CIN PU LEH CING PI TANGTHU

Tangthu at  Dr.Hau Za Cin                     Cinpu leh Cingpi            Tangsaam pak nuai ah a vakkhop hialhial laitak un Cinpu in Cingpi kiangah a lungsim a om thu khempeuh imzo nawnlo in thakhat thu in meimual puakkham bangin hong genkhia zuahzuah hi. "Cingpi aw, neu tung sangkah khop lai pek pan hoih kong sak, tuni dong ka lungsim ah hong mangngilh theilo hiveng" "Na takpi maw" "He" "Ken zong ka paina peuh ah na thu bekbek ngaihsunsun ing." "Kei thu bang maw" "Nong ngai tam aw, cih khawng e" "Ken, kong gen ngamloh man hiven, hoih hong sa lua... 'ngaihno' kong cih ding bang na heh ding lau..." "Ka lungsim mu thei hilecin, a dim in nang bebek om hiven..." "Na takpi hiam Cingpi?" "Ka takpi hi "Ken kei bek in nang hong ngai kisa hiveng" "Ken zong kei bek in nang hong ngai kisa ing e... nang lah mite'n hong it thei peuhmah a... i sangkah khop lai pek pan, mundang na om zawh ciang zong hong ngai tam peuhmah hilo maw?" "Nang hizaw ni cia, kei mite in hong it lopi; hong it taktak om kei e..." "Ken hong it taktak ing" "Na takpi mah maw?" "Ka takpi mah hi. Ka gen peuh um nuamkei mah nicia" "Hilo, umlo hilo, na lungsim takpi nong gen ding umlo hizaw ing" "Ka lungsim takpi kong gen hi" "Ken zong ka lungsim takpi kong gen ai ve" "Bang maw?" "Na takpi ahih leh, ka lungdam si e Cingpi" "Nang kong it theih kei ka lungdamzaw.. nang bel na melhoih in hong it tam ding hi... hmm..." "Ken nang bek hong it ning... kei kamsiam zang theilo ka hi..." "Na kamsiamloh zong tua bang ci leng, na kamsiam leh hong umsak mahmah nicia u Cinpu" "Kamsiam cih zong a ngah ngeilo, zong a zang theilo hi mawk ing ei Cingpi" Khuadak in Thangmual dawn ah ni tum ding kimu ciciai ta: "Ka annek uh hunta, ciahta ni u Cinpu" "Kei tawh om ciang gilkial pahpah maw Cingpi" "Hilo, ka nu in annek hun pelh ding phallo hizaw, hong theisiam in maw.." "Aw, kong maingap man hi sam e, na heh ken aw" "Innkuan annek hun lapa ka ciah kul hi kei leh nang tawh khawlkhawl nuam lai ing, na kiang mah nuamsa ing..." "Cimtaak pah ni ciai.. gen nai kei dih o" "Nang kiang cimtak leng leitung cimtak hita ning...ha ha ha.." "Minute khat nangawn hun hong pia thuah theilo na hih ciang na kamsiam ah kinemkha ka hih ding lau ing e" "Ka nu in hong pattah dan hi. Innkuan a annek leh kikhop hunte ziakai lo ding... mailam ah ei adinga hoihzaw zong hikha ding aive U Cinpu" "Kalai, Cingpi na picinna ka muh ciang angtang mahmah ing. Nang tawh kikholhkhak hampha kisa ing... pai le, paita ni..." hoihzaw zong hikha ding aive U Cinpu" "Kalai, Cingpi na picinna ka muh ciang angtang mahmah ing. Nang tawh kikholhkhak hampha kisa ing... pai le, paita ni..." "Nitak annkham ciang kikhawm ni maw U Cinpu" "Awle, Cingpi... kong zawn dia?" "Zotding dang na neih kei leh hong zawn ve!!" "...sese ciai... kuamah zotding nei peuhmah khang ei... nang e, hong zawn ding a omkhin khawng ahihmel