Passenger mi 4234 apua Costa Concordia tembaw kibung

Aki gelhni: Sunday, 15 January 2012 03:06

Agelh: ZomiDaily

Bangzahvei kisim: 279

:: Passenger mi 4234 apua Costa Concordia tembawpi khat Friday nitaklam in Italy gam Giglio Island gei ah kibung cih BBC in genkhia hi. Hih tembaw tuahsiatna hangin mi 3 si cih Italian Media te'n genkhia uh a, adang mi 14 zong liamna ngah uh cihi. Adang mi 69 bangzong kimuzo nailo uh cih Media pawlkhat in gen uhhi. Passengers atamzaw pen Lifeboat tawh tuipinawl lam ongzuanthei a, pawlkhat pen tuipek uh cihi. Tuipinawl ah atuahsia ahih manin phadawm zawlai a, tuipi laizangkhawng ah atuahsia hileh hihsang mi tampitak sithei khading hi.

Hih Costa Concordia tungah atuang lakpan Passenger 3200 pen Italian, German, French leh British gamminam ahi uhhi. Tembaw tungah nasem Crew zong mi 1000 bang phading kici hi. Mediterranean Cruise ni 7 sung zindingin akuankhia hih Costa Concordia tembaw pen Electric mei siatna hangin akibung ahihi. Passenger khatin Titanic tembaw tawh akibutdan kibang hi ci'n 'like a scene from the Titanic' genkhia hi.

Costa Concordia tembaw ii Maiden Voyage kici akhualzinkhiat masakpenpen ahihleh 2006 kumsung hi a, Passenger mi 3700 tawh zinkhia masa hi. Tuipitung gualnopna tawh akidim tembaw khat ahihlamzong "real floating temple of fun that will amaze you' ci'n a website uhah suaksak uhhi.

Tembaw tungah Swimming Pools 4 om a, Restaurants zong 5 om hi. Tuaban ah Bars 13 om in, Spa, Cinema, Fitness Center, Jogging Track cihbang in gualnop nading, kimawl nading kicingtak in om zihziah hi. Passenger te lupnading Cabin vekpi 1500 pha hi. Atuanman zong tawmtuak hetlo a, Mediterranean tuipitung azinding Winter Cruises tebang mikhatciang £390 (US$600) pan kipan in Sea View Suite bang ahihleh mikhat £1200 (US$1800) bang la uhhi.

Costa Concordia tembaw pen pi 950 sau a, dawl 13 pha hi. Ahatna Speed pen 21.5knots (40km/h) ahihi.