Kachin galtaite Huhna (KRRF) kipiakhia ta!

Written by Admin Tuesday, 31 January 2012 18:56

Share8

KACHIN GALTAITE HUHNA ( KRRF) PIAKHIATNA VAI PULAKNA

A tung a thulu tawh kizui-in, abeisa June 7,2011 ni akipan Kawl galkapte le Kachin galkap (KIA) te' kikapna hangin Kachin mipi 60000 kim inn le lo nusia in, singnuai gammual ah galtai/ dongtuak in om cih i theihsa ahi hi. Tua i sanggam dongtuakte Zomi min tawh huh zawhna ding ngaihsutna kinei-in, Zomi bup aitangin World Zomi Congress pan Kachin Refugees Relief Fund Committee kiphuankhia in Innteek semin leitungbup ah tangkona i nei hi. Hih KRRF huhna piakkhiatna tawh kisai anuai abangin tomkim le limlakna (Photo) pawl khat navawh (Attach File) ah muhtheih/ simtheih dingin kong koih uh hi.

Zomi min U leh nau akua maciat in itna le lainatpihna takpi tawh i piakkhiat sum kingah vekpi US$ 13013.95 pen January 28,2012, Saturday ( 6:30PM-8:00PM) sungin Vickery Baptist Church, Dallas, USA ah WZC makaite le KRRF Committee te in Kachin kipawlna makaipite' khut ah piakkhiatna hunpi nuamtak kinei thei hi. Hih bangin mihing genthei, cimawh le dongtuakte huhna ah neihsa sum le paii, tha le ngal akipan lungsim pumpi mahmah tawh mapang Zomite khempeuh WZC pan KRRF Committee min tawh lungdamna lianpi kong pulak uh hi.

Hih bangin Zomite i mapankhop ciangin Pasian hong piak thuphate i zeeksiamna le i kipumkhatna hong kilangkhia ahih manin, tu le atawntung in midangte le i biak Pasian ading nasem khawm zo semsem dingin Topa'n thupha hong pia ciat hen!  Tua bek tham loin, tutung a i mapankhopna tungtawn in namdangte in ZOMI min athak in hong theihpih semsem bek tham loin, i biak Pasian zong lungkim semsem dinga, Zomite thupha ngah minam hong kici semsem ding hi. Minam dangte tung pan huhna a ngenngen minam hi nawn loin, minam dangte tungah huhna a pia zo tawntung dingin Pasian in thupha hong pia behbeh lai ding hi. Nasep hoih sep ding cimtak ngei kei ni.!

KRRF huhna piakkhiat( ap-na) hun sungah WZC pan maikaite le KRRF Committee ahithei teng banah Dallas Zomi pawl khat zong kihelthei hi. I sanggam Kachin Kipawlna lam pan zong a zahtak huai makai thupi vive hong kihelthei uh hi. Sia Mungtawng ( Lasa siam) in hun hong kem ( Chair person) semin Zomi apai teng leh Kachin lam pan hong pai teng tawh, KRRF sumte kipiakkhia ( Ki-ap) ta hi ci in, pulakkhia in khutbetna tawh hun honna kinei hi. Pu Thang Lian (WZC-GS) in WZC dinmun (political stand), KRRF mapanna leh Kachin te leh Kawlte kikal ah Zomite ngaihsutnate a tomkim cing takin pulakna nei in tha kingah mahmah hi.

Tua banah Pu Thang Lian in WZC i dinpih, ngimna le tup bulpite le maban kalsuan zia ding pawl khat anuai a bangin pulakna nei hi.

(a) WZC in Zomite'n a bukim suahtakna ngahtheihna ding hangsan tak le citak takin ka phu ding uh hi.

(b) WZC in Zomite lamsang/ domsang, cing leh kemin, Zomite ngahhuai (rights), kitualvaihawmna leh,mimal tanvo( Rights) ngahna ding kasem ding uh hi.

(c) WZC in Galtai dongtuakte don leh kem in ka honkhia/ panpih ding uh hi.

(d) WZC in Zomite khantoh nang, hauhna , daihna le nopsakna dingin ka sem ding uh hi.

