Kawlgam ah Asia gam 5 samin Car Rally bawlding

Aki gelhni: Thursday, 05 January 2012 15:48

Agelh: ZomiDaily

Bangzahvei kisim: 98

ZomiDaily :: Kawlgam ah tukhasung in Asia gam 5 pan Racers te ong paiding a, mawtaw hawl kidemna "Car Rally" omding cih Xinhua News pan kiza hi. Hih Car Rally hangin Kawlgam sung aom Racers te International Experience a ngahtheih nading in aki vaihawm hi ci'n State Media inzong Wednesday ni-in genkhia hi.

Asia sungpan ongpaiding gam 5 teng pen Laos, Vietnam, Cambodia, Thailand, Singapore cihteng ahihi. Hih Car Rally pawipi apiantheih nadingin Top Ruby Land Racing Karts Club te'n avaihawm uh ahihi. Hih Club panin thuneite khatin agenkhiatna ah tulaitak Local Racers pawlkhat akisin in ongpai zelzel uh a, Quality kisapna pawlkhat omlai-in thanemna tuamtuamzong omlai cihi.

"Formula One" ahih keileh "F1" ci'n akithei mahmah ahi leitung gamtuamtuam mawtaw hawl kidemna pen 1950 kumin ongki pankhia hihtuak a, F1 mawtawhawl te bangpen nasepdang kullo in, hih pawi kidemna tawh akivakzo uh ahihi. Kawlgam sungahzong gamdang gam 5 bang sapsawm in, mawtaw kidemna neihsawm cihpen khantohna namkhatmah hiveve hi. World Cup luttheih nading Football kimawllai daninbel Kawlte'n suangpeuhtawh nadeng keileh hoihding hi.

Top Ruby Land Racing Karts Club pen 2009 kumin aki pankhia hi a, huang azaina 2.6 Hectares pha cihi. November 2010 kum inzong Thailand ah ASEAN Family Rally kibawl a, Myanmar te'n "Congeniality Award" ngahngei cihi. Tua ASEAN Family Rally pen Thai Ministry of Tourism and Sports pan Sponsor apiak uh ahihi.