Humpi Nelkaai abang Motor Cycle leh Sihna vai kupna

Aki gelhni: Thursday, 05 January 2012 22:44

Agelh: Tongseal

Bangzahvei kisim: 125

Share

0 Comments

A thulu kasim ciangin, koi lai ah Tedim khuapi khawng, Humpi Nelkaai om thei peuhmah ding maw, ka na ci vat hi. Lion/Humpi neel kaai pen, tu tadih in, Africa gam khawng bek aa, kimu pen lai hi. Ei lam ah, a om a kigen lam zangei khol lo hiing. Tu a, i motor cycle vai pen, Huumpi Nel kaai i mihing te a thah bang hi le, a Humpi mah a ki beng kik ding, a ki vaai kik ding ahi hi. Motor cycle a hih mawk ciang, a motor cycle mahmah suhsiat cip ding cihlah hong hi lo buang aa, a hawl khial te vuak gawp ding, thah phial ding cih lah hong barbarian vai lua zel ding tawh kibang hi. Motor /Cycle suhsiat leh a mi vuak gawpna tawh - mi kitaih hong veng tuan kei mawk leh kimanna nei ngiat lo ding hi. Tua ahih leh, mihing te lungsim, Zia le Tong - hong kikhel thei him him phot leh, khee aa lampai te ahizong, motor, motor cycle zang te aa ding, gamtat dan ding te ki hilhcianna leh zuih cianna te om thei le bek in, phatuamna ki ngah pan ding hi.

Sweden gam ah Zero Vision kici in, kum khat sung Road accident, traffic accident tawh asi - kua mah om lo na ding, Vision na nei uh hi. Tua bang a neihna goal tawh na hong sep uh ciang in, kum 1 sung, mi road acident tawh 20,000 bang a si ngei pen, tu hun ciang in kum khat aa 200 kiim bek hong pha ta hi.

Sweden gam palik pen 16000 khawng bek om a, tua te un, Sweden gammi 10 million a encik zo ding hi peuhmah lo hi. A hih hang, Civic duty ci in, mimal khat papeuh in, motor license neilo aa, a hawl khat a om leh Police te phone set pah lian lian hi. Motor cycle leh a neu zaw deuh moped hawlsim na tawh tampi thuak kha hi. Tun a rule khauhsak semsem aa, license ngah nading bang haksa peuhmah sak uh hi.

1. Tedim khuapi ah, palik tam khol lo, mipi khempeuh encik zolo kha ding hi. Trafic leh Road transport zum ten zong un, sai zo gai khol lo ding uh hi. Mipi/mimal tavuan neihna ahihman in, mipi in Sang Inn, Biak Inn te ah Awareness neih theihna ding hong vai hawm ding kisam kasa hi. Lungsim pholaakna, khanlawhna khat zong neih ding kisam hi. Mipi un, Kawlpi khawng, tedim khawng ah public awareness bawl in, demonstration lianpi khat bawl leh hoih ding hi. Mipi lungsim lawng thei ding movement khat kisam. Tua hi leh a kisai zaw deuh department te un, action hong la thei tuam kha ding hi.

2. Veng le paam ah motor cycle hawl te, license lo pi aa hawl te - speed limit vaal a hawlte - thong kiasak, tampi liausak, a motor cycle mat sak cih dan phial ciang in action la le bek un, hong daai zaw deuh pan ding hi.

3. Kawlpi bang, motor cycle tawh a Si, a liam, tawm nawn het lo ding hi. Kawlpi kuam teng ah a teng, a tamzaw Zomi te vive hi. Motor cycle leh motor accicent hang a si te zong, a tamzaw Zomi te vive hi kha ding hi. Zomi kipawlna, Zomite biak inn zong Kawlpi, Tahan kuam teng tampen kha ding hi. Tua ahihciangin, Zomi te in, hi tawh kisai mi tampi i bei beh loh na ding, vaipuak lianpi khat i nei lai hi.

Zomi te, Biakna tuamtuam, kipawlna tuamtuam kigawm khawm in, ni khat - a niding ciangtan aa - Demonstration Lianpi khat - Kawlpi leh Tedim ah omsak zo leng, hoih ding in ka um hi. Tua tung tawn in, Road, Trafic, Transport, Police .... lam tawh kisai Ulian te tawh ki muh khopna - a ma kaai zawdeuh ten nei thei leh hoih ding hi.

Motor cycle, Motor, Mihing tam semsem aa, Lampi aa zat ding, siikaan te lah ki puahpha tuanlo cih pen zong, a ngaihsut huai mahmah khat hi. Lampi te kipuah pha aa, Lampi aa Zatding siikaan te zong, limtak aa hong kipuah phat theih na ding, mipi makaai zaw deuh te mah in, lampi a hon kul khaa ding hi. Kumpi sung ah a sai zaw deuh te tawh holimna, ankuang uum khopna te hong nei thei le uh- Biakna lam makaai te in zong tuadan khat tavuan hong la thei le uh.

WZA te bang in, gentehna in initiative, dialogue cih dan khat - Myonee kumpi te tawh hong nei thei le uh, --- lampi te, puah phatna ding, Siikaan te puah phatna ding, awareness nei theihna ding, sum le paai a om kei leh zong, Central / Baahuu dong - a phuto zo ding un, hong gel toto thei le uh- hoih kha ding hi. Amun aa om, mimal ki tam aa, kipawlna zong ki hau mahmah ahihman in, lungulhna leh veina taktak - hong om phot phot leh hih buaina tawh ki pelh theih nang na hong sem khia nuam mi, hong om toto ding hi. Na a ki sepkhiat theihna ding in, i gengen ding zong hong kisam takpi hi.

Pu Tong Seal