Tua banah KRRF nasepna tawh kisai a genna ah, " sanggam Kachin numei, naupang, pitek, putek dongin Kawl kumpite in cikzia lo takin abawlsiatna le a thahna, inn leh lo suhsiatsakna ,Kachin numeite buanna cihte khempeuh Zomite in Kachin mipite tawh kibangin kong lainatpih, kong thuakpih uh hi. Hih bang a gamtatsia Kawl gamkeekte Zomibup in nasiatak in ka mawhpaih uh hi. Na haksatna uh ka zak uh ciang in WZC in Meeting kinei-in, leitung bup a om Zomite khempeuh kiangah thuzasak in, KRRF min tawh nasep kipankhia hi. Tua banah Kachin te leh Zomite Unau khat hihna thute hangin minam dang bangin ngaihsutna nei loin, sanggam laizom taktak in ngaihsutna kong nei uh hi " cih thute genkhiatna nei hi.

A tawpna ah Kawlgam Union of Burman pen Kachin,Shan,Chin leh Kawlte in,Panglong khawmpi pan kithukimna belpawl gamin dinkhop ding lungkimna hong om ciangin,Union of Burma hong piangkhia ahihna thute gen hi. Tua masiah,ei leh ei ki-uk,kivaihawm thei ziau minamte i hi hi. Tua ahih manin hih Panglong lungsim pua in, minam le gam itna takpi tawh gentheih/ haksatna na thuaknate uh kong lainatpih mahmah uh hi. Tua mah bangin mai lamah ko, Zomite in zong tu aa mah bangin mapankhop theihna khempeuh ah thasial het loin,i ngah ding aa kilawm ngahhuai (Rights) muhmatan no tawh a kibang in kong panpih ding uh hi " ci in gen hi.

KRRF Committee pan Pu Cinpu Zomi (International Co-ordinator) in thugenna aneih khit ciangin KRRF sumte Dallas pan Lia Lalun tawh piakkhiatna nei suak pah uh a,Kachin lam pan Cultural and Traditional Committee pan makaipi huh Sia Htingnan La Sam leh Secretary Sia David Lahtaw te in zong thugenna nei ciat uh hi. Kachin Lam pan Sia David in Kachin galtaite' haksatna leh gamvai a genna ah, " Kachin  dongtuakte pen khawl ding lam manawh nai het loin, tam lam manawh semsem zaw ahih manin, mailam ah zong hahsatna a phu toto lai ding ka hi uh hi. Tutung laizom Zomite in nong huhnate uh dongtuakte ka zaksak uh ciangin lungdamin, thangah mahmah ding uh hi " ci in a thangahna le lungdamkohna thugen hi.

Kachin lam pan Vice President Sia Htingnan La Sam in zong thugenna tomno nei a, " Kachin te in hih banga Kawlgamkek gal ka do uh pen, Kachin mite ading bek hilo in, Kawlgam mualtung mi khempeuh tangin galdo ka hi uh hi. Kawlgam ah Panglong thukimna om ma in ei leh ei asuakta i hi hi. Tua Panglong thukimnate Kawlte in hong awlmawhsak nawn lohna hangin, hih bangin haksatna le buaina kithuak a hihi. Tua ahih manin hih i ngahhuai (rights) te i ngah masiah Kidona tawh kisai kikhawllo ding hi ci in gen hi. Tutung Kachin galtaite vai ah Zomite in nong panpihnate uh Kachin leh Zomite tangthu ah a bei ngei nawnlo dinga, kiphawk tawntung ding ahi hi ci in gen hi. Atawpna ah Dallas khuapi sunga om Vikery Baptist Church ah Pastor Jimmy Gallagner in hunzawhthungetna nei-in, a paikhawm teng khukdinin Kawlgam hoihna ding le Kachin gamah kilemna hong tunna dingin thungetna kinei hi.

Hun man khit ciangin Pu Thanglian te inn, Dallas ah Behte tawh thu tuamtuam holimna leh tutkhopna hun nuamtak neikhawm kik uh hi. Kachin makai lamte in a genna khatah Gam sung a om ka mipihte uh lungdam mahmah hi. Dollor pek khat nangawn mannei mahmah in mikhat zing leh nitak an ding hong lungmuang sak hi ci-in,a lungdamna uh leh i huhna sumte manpha asakna thute gen phapha uh hi. Tua ahih manin, tutung laizom Kachin galtaite i huhna hangin Zomite thupha ngah kipatna le kipumkhat kipatna hi dingin WZC lametna le thungetna ahi hi. Zomite khempeuh Topan hong makaih hen.

Zomi khempeuh tangin,

KRRF Committee,

World Zomi Congress

Headquaters,

Portland, USA