Yangon a Zomi numei kizuakte tawh kisai

Aki gelhni: Tuesday, 10 January 2012 08:55

Agelh: ZOKHUP

Bangzahvei kisim: 51

Share

1 Comment

Yangon khawpi ah Karaoke, Guest House, Beuty Palour leh Mimekna (Massage Center) te paulap in, numei kizuak tawh sumbawlna khang hat hat in, Zomite zong a kizuak om ta ci in kiza hi. Tua Yangon a numei kizuakte lak ah, Mualtung numeite atam pen hi in, tua lak ah Zomi leh Rakhine zong kihel ta in, tam bel tam lua nailo uh ci in, hih thu limtak a akan, Investigative Reporter Aung Thet Waing in, Kawlte Irrawaddy News Magazine ah January 06, 2012 in Feature News Article saupi gelh hi.

Minkhem 'Sofi' kici numei khat in 'Hi banga ka ki zuak pen kum 3 phata hi. 2006 kumin Nurse sin dingin Yangon ah kapai hi, nurse ka zawh ciangin, clinic khat ah kasem a, kha khat 30,000 (USD$30) khong bek ngah in, innlam a kanu kapa te enkik zo mahmah lo hing. Ka lawmte khat in sum tam ngahna ding khat thei ing, na sem nuam hiam? hong ci a, tuaa kipan abual toto suak ka hihi, ci'n Kawlpau siambuang siamlo buang khat in gen hi.

Tua banah Sofi in "Acil in mi mek mawkmawk ding kasak leh, ka lawmnu in, mi mek mawkmawk khong tawh bel, kha khat 50,000 val ngah zolo ding hi teh hong ci hi. Sum nei pian khong hong pai ciang, sum na ut zahzah ngen inla, hong khoih bangbang dawh in, tua khit ciang dak/nai khat sung khong luppih lecin, ci a hong hilh a kipan, tuni tan a bual suaksuak ka hihi" ci in Sofi in a mimek kipatna suut kik hi.

Nurse sep lai a innlam bangmah akhak zawhloh pen, tu'n ki ningcing zawdeuh ta ci hi.

Sofi bang a nasem mualtung numei tam mah ci hi. Zomi zong kihel ta a, ahizongin Zomi leh Rakhine bel tam lua nailo ci hi. Tualo Shan, Karen, Kachin, Mon leh kawl ukna nuai a om sila minam dangte bel tam cihtak tam ci in kiza hi.

Kawl sumbawl khat in agenna ah "Khenkhat bang bel pau tawh kiho theilo in, i deih daandaan, a lim a lakkul hi." ci hi.

Limtak akankhia khat in agenna ah, Thamaing Lamkabom (Thamaing Lansone/ Thamaing Junction) kianga, cimekna mun khat bekbek ah zong, cimek 47 om ci hi. Bayintnaung, Aung Mingalar Transit Center, Dagon Aye Yar Bus Gate daan a gate tuamtuam te, Yangon khawpi laizang leh khawnawl township tuamtuam ah, cimekna mun tul tampi om ding hi, ci in Kawl Motor Puaisar/ Car Broker khat in gen hi.

Hih Yangon khawpi a kimeknate ah daak khat 2500-3500 kikal kila hi, ci in a rate suang uh ci hi. Hi pen a kilawm sakna bek hi in, alumkhawm nuam te'n atawm pen 15000 piak kul ci hi.

Hih cimekna company te in, mualtung numeite leh Yangon khaw pualam pan a, numeite deih diak uh ci hi. Banghang hiam cih leh atai na ding uh theilo in, nasep kip thei mahmah uh ci hi.

Gam ki ukna hoihlo ahihmanin nasep hamsa a, mualgam leh khaw tuamtuam pan numeite Yangon ah pai in nasep zong uh a, khasum khom zolo uh ahihmanin, cimekna lam ah kihei ngeingai uh ci hi. Cimekna lam a lut zo lote lamdung beel in kizuak uh ci hi.

Cimekna a semte pen atawntunga sum lut hoih leh nuntakna nuamsa den uh bel hilo hi, ci in Cimek Manager khat in gen hi. Kawlgalkap thuneite leh Cimek Company neite a kisiat uh ciangin nektawm ding zong muzo lo in cimek numeite buai mahmah uh ci hi. Customer/phauktey luite khong phone tawh contact a, huhna nget keei kul ci hi. Huhna ngahlote lamdung tung uh a, natna leh siatna tawp tung suak uh hi, ci in tua Feature News Article ah gelh hi.

(Mualgamte zawngkhal a, Kawlte mai ah khukding dinga, 1947, 1974, 2008 Constitution kigelte i agah, i enpak theih khat ahihi.