hita leh gam tuamtuam pan hita leh sumtang mahmah tawh tha apia sanggam khempeuh tung lungdam mahmah hi. Na zom toto lai in, minam vaihawmna a picing sak hi teh.
• Ni (5) sung sitset ihmut cim manlo-in, nisa nuai, guahnuai-ah sawl bangbang mangin a taisuk, taito ZEC sang naupang (6) te tung lungdam mahmah hi.
• Team khempeuh ii min leh photo te asang, akem leh etnop ding aa a bawlpha Pa Pau Mung
• ZAM Camera tawh ni (5) sung buppi nisa nuai-ah taisuk taito-in lim (photo) hong laaksak Nangtak (Khuasak)
• Tuivot zuakna panin a met cihtaak kei cilo-in, a lina ngahte RM200 hong piakhia ZEC-Maharajalela Sang
• An leh meh zuakna pan a met tampi ngah man hilo-in, Committee te RM400 val manh an hong vaak ZEC-Cheras Sang Sia/nute leh sang naupangte
• A kisapna peuhah mawtaw hong hawlsak U Thangkhek (Mualbem) leh Tg. Khupboih (Anlangh)
• Sound box leh microphone te manh piakkullo aa hong zangsak CMF pawlpi, ZCCM leh ZSM

ZOMI CUP 2012
A kihel khempeuh: ANLANGH, BUANLI, DALKHAI, HEILEI, KHUADAM, LAAITUI, LAIBUNG, LENNUPA SUANGZANG, MAL SUANGZANG, MUALBEM, MUALPI, NGUA SING, PHAIZA, PYIDAWTHA, SAIZANG, SALZAANG, SEZANG, SUANGHOIH, TUIDIL, TUIKHIANG, TUIMUI, TUIPI, TUNGZANG, VALVUM, VANGTEH, VOKLAAK
Quarter Final kahte: LAAITUI, MUALBEM, SUANGHOIH, NGUA SING, ANLANGH, BUANLI, PHAIZA, SALZAANG, DALKHAI, VALVUM, VOKLAAK, VANGTEH
Semi Final kahte: SUANGHOIH, NGUA SING, ANLANGH, BUANLI, DALKHAI, VOKLAAK
A Lina: DALKHAI
A Thumna: ANLANGH
A Nihna: VOKLAAK
A Khatna: NGUA SING
A Lina pahtawina: Medal khatta leh RM200
A Thumna pahtawina: Medal khatta leh RM700
A Nihna pahtawina: Medal khatta leh RM1,200
A Khatna pahtawina: Medal khatta, RM2,000 leh Cup pi
Goal tamkhum pen: Tg. Mung Kap Thang (ANLANGH)
Kungpang siampen: Tg. Pau Khan Khual (VOKLAAK)
Nungdal (defender) siampen: Tg. Nang Lam Tuang (NGUA SING)
A Laii (midfielder) siampen: Tg. Pau Thawn Thang (NGUA SING)
Maikah (striker) siampen: Tg. Pum Lamh Kim (VOKLAAK)
Player of Zomi Cup 2012 : Tg. Pau Thawn Thang (NGUA SING)

Hun lap sensen Zomi te
Match (58) sinsen kimawlna-ah, tua match ah tua Khua te ziakai-in hun beisak tuam cih peuhmah a omloh pen lamdang mahmahin, Khua makaite leh a kimawl khempeuh ii ki thuhual dan pahtawi huai ngiat hi. Hih hunmaanna cihte kepcing zawh sawm ni.

Red card ngah omlo
Zomi Cup 2012 buppi license tawi Referee leh Assistant Referee vive sumtang tawh kikawm hi-in, Yellow Card (23) vei a om hang Red Card tawh kikhawl sak pen omvetlo hi.

Theihsakna
Ih vaihawm ziate ki theihpihna leh mailam ah a vaihawm ding peuhpeuh ii a picing zaw nasep zia dingte muhtheih kawmna-in, a sawtlo-in Zomi Cup 2012 sumlut leh sum zatnate Khua makaite tung kihawm theita ding hi. ZAM camera tawh a kizaih kha photo bekbek tul val bang omin, ZomiDaily camera tawh quality hoih takin kizaih za nih val bang kikem hi. A lunglut peuhmah in zum ah hong kan un. A khuakhua-in e-mail pan khaktheih ding ki vaihawm laitak hi; A deih peuhpeuhin <tg.kham@gmail.com>; ah hong zasak un.

Seppihte tawh,
Tg. Kham & Hau Khai