theihloh!" "Tua bang om kei e, kong maingap man hi U Cinpu aw, hong zawn teitei in aw, na ngak ding ka hi..." "Hmm tua hi ei i zaknop Cingpi, na kamsiam bek ahih hang, hong zawn ning maw, ...huah na innkatau vuah na nu in hong ngakta ei, annek lim in aw..." "Nang zong annek lim aw... I LOVE YOU" ...Ha Ha Ha.... ci a nui kawm sa in a inn lam uh zuan a, inn a tun dong a nuih kam theilo hi. Ankham ciang kithawi in nitak kikhop dak hong ginga, Christmas naih kuan ahih manin khuangpi leh khuangneu hong ging pah luapluap in kikhawm ding mite pai diamdiam uh a, Cinpu zong Cingpi zawn dingin a datmei tang 3 thun kum 15 a zatsa tawh khuazing sungah bawng ek leh vok ek sikkhak ding kidawm kawmkawm a pusuak khia hi. Cingpi te inn a tun ciangin Cingpi zong a sam sau ditdiat hiat heuheuh kawm in limlang mai ah na ding a, a nu leh a pa zong Labu leh Lai Siangtho tawi kawm in pusuak dingin a mansa in a om uh hi. Cingpi in a namtui viauviau tuisiang hong kikap seuseuh a, a muk keu loh nading muksanza a nuh khit ciangin a sam sau kai ningniang khatvei sawi vik phei in kihei a... biakinn lam a zuan khawm diamdiam ta uh hi... Khitui Gospel te Christmas Crusade zong hong naita ahih manin biakinn ah mi na tam mahmah a, kikhop nuam in lasak nuam a, mite lawp in biakinn sung dim phitphet hi. Maikal sunga Crusade ding vai hong kipulak ciangin Cinpu leh Cingpi zong biakinn sungah Pasian thu bek mah hong ngai hithiat ta uh hi...

Kikhop man ciangin Cinpu leh Cingpi zong biakinn kong mai ah kingak in lawmte mangpha khak khit ciangin Cingpi te inn lam a zuan khawm uh hi. Cinpu in a datmei tang 3 kum 15 a zatkhit pen mah de vauvau a, khuazing mahmah himah leh lampi kimu mahmah hi. Cingpi te inn a tun uh ciang a nu leh pa zong na tung khin a, mei na seem khin in phalbi khuavot dona in mei-awi uh a, Cingpi in holim kawma dawn ding Niangphan hong suangto hi. Kikhopna ah lasa Kapno leh a pawlte siam dan, thugenpa in Jesu Christ hong pian hun ding Kamsang Isaiah te genkholh nate a gente khawng kikum kik in, khuavot mahmah taleh kikhawm a tam dan leh lusu kuamah a omloh dan khawng a genkhawm uh hi. Tua banga a holim kawmkawm un Niangbel hong ham gigi a, a dawn panin meikhu hong kikhawhkhia chalchal in, a siin hong kipenglip seuhseuh a, a sunga tui so mahmahta hi cih kithei ahih manin Cingpi nu in Khintung um sunga Niangteh a khut tawh pham khat hong khah in tawmvei a sosak kik hi. Cingpi in Nianghai leh nungkal a pute hek Thangkhuai hong tawi a, meilum awi kawm in a dawn uh hi. Niangdawn khit, lengla dangte zong a ciahkhiat khit uh ciang Cingpi nu leh pa zong dingto in, "Khaih, Cinpu, no na holim ngap uh leh na tulai vo, ko na lum ta nung ei," ciin innsungpi lam a zuan uh hi. Cinpu leh Cingpi zong hong holim saan uh a, khuazan, khuasawt phawklo, meicih meitaang ding nangawn phawklo liangin a holim uh hong nuam mahmah hi... "Cingpi, na nu leh pa in hong zuallua