Zogam Salpha Anthony Kawlpi ah Mipi 3000 kiimin vaidawn

Aki gelhni: Monday, 23 January 2012 23:21

Agelh: Admin

Bangzahvei kisim: 146

Share

0 Comments

13 Jan 2012 ni Pathein thongpi pan hong suakta Pu Anthony Kap Khan Khual, anau Khualneu (San Thang) le apu President Pu Chin Sian Thang tuni vanleng tawh Zangkong pan'n 10:30 AM in ding khia in, 12:45 AM pawl in Kawlpi vanleng tual ah cidam in tung uhi. Kawlpi vanleng tual pan. BOC dong lampi dim in mipi in Pu Thang le Anthony nasia tak in dawnna nei neih uhi. Jeep 10, Ban 1, Dyna 1 le Bus 1 akigawm motor 13 tawh le motor cycle 100 val tawh kidawn hi. Kawlpi vanleng tualah vaidawnna poster, pakkual, Zo ngeina lam vui tawh zam tawh khuang tawh kidawn in, namsau tawh lamna, kapna, minsial akipan puak damdam hi. ZYA, NLD, CPP, Siamsin aki pan Kawlpi dungah kipawlnate, biakna makaite, khuanu khuapa kimin vaimuakna nei thei uhi.

Vanleng tual le BOC kikal lampi dimin mipi kidim phitphet ahimanin, motor pikel palikte in zindawn motorte paitheihna ding, lampi hong bawl sak uhi. Vanleng tual pan in a inn thak uh ahi Tazin Veng (Nidang Pinlong 9) Pi 50 lampi tungah (Moonstar Internet Cafe nung) kikha to in, hun tomno bawlna nei khawm in, Pu Chin Sian Thang le Pu Anthony Khual in lungdamna thu gen uhi. Mangkang gamkekte in Zogam ah hong gamkek toh lai un, Anthony Khual pu, Pu Kaituah pen Miau Uk Suamna ah a kihelna hangin 1895 kum pawl in Pu Khai Kam, Pu Thuam Thawngte tawh Kindat thongah kum 7 kia hi. Pu Kai Tuah hong suahtak kik ciang, apianna Kaptel ah a inn le alo teng Mangkang kumpi in na laksak khin ahimanin asanggam beh le phung bulte tawh Kaptel pan lal in, Zampi khua 1906 kum in nasat uhi, 1909 kum ciangin Tonzang ukpi pa Pu Hau Cin Khup kiang pan theihpihna recognized na ngah uhhi. Anthony Khual apa Pu Suan Do Nang leuleu pen General Nay Win in, Kawlgam ah 1962 kum in, Tawlanyee Council min tawh galkap kumpi in gam ukna alak ciang, galkap kiukna deihlo in ado kik ahi Pu Thual Zen gal lai akihelna Haka Palik len kikapna ah akhe thau in kha in, tai kik zolo kiman in Monywar thong ah kum 7 mah thong kia hi.

Anthony Khual hun ciang 2007 Saffron Revolution ah Zomite tangin panmun lakna aneihna pan kiman in Myaung Mya thong ah kum 8 thong kia in kum 4 khit ciang hong suakta kik ahi hi. Zomi sung ah gam le minam suahtakna ding nasepna bek ahialo gam le minam ading kipiak khiatna pan mat le hek thuak in, gilbem ah kiman sungpan khang thum tak in, akizom in akipia khia Pu Kai Tuah, Pu Suan Do Nang le Pu Anthony Kap Khan Khualte innkuan bek om ding hi. Tuni Kawlpi ah hi bangin mipi lungdeihna lahkhiatna, gam le minam bupin galkap kiukna nuai pan suakta in Democracy Federal gam taktak ngah ding mipi lungtupnate lakna, gamvai nasepna hangin kimatna pan hong suakta Pu Anthony pahtawina, vaidawnna le kum khua sawtpi in gam le minam ading nasepnate ah kal khat khit kal khat gualzawhna te lakna hi cih kimu thei hi.

Pu Anthony Kap Khan Khual a hopih nuamte in email kapkhankhual@gmail.com ah lai kikhak thei hi.

Tuni Pu Anthonyte putu vai dawnna ah akisam na khempeuh itna tawh hong panpih naseppih lawm le gualte khempeuh le hong kihel mipi akua mapeuh tungah lungdamna kong pulak uhi.

Zomite Pasian minthang tahen!

Info Team
Zomi National Congress
23 Jan 2012