LENG TONG HOIH TANG THU

Lengtong Hoih Tangthu

Nidang lai-inah Leng Tong Hoih a kici unau pasal sagih lakah numei khat a om hi. Tua numei a ute, a naute in a deih khempeuh a pia uh hi. Tua ciangin,"Tu-in bang na deih lai hiam?," ci-in a dot uh leh,"Van-a aksinelkai deih lai ing," a ci hi. "Tua ahih leh va la nung in, kong tun mateng uh na pusuak peuhmah kei in," ci-in inndei tungnung pen sungah sau veipi a khom ding ann, sing, tui a kicing takin koihsakin a nusia uh hi.

Ahih hangin a ute a tun ma-in Leng Tong Hoih pusuakin a kisil hi. A samzang khat tui in tai-a, tuitaw-ah Kawlmangpa a kisil leh, a tungah a baang hi. "Hih samzang sau nah e," ci-in a zialzial leh theipum cia a pha hi. "A sam zong sau, a mi zong hoih inteh, va zong un," ci-in a nasemte thu a pia hi.

A nasemte zong paipai-in Leng Tong Hoihte' khua a tun uh ciangin a inn vengte a dong uhleh, a inn vengte in, "Leng Tong Hoih hi, unau pasal sagih lakah a mah bek numei hi. A ute in a deih khempeuh a piak khit uh ciangin, bang na deih lai hiam?" a cih uh leh, Vana aksi-nelkai deih lai ing," ci a, tu-in a ute tua la dingin a pai uh hi," a cih ciangin Kawlmangpa' nasemte a ciah kik uh hi. Lampi tawntungah "Leng Tong Hoih, Leng Tong Hoih," a cici uh hi.

A tun uh ciangin a topa' kiangah,"Leng Tong Hoih hi, unau pasal sagih lakah a mah bek numei ahi hi. A ute in a deih khempeuh a piak khit uh ciangin, 'Vana aksinelkai deih lai ing,' ci a, laksak dingin a pai laitak uh hi. Mi lian hi a, a inn uh zong hoih mahmah hi," a cih uh ciangin, "Tua bang ahih leh ka zi dingin va la un," ci-in a sawl kik hi.

Leng Tong Hoihte' inn a tun uh ciangin, "Leng Tong Hoih aw, kong hong hon in," ci-in a sap uh hangin a dawng nuam kei hi. A innvengte kiangah, "Bangci sap le ung hong dawng ding a hi hiam? Ka u Mu Nei Thang Dal na hih leh ka tuikuang sin hong beng in, hong ci hi, tui kuang sin koi lai-ah om hiam?" ci-in a dot uh ciangin a innvengte in, "Bikhalap nuai-ah om hi," a ci uh hi. Tuikuang sin bengin, "Leng Tong hoih, Leng Tong Hoih aw, kong hong hon in," a cih uh ciangin, "Ka ute hong tung hi," ci-in kong hon pheiphei a, dei khat a sam lai hi. Innkhak vang panin a etleh, a ute a hihlohlam a thei hi.

Tua ciangin, "Ka ute hi kei uh teh, hong hon kei ning," a ci hi. "Tua ahih leh na khutme beek hong khak in," a ci uh hi. Leng Tong Hoih in a khutme kawmvangah a khak leh phim tawh a na kilh pah uh hi. "Na veh hong khah un," a cih hangin "Inn nong hon keileh hong khah kei nung," a ci uh hi. "Tua ahih leh hong khah un, kong hong hon ning," ci a, a khah uh hi. Kong a hon ciangin manin paipih uh a, Kawlmangpa in zi in a nei hi.

A ute a tun uh ciangin a nau om loh lam a thei kei uh hi. "LengTong Hoih, Leng Tong Hoih aw, sikinn dan kua kot hon aw," ci-in tuikuang sin a betbet uh hangin a hon kei hi. Tua ciangin, "Leng Tong Hoih koi-ah om hiam?" ci-in a inn vengte a dong uh a, "Kawlmangpa zi dingin paipih ta uh hi," a ci hi.

A ute dah mahmah uh-a, Leng Tong Hoih a lak zawhna dingin hanciam uh hi. Suktai khungin a pal uh hi. A u penin, "LengTong Hoih la zo ta na hen na cih leh, ka suktai hong paltan zo sak aw" ci-in a pal leh pal zolo a, a ngaltaak kitamin a si hi. Tua mahbangin a zom a zomin hih uh a, a gukna dong sikhin uh hi. A nautum pen a min Mu Nei Thang Dal a kici khat bek a om lai hi.

Tua pa in zong hanciam a, "Ka u Leng Tong Hoih la zo ta na hen, na cih leh ka suktai hong paltan zosak in," ci-in a pal leh a kan zo hi. Mual leh mual kikalah mimkhau zang khat khungin,"Ka u Leng Tong Hoih ka lak zawh taktak ding leh hong kaptat sak in," ci-in thalpi tawh a kap leh a kap tat hi.

Tua ciangin Mu Nei Thang Dal kuan suk pah hi. Lo zau a tun ciangin lawm lokho mi hon khat mu a, "Ka gal a, lawm tangkaite aw, ka u Leng Tong Hoih na mu nam aw?" a cih leh, "Ka mu e, ka mu na e, kemkot tungah siam a gan," a ci uh hi. Paisuk leuleu a, nupi singpua vai ciah khat tawh a kituak hi. "Ka u Leng Tong Hoih na mu nam?" ci a, a dotleh, lawm dangte' cih mah bangin a dawng hi. Paisuk leuleu a, a dai ngei a tun ciangin vahui in a kibawl hi. Tua khit ciangin lenga, a u LengTong Hoihte' guatonmung dawn-ah a va tu hi. 

En suk in, "Ka nuai-a siamgannu aw, ka u Leng Tong Hoih na hi nam?" a cih leh, "Ka hi e, ka hi. Ka nau Mu Nei Thang Dal na hih leh ka siamtui piak hong dawn in," a ci hi. Vahui leng suka, tangban sang pen dawnah a tuang hi. Tua panin a cih ngei teng a cih leh, a u nu in zong, a dawn ngei bangin a na dawng kik hi. Mu Nei Thang Dal zong leng suk a, a u siamtui piak a va dawn leh a u in a ciampek tawh a na satlum hi.

A guh teng kiukiu a, kukkuk a ci teng pai-in, kingking a ci teng puanbu nuai-ah a koih hi. Ni sagih sung tua kimah bangmah ham kizalo dingin a cing hi. Ni sagih a cin ciangin, "Nungak zuangzuang, tangval zuangzuang, zuang tho oh," ci-in a puanbu tung a sat leh, tangval hoih mahmah khat a tho a, Mu Nei Thang Dal ahi hi.