hong sa diam?" "Mawk ciai u Cinpu, nang hong hawh kei lecin kua hong hawh nuam diam aw" "Den a hong hawhte zong nang hong hel mah hilo maw Cingpi?" "Ahih hang ken nang hong ngaizaw hi veng... na lungkia amaw? Hong hawh munlua kisa pah maw?" "Tua bang hikei e, kei bel hong hawh nuam den in, nang lam pan hong nopmawh khawng a om leh ka cihna hi" "Tua bang om kei, kisuanlahna ding om kei, hong hawh zel in... tua bang lam gen nawn kei ni, lungsim ki ze et nawn kei ni u Cinpu, ken hong muang hi veng..." "Ken zong kong muanlohna hi kei, ahi zongin nang pen na mel lah hoih, na nu leh pa lah Pasian thu hahkat, nang leh na sanggamte zong Pasian thu tawh hong pattah ahih cianga no hong ngai, no hong it ding pen tam mahmah ding cih ka ngaihsut man hi.." "A tam mahmah zong ken nang bek mah hong ngai nuam hiveng.." "Lungdam si e, Cingpi, na takpi hi dingin ngaihsun ing" "Ka takpi mah hi in, nang zong na takpi mah ding hong muang ka hi aw... ciampel kei ni maw" "Ciampel kei ni" "Tutung sangkhak nong ciah bangtan om thei ding na hia u Cinpu?" "Aw, tutung Christmas sangkhak pen kumthak tan om ning in, ka sang uh pen kumthak khit kha khat kha ni sawmnih ciang kihong kik ding hi. Hong hawhhawh leng ni tampi omlai e, hong cimtaak man phial niteh..." "Nang lah ciamnuih tawh thuah pahpah.. no laitan sang sinte bel hong theisiam banlo ka hi uh aw" "Laitan sang cih bang om tuan kei e, no sangsia te aive, thu leh la geel siam a, naupangte pattah siam" "Ko bel nisim naupangte tawh sangkah lai kihilh cih khawng hi in, pilna kibehlap nawnlo hiveh aw" "Pilna behlap bang kul nawn dia, pilna ngah khit teng zong bei nawn mawk ding aimaw... sangsiate mah a lungsim uh hat, manlang, siangtho, thukhual... kici hiven, nang zong na thukhualna nuam asalua ka hi uh hi" "'Ka hi uh' na cih ciang kua tawh maw?" "Sese cia, kei bek ka cihna hi in, kei bek lo zong nuam asa tam ding ka cihna aive..." "Ha ha ha....." "Cingpi, no zong sangkhak ci leng bang ciang lutkik ding nai vua?" "Ko a bel tan 10 sang hilel in, lutkik pah kha nung, kumthak khit ciang siapi pa in hong zasak inteh" "Na sanglut uh ciang ka pai nai kei leh na laihilh na hong mu nuam si'ng e" "Khui... ei lai hilh lai peuh muhnop sa kei lua niteh, nong hawmthawhna kipatna khawng ahih ding lauzaw ing e" "Hilo, tua bang hilo, kong itna khang semsem ding e... ha ha ha..." "Ha ha ha ... " Ti-ti ik-ik... Ti-ti ik-ik... Ti-ti ik-ik... "Khaih, nang kiang om leng zan sawt zong phawk khang ei Cingpi, ak hong khuangta mawk ei" "Ken zong nang kiang om leng khua phawk kei ing. Giak in ci leng lah hi theilo a, zing ciang hong hawh kik teitei in aw u Cinpu..." "Aw le, nang kianglo hawh utna zong nei kei ing..." "Mangpha hoihtak na man in aw u Cinpu..." "Nang zong a pha sem aw Cingpi..." A u Cinpu kha zo kong khak a khak khit lian leh a nu zingtho ding hong thokhia luatluat a Cingpi zong a lupna lam a zuan phei pah hi...

