Mi mang a sisa in kimu kik

Last Updated on Monday, 30 January 2012 14:45 Written by Admin Monday, 30 January 2012 14:26

Share

Zogam Tedim gamhuam Tungzang khuami Pu Kai Za Nang tapa Tg. Thang Cin Piang (Kum 38) pen abeisa khakhat lai in, Yangon zinsuk hi. Vai teng a zawh khit ciangin Yangon pan inn lamah ciah kik a, Mandalay a tun ciangin khua sung vakkal  ahi kha diam kithei loin, a tuanna ding Bus in paisan kha hih tuak hi. Tua hun akipan a tun a banna kithei nawn lo ahih manin, Yangon a zintunnate le Tungzang a om Innkuanpihte thukizatuah uh a, khua lam pan a kan dingin sanggamte Mandalay ah zinsuk uh hi. Mandalay khua sung teng le a kim apam upmawhna mun khempeuh zongin akimuhzawhloh ciangin Kumpi thukante kiangah akisam lai teng le Yangon tawh kizopna ding Phone numberte pia in,inn lam ciahsan kik mai uh cih kiza hi.

Khakhat kim a sawt khit zawh January 27,2012 ni pawlin Mandalay pan Tai (6 Miles) gamlatna gamsung Singnuai khatah a sisa in Thukan /palikte in mukhia uh cih kiza hi. A pumpi tungah liamna, baina bang mah om lo ahih manin, gilkial lua a si hikha dingin ki ummawh ci hi. Tua banah khuavot luatna hang tawh a luang uih loin keucip ci hi. A puan ip sungah a Matpongtin le Yangon a zinte Phone number om lai ahih manin, tua Phone number tawh Palikte in Yangon hopihin tua lai pan a kitheikhia suak hi.

Hih bangin palikte kiang pan akizak ciangin Tungzang pan a luangla dingin a sanggam U le naute Mandalay lam paisuk pah uh a, January 29,2012 ( 9:00Pm) hunin Mandalay pan Kawlpi lam zuanin January 30,2012 (12:00 Noon) hunin Kawlpi tung cih kiza hi. Kawlpi ah tawmvei atawlngak khit ciangin Tungzang khua manawh suak ding ci hi. I sanggam pa Tg. Thang Cin Piang nusiat a it a nu le pa le US lam a om a sanggamte akipan meltheih khua le tui tawh kibangin Tongsan pan dahpihna i puak hi.

Source: Nu Kimta, Yangon