Pu Chin Sian Thang in thongpan hongsuakta atu atate Bawng gawh

Aki gelhni: Tuesday, 17 January 2012 15:56

Agelh: Admin

Bangzahvei kisim: 5

2007-kum September Saffron Revolution lai in Minam tangin a kihelna uh le makai dinmun in ma hong pang hang uh in, mat le hek athuak ZNC khangno Pu Kam Lam Khup le Pu Anthony Kap Khan Khual te 13 Jan, Friday in ong suahtak khin uh cih mipi theihsa hi. Cidam in hong hong suahtak khit uh ciangin ZNC makai apa uh leh apu uh ahi President Pu Chin Sian Thang in bawng khat tawh Topa Pasian tungah lungdamkoh biakpiakna le Zo Ngeina in kha khupna hong neih sak hi. Zangkong Shalom EBC Pawlpi pan Rev Dr Gin Khen Mang pawlpi in,lungdam koh hunpi bawlna hong neih pih uhi . Sia Mangpi in hunpi ah hong thapiakna sermon ah Moses leh Paul te'n a minam uh a itna te uh bulphuh gen'n hanthotna le thapiakna hong zatpih hi.. Tua ban ah Khup le Khual pu Dr Gin Heh Lian in zong dangka tulsawm nga (50,000) tawh lungdam pihna le pahtawina in thupha hong piaksak hi.

Hong kihel thei mipi pen 150 kim ki pha hi. Biakpiakna kipat hun pen 2.30 PM in ki pan hi. Zozum lam pan Lengtong Kam Khente pawl zong hong kim uhi.Tua ban ah Rev Dalpi makaih Agape Zomi Baptist Church(AZBC, ZBCM) le Rev Zel Khua Suan makai in Zangkong Zomi Tuiphum Pawlpi (YZBC)pan in zong lungdamkoh thungetna ong neih pih to suak uhi. Thungetna ah hong ngetsak thu bulphuh pi uh pen thong pan ong ki khah khia sanggamte in mailam ah zong minam ading apicing zaw, atang zai zaw in hong sep zawh nang uh le ZNC President Pu kumsawt khansawt in cidam ludam in, hong makaih zawhna ding , Anungta Pasian anei Zomite Pasian in Kawlgam thupha hong piakna ding, ZNC in minam suahtakna ding le khantohna ah makaih zawh nading thungetna pi cih bangin thungetna kinei khawm thei hi.

ZNC President Pu le Piantit Kumpi Palai Kimuhna
=============================
15-1-2012 ni nitak lam mah in lungdamkoh biakpiakna aman khit ciang nitak 6:00 PM hun'n French (Piantit) kumpi gamdang vuanzipa Mr. ALain Juppe in French gam in ASSK pahtawina apiak uh French gam ading in a sang penpen pahtawina ahi A Ward of the Insignia Commandeur in the Legion of Honor pahtawina amau gam tangin Zangkong French (Piantit) Embassy ah piakna hong nei thei hi. Zomite tangin ZNC President Pu Chin Sian Thang zong hong kisapna tawh kizui in kihel thei hi, ASSK in lengla French Foreign Minister pu tawh President Pu ki meltheihna hong bawlsak in tawl khat, amau hong ki holim thei uhi. Kiho sung in thu tampi kigenna sung ah, ko Zomi te 1917 kum kim pawlin Galpi masa hunlai, no gam ah force labor in ong pai ngei ung cih gen hi. Kimuhna tawh kisai in ASSK in lungdam thupulakna Piantit pau tawh gen kik hi.

Kam Lian
Secy, ZNC

Info Team
Zomi National Congress
16 January 2012