Cingpi nu lokuan hong tung niangphan a dawn khit ciang kisil dingin tuikhuk lam manawh a, tua sungin Cingpi in vok ann pia, a pa in thuk tunga ankam keu leh beli kihuan na satsuah a, tua laitak in khuamual pan Hanla sa vauvau khat kiza a, amin sial khit, thau lawng nga a gin khit ciangin khua khunga Pa Kap in a gamvakna Thangmual nuai lamah Ngalkhat khat man hi cih a telpah uh hi. A sawtlo in Cingpi nu kisil zong hong tunga, a pa tukbel zong tumta ahih manin nitak ann a ne khawm liailiai uh hi. Ann kham ciang Cingpi in ankuang teng seng in a nu leh pa meikiangah mei-awi in a om laitak uh huankhangpa hong hawh a, meigei ah a holim uh hi. Tua laitak innkatau hong kisik ging luapluap in, kongkhak hong kikiu a, Cingpi nu in, "Hong lut aw" a cih khit ciang,"Kua teng om nai vua?" ci kawm in Cinpu a datmei tang 3 thun kum 15 a zatkhit pen tawh hong lut ngawkngawk hi. "Ko teng om ung e, hong tu suk in. Mei kiangah hong tu phei in..." ciin tutphah a na pia pah satsat hi. "Anne khin maw u Cinpu?" "He, ne khin mah ung ei Cingpi. No e, tu nitak bangmeh nai vua, lim ngel inteh maw?" "Ei meh bang peuh lim kei e, Ankam keu leh Beli khawng hi.. no meh limzaw inteh" "Ko zong tua bang khawng mah hi. Tu lai phalbi tawh meh ding hamsa pianpianta e. Zan ni ka nute mehzong zong Ciingngek leh Tumngek neu cikcik hong pua uh a, lamgei a Khaunai teh leh Taaknal teh khawng tawh, khuakhal meh a kine panpan hita ei..." "No meh na hau pah ve vua le u Cinpu..." "Nong sim dia, hong sam nuam kai ve..." "Mawk peuhmah, khangno ann siim in kipai ngeilo i khanglui dan ahi veleh..." "Tua bel khanglui dan hiven. Tun ei khangthak hun ah bel khangno taleh anne in kisam, ansiim in kipaita lel hilo maw. Nungak khawng zong mi inn ah annsiim in pai vangvang heuh uh ei..." "Ha ha ha... na inn vuah annsiim in hong pai vangvang mawk leng maw... ka nu a nuihza lua ding..." "....bang e Cingpi?" "Eh, ih maw ka nu, u Cinpu in anne in kong sam ding ci a, hong pai leng ka nu a nuihza lua ding a ci hi ing e... ahi na nu?" "Aw... tua bang maw na gen uh, zong na za cianlo hi ing e. Ko hun ciangciang ah i khanglui ngeina hi in, khanglaite mi in ah anne khawng, sa siim khawngin kipai ngeilo aive. Tun zong khangthak hun i cih sam hang nang bang na pai ding kilawm sa keng e..." "En o u Cinpu, ka nu in zong a ci pah ve... kilawm salo..." "Na utlohpi bel bang i hong sam ngam mah dia... ha ha ha.." "Nang lah hong nuisak pahpah teh... nang tawh anne khawm ding cih khawng i ut pen ahih hang i manglam in zong man ngam khang ei... no pipi khawng..." "Mehlim a nei zong hi tuan kei ung e, ka nu mehzonte i ngeina ah i phalbi khuakhal mehte hi a, i hong nekngaih man hi e... Ngalkhaat man in hong ne in cih bang hilo e... ha ha.." "Ha ha ha ... nang tawh hi peuh leh sa lo hang lim lel inteh... ha ha ha..." "Ha ha ha...." "Eh, u Cinpu, tuni thuthak khat kong gen ding mangngilh ing ei... na thei nuam na?" "Theinuam mah kei dia. Kei nong phawkna khang deuhdeuh cih khawng hileh maw!" "Ha ha ha... tua bel ahi sa hi a. Tuni thu thak pen maw... ka nute'n a lokuanna vuah lonawl ah Khuai kua khat mu aive, i to diam?" "Kalai, to peuhmah ni ei. Zingciang kuanpah ding i hia Cingpi?" "Tulaitak