Pasal Mah Hi

Aki gelhni: Thursday, 26 January 2012 09:48

Agelh: Thawn Tuang

Bangzahvei kisim: 64

Ngal ha paksa tum kik ngeilo, Pasal kam gensa dok kik ngeilo a kici pen tu hunteh numei pawl khat in amau innkuan sungah pasal te sang'in zanghzaw uhleh ki lawm hi. Numei leh pasal innkuan sung uknazaa ki lehbulh gawp tampi omta hi. Ni dang lai Pasalte danlah khengval, tuhun Numeite danlah khengval deuh, a ki lek kimlah hoihlo 70% teitei pasal thu hileh hoihzaw dingin mu ing.

Hih mipa tenpih leng keilam kei phung ah kai zo ning cih, numeiten pasal aneih ma un a ngaihsun ten ta 2 leh 3 hong neih uh ciangin Ngal ha paksa tumkik ngeilo, Numei kam gensa dok kik lo e cih bulphuh uh aitam a innkuan sunguh ka et ciangin a lubawk pen Pasal Mah Hi na pi-in a ngawng pen numei tampi om hi. Innkuan sungah a sumzong pen Pasal Mah Hi na pi-in thuneih zolo na sempen Pasal mah hizel hi.

Sum leh paii a zekpen numeite hi a, a vekpi in a lensak, vaisai sak mite ka et leuleu teh Pasal Mah Hi. Sum ngahna a theipen pasal mah hi a, sum a pai khiatna a theilo citciat pen Pasal Mah Hi leuleu hi. Tuikia cimawh nui a ki cih bangin pasal dangten tua mipa a veiluat manin ki huhtheih danlah omlo, ih nuih suak zawsop hi. Numei pawl khat in hih bang innkuan nuntaak kalsuanzia hoih a sa zong om mai thei hi.

Numei lutangin Pasal hi cihpen tuhun numei pawl khat in Pasal lutangin Numei hi ci nuam zawleh ki lawm hi. Ni dang lai-in numei leh naupang mimal simna ah ki sim khalo hi mahleh tuhunteh a sim masa tangtang Pasalte mah hizel a, numei ten tua suahtaakna pen Pasalte tungah zangh khial thei uh hi.

U le nau sung, beh sung ahoihsak leh a siasak numei ki ci ngei na pi tu hunteh Pasal Mah Hi zawta hi. Tua bang Pasal pen Numei lah suaksamlo avaipuak pen numei tawh a ki bang Pasal pawl khat om thei hi.

U leh nau mipihte tawh ih nuntaak khuasak a nop theina dingin a thupi penpen ah Pasalte Mah hi a, pasal hihna a zo lo te pen miten thupi muhlo, hampha sa lo in a nuntaakna uh hehpih huai ki sa mahmah hi.

Na khempeuh Pasal Mah Hi veh aw a Thupi..

Thawn Tuang
Zomi Angvaan
http://zomi-angvaan.blogspot.com