Tonzang Youth Library pan Thuzaksakna

Aki gelhni: Monday, 23 January 2012 00:02

Agelh: Admin

Bangzahvei kisim: 10

Share

0 Comments

Hello! A khual a tual aom Tonzang tawh a kinahvawh ka it ka ngaih khempeuh, ih pianna vangkhua Tonzang panin na khutnem uh hong len masa ing. Tonzang Youth Library pen 2008 kum April kha sungin Sya Tuamung ii makaihna tawh a na kihong Self-Suppot Community Library ahi hi. Ngimna bulpi-ah, khangnote in lai simna tawh leitung thulela thei-in bek tham loin tua leitung tawh a kizom hih theih nading ahi hi. Kum 3 sung haksatna tuamtuam lakah hong mualsuahpih ih Pasian tungah lungdam ih ko-a, mailamah ih khua ih tui khantohna lamah a masuanpih zo nasepna a hih theih nading cih pen ih thungetna ahi hi.

Report & Review
Tonzang pen ni dang bang loin laisim lam hong kizongsang pianpian ta hi. Thangahhuai mahmah hi. 2011 kum sungin hih ih Laibusaal ah lai hong sim pen 200 kiim bang kipha tota hi. Mi 15 bangin laibu hong kikawm pen 150 bang val hi. Tua hi-a, kum 2-3 sungin ih khua-ah laisim hong kizongsang tham ding hi, cih lametna ka nei uh hi.

Ih Laibusaal ah mipite sim theih ding Journal nam 7 (The Voice, 7Day News, Health Digest, Internet, Alintan, Premier Eleven, & Shwetwe) kikoihsak dena, tua teng pen Kawlpi panin kalsim kila den hi. Magazine pen sumlepaai haksatna hang tawh Metta Taman bek kikoihsak zo hi. Laibu pen mal 700 bangbek kikoihzo lai hi. Tua ahih manin, magazine le laibu nam tuamtuam bang koihbeh zawh ding kilunggulh mahmah hi.

Library Fund pen nam 2 in ih nei hi. Khat pen Endowment Fund ih ci-a, tua pen Sumbul ahi hi. Tulaitak lianin sum Ks 300 000 ih nei hi. A khat pen, General Fund ih ci-a, zattawm ding sum ahi hi. Laibusaal pan sum zeekkhiatna-ah, Endowment Fund pan hi loin General Fund pan a kizeekkhia ahi hi. Endowment Fund pen 4% meet tawh mi kizangsaka, tua teng pen General Fund ah kilutsak hi. Tua summeet bek tawh kikalsuanzo nailo ahih manin 2011 sung bang VMBC syate le Library Commiittee memberte a kidong tawmtawm uh hi. Tua ahih manin, mailamah Endowment Fund pen behlap toto-in tua pan summeet bekbek tawh a kikalsuan zawh nading lunggulhna kinei hi. General Fund adingin a beisa kum bang mahin VMBC Pawlpi pan khasum sang peuhmah'kha khat tul khat' ta ka kidong uha, Committee memberte zong tua bang mahin ka kidong uh hi. Khuasung panin hong panpih zong om hi. Ahi zongin, kitangsapna bel om veve hi.

Ih Laibusaal pen VMBC Pawlpi ii khualung vai ahi hi. Lai sim nuam khempeuh man ngen loin kisimsak hi. Tua bang mahin laibu kawm nuam peuhmah a khongin kikawmsak hi. Numei naupang ci loin a utut suakta takin lai kisimsak, laibu kikawmsak hi. Tua hi-a, hih ih Laibusaal pen VMBC Pawlpi in nei-a, tavuan khempeuh a let tei hangin Pawlpi sung nasepna bek hi loin ih khua ih tui ih mipihte ading nasepna ahi hi. Mi khempeuh teektan theihna phual zong ahi hi.

2012 ading Lunggulh Masak
Internet Access: Leitung hun luanzia tawh kituakin ih Laibusaal-ah Internet Access ngah zawh ding lunggulhna ahi hi. Laisim ih mipite in information a hunlap zawa a ngah theih nading le leitung mun tuamtuam tawh kizopna a lem zawk nading lunggulhna ahi hi. Hih adingin Ks 650 000 bang kisam ding hi.

Step Up: Tonzang pen Step Up lo tawh mei kizang thei khollo mawk hi. Ks 450 000 bang kisam ding hi.

Fiber Tutphah: Ih Laibusaal pen khua laizangah om hi-a, a zuatna a nuam mahmah ahi hi. NGO pawlkhat le khuasung pan kipawlna pawlkhat in tintan tuamtuam piak nadingin zang thei zeela, tutphah kitasam denke hi. Tutphah 20 (minimum) teitei tu kum sungin kingah zo leh cih lunggulhna ahi hi. Mailamah ih Laibusaal pan mahmah zong workshop tuamtuam vaihawm ding kilunggulh hi. Hih ading Ks 200 000.

Book Sheet: Tulaitak lianin Book Sheet 1 bek kinei-a, laibu pawlkhat bel a kihici koih ahi hi. Ks 100 000 kiim bangin Book Sheet hoihpian khat kingah zo ding hi.

Endowment Fund: Tu kum sungin Ks 200 000 (minimum) ngah zawh ding lunggulhna om hi. Tua hi leh, Endowment Fund Ks 500 000 kinei dinga, tua ii meet pen kha khatah Ks 20 000 hi ding hi.

Notes
Tonzang Youth Library pen Tonzang khua na itna, na veina, le na deihsakna na lahkhiat theihna mun khat ahi hi. Ko kia tha tawh a kikalsuan theilo hi loin, nang tawh ma ih pankhopna in hong mazangsak ding hi. Tua ahih manin, a tunga lunggulh masakte ahi zongin nangmah mimal in na lunggulhna a om leh, ma pangkhawm ni. Ih khua ih tui, ih mipihte ading mah ahi hi.

Pasian kiang panin na lianpipi lamen ni. Tua bang mahin Pasian in ei tungtawnin na lianpipi hong sep theih nadingin ei mahmah a kizo sain om ni.

Library Committee
Advisors: Rev Tuan Khan Mung, Rev Go Van Mung, Rev Thang Suan Kim
Director: Pr Aung Aung @ Biak Lyan Sang
Chairman: Upa Thang Khen Cin
Vice Chairman: Upa Zam Suan Pau (siapautonzang@gmail.com)
Secretary: Lia Thang Suan Dim
Asst. Secretary: Upa Thang Thawn Kham (thawnkham@gmail.com)
Treasurer: Nu Man Luai Ciang
Accountant: Lia Vung Nuam Ciin
Lungdam!


Aung Aung @ Biak Lyan Sang
Director, Tonzang Youth Library