pen Beli kila khinta ci leng, khuai bel a hawm dekdekta ahi ve... lak pah kei leh na lengmang khin man ding uh hi.." "Eh, hi mah ei Cinpu, tuni lonawl ah khuai khat hong leng in ka et et uh leh a pam ah a kua na om. Tunpi hi in a lamtual zong lian peuhmah in. Na man khat uh ciang va la le uhteh aive..." "Awle nu, va la nung ei. Kua teng i zawn dia?" "Na lawm ding khat zawn in la, numei khawng zong na tonpih nop uh leh Cingpi te khawng paipih gawp le uhcin aive..." "Hmm...... awle nu" "U Cinpu, niang na dawn o... ka pa na niang ding, innuaipa na niang ding, ka nu na niang ding..." "Lungdam si hang e Cingpi, nang mahmah hiveh aw na kiangah om om i ut hihbang hi ei. Lai Siangtho in 'tuiluang kianga sing suan a gen bang hi' i kisap peuhpeuh i gei ah hong kipia pah... ha ha ha..." "Tua tuilum peuh lungdam tak kei ei, a lim kei zong na dawn o u Cinpu, ka neih sunsun uh hi ei" "Cingpi, nang tawh om leng, tuilum tuisik bek ahi zong lim ngaungau hi..." "U Cinpu, nang banga kamsiam tui ka suahkhak manin a hampha hi ing.." "Ka kamsiam hilo, nang tui suak pen tui dang khempeuh sang limsazaw kai ve.." "Kei zong nang ading ahih nak leh tuilum hi aw, tuivot hi aw, a bang a bang suak nuam den kai ve..." "Kei zong nang suah hi peuh leh a lum, a vot, limsa den mai ing.." "U Cinpu, tua na gente nidanga na hawhna ngei zelte in na za leh a hehmah ding uh maw?" "Ha ha ha... heh ding uh amaw? Hong ngailo te'n bel hong hehsansan zong ahi theimah himaw?" "Hong ngailo uh ahih hang nang ngai peuh lecin hithei lel lo amaw?" "Sese cia Cingpi, siam lua zel teh. En i ngaih hang kuamah in hong ngailo hiveh aw. Ei bel hong ngai peuh a kingaihsawm hita ei. Ka datmei tang 3 thun kum 15 ka lei zawh kum 15 bang phata in maw, Masi tamveipi kizangta hiveh aw..." "Tua bel nang ut thu hiven. Lai simsimlo in hi lecin tun balpi bangin na vei na tak ah balke luai zeizaita lodia.. ha ha.." "Sangkah hang hong ngai om peuh leh bel tuate ahi theilua hi a maw... " "Nang hisak nailo na hih cianga ahi nailo hilel ei... nang deihtel man hizaw" "Tua leh gentehna in, nang bang hong hawhhawh leng hithei lel ding aive maw?" "Ka nu leh pa in hong phal peuh leh bel hithei tham e, ahi zongin amau hong phalkei leh bel kei bek ta in hong neih uh ahih ciang thumanglo suak ding kaive maw!" "Aw, himah ei Cingpi... tua leh kong hawhhawh hang a metna ommello ding aive maw?" "Tua bang hipah sam kei e, ka nu leh pa in zong nang pen hong pakta in na migitna, na kuhkalna, na hanciamna tuamtuamte thei in, na nu leh pa na huhdan, na kepdante zong thei in, ...tun zong alup khit uh hang lupna tung pan i kiho teng hong ngaingai ding uh hilo maw..." "Kalaisai, zumhuai si e Cingpi, ana heh kei unteh maw..." "Heh kei unteh, na nuinui lel lo ding uh hia..." "Cingpi, na lup ding ciang i zing sing ding na tum mangngilh kei in aw" "Awle nu. Nang na zan zun nawn hita maw..." "He, tuni tak i mehtui tam hawp ban ah huankhangpa tawh niang tam kidawn ahih cianga ka zun suak pahpah hiveh aw. Na lumkik ning ei... khuavot tawh na mei uh kuangsak un, khuazing ah om kei un..." "Awle nu..." "Cingpi, zan hong sawt duaiduai pahpah ven, kei zong na ciahta ning maw. Nang kiangah om leng hun pailam zongkithei