Pasian hehpihna tawh sanggamte cidam in inn hongciah
- Aki gelhni: Saturday, 14 January 2012 00:41
- Bangzahvei kisim: 86
2007 August-September kha sungin, Kawlgam ah galkap kiukna nuai pan suahtakna ding, Democracy Belpawl gam ngahna ding, Pupa leitang ah Zomite in Panglong thukimna tawh kituak in, thuneihna, gamluahna ngahkik nading cihbang in upna le ngimna tawh kipia khia in, mimal aituam ading akipan, innkuan sung nopna, khantohna, hauhna cihte nusia in, Kawlgam ah gamvai nasem activists tuamtuamte tawh khut kilen in leitung kiuli athawn damdam, Galkap kumpi tutpha aling lawng sak zo zah dongin mipi lungphona ahi 2007 Saffron Revolution ah Minam tangin kihelna hangin, mat le hek athuak Zogam Salpha Pu Kam Lam Khup le Pu Anthony Kap Khan khualte Pasian hehpihna le mipi thunget sakna hangin, cidam in Zangkong ah Pu Chin Sian Thang inn ah nitak in hong kivai tun uhi.
Sanggam, ulenau, lawm le gual tengin zong, kidelh ngeingai in, lunglen luankhite ki siaksak in, thu le la gennop teng gen khin zolo zah dongin, nuam kisa in, Topa Pasian min kiphat khawm thei hi.
2007 kum in mat le hek thuakma tawh kibanglo in, 2012 gilbem pan hong tuah ciangin, it Tunnu melmuh ding adam nawn lo ahi Pu Kam Lam Khup zong lungsimte kizo in, aki hehnem zawh nading thunget sakna le thapiakna tawh panpih tek ni.. A it mahmah ahi zi le vonlia tanuno 5 tetawh cidam ludam in innkuan kim kituah in, lunglen khitui luangte zong akap zawhna ding lungdam pihna, kipak pihna, angtang pihnate tawh thapia tek ni..
Pu Anthony Kap Khan Khual zong tulaitak anau Khualno, Zangkong ah aom laitak ahimanin unau in cidam takin kimu kik thei hong suak uhi.. Kawlpi ah a upi nu uh zong tawh cidam in, unau kim in, akimuh kik theihna ding uh thungetna ah phawk tek ni.
Zomi le Zogam ading akipan Kawlgam bup suahtakna ding, Democracy Belpawl gam taktak dong ngah zawh nading nasep ding tampi om lai ahih man in, thasan in, ei om na tek pan, thukiza in, khut kilen in kalsuan khop, nasep khop ding tam mahmah lai hi cih athak in mikim in phawk tekna ding, thong pan hong suakta sanggamte itna khitui le anglum tawh i dawn kawm in lung ngai khawm kik tek ni cih zong i ki han thawn kawm pah hi.
Pu Kam Lam Khupte innkuan le Pu Anthony Kap Khan Khualte unau tungah Topa Pasian in azah tampi in Thupha hong piak kiksak tahen !
Info Team
Zomi National Congress
13 January 2012
Zomi National Congress
13 January 2012
No comments:
Post a Comment
hih sung a ong lut ong ih u leh nau a kua mah peuhgh. it na khut tawh ban zal khut ong len in