Wikipedia nai 24 sung ki khakcipding

Aki gelhni: Tuesday, 17 January 2012 22:56

Agelh: ZomiDaily

Bangzahvei kisim: 52

ZomiDaily :: Zanhalni January 15, 2012 nipen Wikipedia akipatzawh kum 11 acingni hita hi. Happy Birthday, Wikipedia! Wikipedia pen Wikimedia Foundation pan ongbawlkhiat uh hi a, "The Free Encyclopedia" cih Slogan aneih mahbang un tua website tungah akikoih Information khempeuh amawkna in asimzozo, a enzozo in laktheihding in Internet tungtawn in akikoih ahihi.

Ahi zongin tulaitak United States ah Legislation athak nih kiguanbeh sawm a, tuate pen Stop Online Piracy Act (SOPA) leh PROTECT IP Act (PIPA) cihte ahihi. Hih thukhunthak nihte kumpilam pan thukimna omin ong kizang takpi leh Wikipedia akipan Free & Open Internet khempeuh nakpitak in ong nawngkaisak theiding hihtuak hi.

Tua ahih manin ongtungding January 18 (05:00 UTC on Wednesday) niciang hih thukhunthak nihte langdona in Wikipedia English Page pen nai 24 sung ki ngahloding, Black Out sakding cih Wikipedia pan tangko khia uhhi. US gamsungbek hilo leitungbup in January 18 05:00 UTC hun akipan nai 24 sung Wikipedia English Page te ki enthei nawnloding hi.

Stop Online Piracy Act (SOPA) thukhunthakding Draft pen tulaitak House of Representatives te kiangah akipuakkhin hi a, Protect IP Act (PIPA) zong Senate te kiangah ki puakkhin cihzong Wikipedia Founder Jimmy Wales in genkhia hi.

Wikipedia website sungah Articles bekbek 20 Million val kikoih khin a, kampau Languate zong nam 283 bangin ki simthei ahih manin Internet tungtawn in aki zangthei Encyclopedia picingpen khatzong ahihi. US kumpi lampan thukhunte ongzangtakpi mawkleh maikum 2013 ciang "Wikipedia Birthday" ihmuakkha laimawktammaw?