kei ei. Nuam kisa semsem himawk..." "A zak nuam ei, na takpi hileh utlua ing u Cinpu" "Ka takpi ahih lam tel semsem niteh, kuamah ki cimtak lo ding aw..." "Itna kicimtak cih omlopi u Cinpu. Nang itna bek a kisam hi, kei itna khempeuh kong pia zo..." "... kei zong ka itna khempeuh nang adingin kongpia hi...." ".............. " ".............." "... Hong khahta o, ka nu te zuntha in hong tho kik kha inteh...." "..... ahih leh aw Cingpi ..... kei bek ciah ut kei siing.... " "Nang pasal hi vecin ......" "Hmm...... " "Mangpha" "Mangpha"

Innkatau a tun ciang Cinpu in a datmei tang 3 thun kum 15 sung a zatkhit pen a det veva leh kong paam a bawnghon giakte thakhat thu in hong ding khengkhang uh a, mihing mah hi cih a theih uh ciangin a taizak kei kik uh hi. Cingpi in zong sialkong khak in innkatau gei ah a zuntha a, zing sing ding tum kawmin inn sung a lut kik hi. Meiphual in, tutphah teng senga, tap gei meivam lengteng a phiatsiang khit ciangin lupna lam a zuan hi. Cinpu zong Cingpi te inn kong mai a tun pan kipan lam tawntungah kingiahsun a, "... nang pasal hivecin.... " Cingpi cih pen a ngaihsunsun hi. Bang a cihnopna ahi tam aw, hong ngai taktak ahi tam aw, a nu leh pa in kei hong deih taktak ahi tam aw... ciin a ngaihsunsun hi. A paina ding lampi nangawn phawk nawnlo in a datmei tang 3 thun kum 15 a zatsa pen kawkna lamlam a zuat leh suangtum khat phul kha in a khanglo vat a, a lu pei in a inn lam uh a zuan vingveng hi. Inn a tun ciangin a lupna tungah tu a, a lup ding lah a ihmut suaklo, a luploh dinga lah ahih ding omlo. Khuavak ngaka tutsuak ding lah a metna omsalo, .... Cingpi toh kiton kha leh maw... ci kawmkawm in a puansuah a, phalbi huih hong nung hiauhiau ahih manin ut takei leh vot ahih manin a lupna tung a kidenna hi. Cingpi zong a u Cinpu ciahzawh a lupna a zawtpah hangin ihmu theilo, kilumletlet, .... ka u Cinpu hong hawh zel hang, hong ngai takpi tam aw, a lungsim takpi tawh hong deih tam aw, a itna takpi ka tang kha tam aw... amah bang laisiam mipil hi a, a kamsiam bek zong kitel zolo ding ahih manin hong itna taktak a lahkhiat kei leh hong it taktaklo cihna ahi tam aw.. aw, aw, aw,... ciin a ngaihsun kawmkawm hi. A nih vua a sangkah khoplai vua lawmngaih tuam tuak a neih thute uh a ngaihsut ciang a tu phingphing a amau gel kituah kik pan cih pen Topa gelna mah ahi tam aw ci-a kinem kawm zel siin ihmut a sawmta hi. Ahi zongin ihmut a sawm nak leh ihmut suaklo deuhdeuh a, khatvei leh veilam, khatvei leh taklam a hekzel hi. Khuanawla singtung giak vasate zong a hun hun in ham zeuhzeuh zel uh a, inn kiu a akgil sunga ak giakte zong mangsia uh hiding hiam khatvei leh a kha uh zap duahduah zel uh hi. Khuavak lah nai pah nai samlo ahih manin 'khattanga lup pawh zan sawt nuam tei ei maw' cih ngaihsun kawmkawm in a khuisa zel hi... Titi-ikik.... ci a thakhat thu a huankhangte akluipi hong khuan ngeu ngau ciang in Cingpi zong khanglo vata, a ihmu theilo akisak leh ana lusu man bel hi ding hi. A nu zingtho dingin lupna pan tuakkhia a, taptung lam zuan in a khe ding phei seuhseuh hi. A sawtlo in meikhu hong nam vauvau a, a nu meimut ging kiza vangvangin a mutlawng taptung a koih ciang ging sangsang zel hi...

