Vantung gam pualam ah tutpih hi

Aki gelhni: Monday, 30 January 2012 21:23

Agelh: Hang Khan Lian

Bangzahvei kisim: 79

Share

1 Comment

[U Ngwe in tu-ma kum 60 hunin Mandalay 'A' lamlianpi dung ah singkung 500 suan: Japan gal hangin ni-sa 111 dong kahto ngei. Tanu 7 nei. saihka hawl U Ngwe! a ma' ut tawm natawh zingsang nai 3-4 hun in tho, khau, tuiphel, siksem, tupak, lawh, cihte pua; a suan kungte tuibuak; ahiangte sattan in puah. [ vantung gam pualam ah U Ngwe, Zeisu in ompih loding hiam?]

Rev. Dr. Do Sian Thang in GZA khawmpi aa athusun na sungpan kong laak khiat ahihi.

Alai sung ah, "Vantunggam pua lam ah U Ngwe, Zeisu in ompih loding hiam?" acihhang agentaktak na ah, "Vantung gam pualam ah tutpih hi" ci-in ong gen aa kikhawm mipi in dik kisa in khut kibet ziahziah hi.

Agennopna bulpi in, Pasian Piansak singkung lopate puah, zuun, keem aa i omciang a Piangsak Pa lungdam mahmah hi aci nuam, ban ah Pasian piansaksa singkung lopa te ih vatmai ciang Topa dahhi" acinuam hidingin kala hi.

Zeisu in ong tutpih, ong ompih hileh, uanggen hilehang, vantung gamsang heel sung nuamzaw dinghi.

Dotna khat kidong aa, "Tua ahihleh, tulaitak Chin State khantohna ong encik ding aa kumpi in tavuan apiak Environmental and Forestry Minister pa in singno suanding bebek hanciam ahihciang, U Ngwe mahbangin Topa Zeisu in vantung gam apualam ah atutpih diam?" akicih leh tomno tak in dawngkik aa, "Tutpih bek lo in luppih dinghi" cihi. I gam, i lei keu lua aciik genna zong ahihi.

Mipi lakpan khat in pulakna nei aa, "Siate, makaite aw, an huan nading sing kisam mahmah, tualo in piangtheilo ahihman in, kap kawmkawm, khitui luang kawmkawm sa-in sing kaphuuk uhhi" ong ci aa akikhawm khempeuh in dik kisa in khut kibeng ziahziah leuleu hi.

Zogam Zolei a ngei abat kik nadingin isep ibawl, i ngaihsut khop loh phamawh hi. Gengen bek tawh piangnawnlo ahihman in Sia Do Sian in mapatsa nei in leitang nangawn bawl ing cihi.

I Love Myanmar te in, Tulsuk leh Taingen kikal ah Phuitong Acre 300 suansawm uhhi. Tourist te painop nading gelna zong ahihi. Leitung ah Phuitong alom aa kisuanna alianpen ding kici hi.

Pu Suan Pau in Lamzang gam lei in singno suan aa, nim dildial khin in. Tuk hun ciang tuamun teng ah guah tuamzuk pahhi. Zeisu in tuamun teng nimsak, tutpih hidinghi.

Sia Ngulh Khua Suan (khualui - Laibung) in Lawibual, mualpang ah kipat sawm ngei aa ong nusia baih ahihman in kizom nawnlo hi.

Oklahoma ah Pu Khup Khan Thang in project proposal khat sungkhia ngei aa Siamsin Seminar ah kisim ngei ci-in za ing.

Singkung phukding i kikhaam hang anhuan nading kisam ahihman hi aa, utlua aa sing kiphuk, nuamsa lua aa khupsung pol liang aa sing kiphuuk hilo hi. Cin zawh, vilzawh ding zong hilo hi. Khitui luang kapkawmsa aa sing kiphuk ahihi.

Singkung taang aa anhuan theih nading i zon kul dingin ka umhi. Abeisa asawtlo lai in kumpi in gas anhuanna Ygn khuapi sung ah pawlkhat hawm khia aa, 10 viss agik bung khat ciang Ks 200 khawng bek tawh hawm uhhi. Kiman mahmah hi. Tua akingah theihkhaak leh kumpi tung ngen lehang icih laitak in, tu'n, kumpi in companyte tung Viss 1 (bungkhat ahilo) ciang Ks. 2000 bangin zuak uh ahihman in tawmno tawh na kingah nawnlo aa, taangpi, taangta zat zawh pak ding hi nawnlo hi.

Bio-gas tawh anhuan ding hanciam hang taangpi taangta zat zuahzuah zahding baih pak nailo dingdan hi aa, tua sang an-sing mah kici zaw dingdan ahihi. (Practical paklo cihna ahihi)

Thuk namkhat, sing khuahkhat, khuah nih tawh anhuan theihna ong kibawl ahihhang, etpak hoih leh kilawm napi, zat taktak ciang lem lualo, ban ah khat in tutpih cip kul aa mutmut ngai hihtuakhi. Nopbel noptuam kici hi.

Tuitha tawh anhuan ding icih hang vaakding nangawn kicing nailo hizel hi. Tulian in Ygn khuapi ciang ah hitheibek aa Tedim, Tonzang, Kawlpi ciang ah kizangzo nailo hi.

A sem abawl, apankhia ding kisam, (gengen tawh pianglo), sumtha kisam ahihman in, (keiguak aa kalungsim aa ongsuak khat in), GZA - Oklahoma City te bangin Sia Do Sian, Bishop Felix tetawh ong kikum in, lampi ong zongin, ong semkhia le uh, amau pen eilak ah,a uuk, avei, athei teng ahihman un, lampi a vangbaih pen keitam kacihtha ong suak peuhmah hi.

Chin State pen tutak kumpi in Special Economic Zone aa ong ciapteh uh ahihman in, Kumpi tung pan nidang mah bangin Gas akiman aa ngah zawh nading ngen lehang cih, tutak akidawp san laitak ahihi. KUmpi in Sen gam aa zuak sung pan Rakhine State te ngetna zui in Rakhine State sung piakding leh Magwe Division sung leh Mandalay Division sung Sen gam pipe line in kantan ahihman in mun nih ah gas zuakna honding gelna om ci-in ong suaksak ngei uhhi. Tua khawng pan Zogam ading ngah zo lehang lawphuai in ka umhi.

Kuakua cilo, a uuk, akin peuh in kikum aa nawh sep mahmah ding i maban lianpi hi aa GZA in sep masak ding aa ageel uhzong ahihi.

Hang Khan Lian

Kawlgam Kumpi in 2015 ciang Marturban gulf aa gas field pan aa teng gamdang zuak lo in, gamsung zatding kihawm dinghi cihkhat nei uhhi