Ninoni ahih manin Cingpi zong ann kham ciangin kal khat sung nasep puan teng sengvang khat sungah guanguang in satpiangvui leh keuphal lianpen tawi in tuikhuk lam a zuanpah hi. Veng leh pam pan puansawp ding hong tung ziahziah in tuikhuk kimvial in mite in puansawp ziahziah uh a, lo kuan ding vai nunung te zong khuanawl lam ah mualkhum vangvang uh hi. Sing khul tawm ding singkang kuai a pai nupila te zong hong tung sangsangta uh a, puansawp khin masasa zong a keu manloh ding lau in inn lam a zuan pah vangvang uh hi. Cingpi zong a puansawp ding tampian ahih manin a kuangpi sungah satpiang vui tawh diah in, a kheng deuhte vuttui alpen te tawh dian thuah a, a sawp nopnop ding sawp masa in a kianga puanbanna ah a khaito pahpah hi. A tung tawh a ciah tawh kileh naunau uh ahih manin Cingpi keuphal zong nupi ciah ding khat in a puansen kawm in pal kha a, a kitam pah phek hi. "Phamawh kei, inn ah a dang zong nei lai ung," ciin a hehnem hi. Inn ah a lianzaw om nawnlo a, a taktakin bel a it sim giugiau hi. Ahi zongin 'siam kituh' cih bangin maisak ding a innkuan kisinsak dan uh ahi hi. A keuphal kitam teng a gei ah ninbawm sungah pai pheiin a puansawpna mun ah a tut kik ciangin a kim a kianga nupi te a sungteen cih bang om seselo ahih manin kidawk phengphang hi. "Guai, i tutdan khawng zong laih zel dih ni ei... ha ha ha..." ciin ciamnuihna tawh a thuah kawmkawm uh hi. Amah bel nungak kizen mah in om ahih manin a sungteen a omloh hangin a tukhial sese kei hi. A man ciangin a puansawp khempeuh sengvang sungah guang in a talo teng kuangpi sungah koih a, a lu tungah suang in aciah pah hi. A nu in a annsepna lawhpi lei lak ah nga in Cingpi puansawpte innkatau tung pan na sanga, a pho khit uh ciangin inn sungah a tum uh hi. Ni hong sang mahmah ta a, sun ann nek hun hong hidekta hi. Cingpi nu in zong a annsep zota ahih manin a nuta un sing khultawm ding pua dingin khua khung lam a zuan uh hi. Singpua dinga khua khung lam zuana paito ngeungeu pen Cinpu in a innkong tualzang uh pan na gal muh a, etlawm sa in a gal etet hi. Gamlak a Sazuk ta hialhial bang, singhiang dawna Vaphual tu litliat bangin etlawm a sa a, a encim thei kei hi. Ahi zongin enen leh a singeh zo manlo ding ahih manin 'khui' ciin a nu singkhul ding a ehsak kik vatvat hi. A sawtlo in Cingpi te nuta zong khuamual pan singkang sengdim pua in hong tung lutlut uh a, a mai lam ah hong ngat uh ahih manin Vaphual mei ngo bangin a pak liatluat hi. Tua ni in tua sanga muhnop zaw Cinpu adingin omlo hi. A nu tawh hong kitonsuk hial hial uh, a inn lam vuah kihei phei ding laitak in Cingpi in zong a u Cinpu galmuh hiding hiven themkhat a kiziakaisak pian a, a u Cinpu in zong "aw, aman zong hong mu ai ve maw..." a ci pah hi. 'Kampau hetlo in kigalho' acihte uh ahi hi. Sun ann nek hun a, bal leh kawlkai a singpuak ma vua a suan pen uh na minta ahih manin thuktung pan thuukkhia in ciang sungah bung uh a, a tui a kan ciangin pialkhangah naupangte tawh a nekhawm uh hi. Akpi nokai gilkial zong inn sungah hong lut pahpah a, nek ding a muh loh ciangin ippi sunga vaimim peuh a tu vang satsat hi. Akno te zong api nungzui in hong lut damdam zel uh a, Cingpi nu in 'seih, seih, seih' ciin a hawl zaak zel hi. Nitak lam hong hi a, tualpi lam ah football hong ging in, phit hong kitum vangvanga khangno kimawl utte tualpi lam zuan in a kidelh zangzang uh hi. A en dingin papi naukem pawl leh putek thahatlaite a pai ngeingai uh a, nupite ahih leh nitak ann huan dingin a mei uh a tawh vatvat uh hi. Inn kim phial ah meikhu ngengngang in a sawtlo in hong kam a, mei kuang ta cihna ahi hi. Tualpi ah football suite zong gamlum mahmah uh a, phit zong a kihal khom in a ging zauhzauh zel hi. Tua hun tak ciangin Cingpi zong nitak lam tui tawi dingin hong belkang khat lusuan in hong paikhia a, a khuadak leh tualpi sungah a u Cinpu football sui a tai vangvang a galmuh hi. Tuikhuk ah a lawmte in, "Hmm... en aw, hua gal ah football siampa kua ahia?" ciin na ciamnuih uh a, maizum si, lah nuamsa si ahih manin a lehnuih vaivai kawm in "... no mahmah, hong maizumsak uh teh.." a ci hi. A lawmte in tua ciang nuamsa semsem ahih manin nak noh semsem uh a, a pai kik ciang zong a ciamnuih ding uh theikhol ahih manin a muk hum kawmsa in a tungzel hi. A ciah kawm in lampi ah ngaihsun a, "Ka kikholh uh pen mite'n a theilo ding ka sak leh mite'n na thei khinlua hiveh e maw... thu pen sel theih om kei ei..." a ci hi. Tui lah tawi khin, vok ann lah pia khin, nitak ak giah hunta ahih manin amah zong akbawm teng innpua ah koih in akpi leh a note a lut diamdiam uh a, ni zong hong tum khin, khua zing ding ahih manin tualpi ah football suite zong a ciahciahta uh hi. Cingpi zong nitak annek khit ciang a u Cinpu hong hawh leh bangciin ka hopih tam, bangteng ka gen tam cih khawng ngaihsun kawmkawm in a nitak ann nek ding uh hong thuk a, a pa committee zong hong tungta ahih manin a nu tawh a thum un anne dingin a kithawi uh hi. Ankuang thunget gualpai uh ahih manin tua nitak Cingpi in a ngen hi. AMEN a cih ma deuh uh dak hong ging mengmeng a, a gin kihal pian ahih manin Amen a cih khit uh ciang a khuangaih uh leh vengpi lam ah minsial in thau hong kilawn a, hausapa tapa zu khamkham pen si hi ding cih a um mawh uh hi. A kong pam vuah a pa a va khuadak leh hausate inn hitakpi a, football sui ciah nunungte zong a tawppah uh hi. A sawtlo in a upmawh pen uh na hitakpi a, amau zong anne mengmeng in nitak kikhopna ding lam a lungsim vuah a tam nawnkei hi. Kikhop khit ciang si inn ah hawh ding leh zanhah ding himawk ahih manin Cingpi zong a puan lum theithei silh in puanza lum tawh a kithawithawi hi. Tua laitak in kongkhak hong kikiu a, "hong lut aw" ci kawm in a hon leh "kua teng om nai vua?" ci kawm in .....

Misi inn lam ah nupi te puandum silh in sigal dingin pai ziahziah uh a, papite zong puanlaisan liangbat in a tukbel uh pet khu veuveu in a vok ek bawng ek kawmlak ah a pai kianghkiangh uh hi. Misi om hang Ninoni nitak kikhop om ahih manin biakinn dak hong ginga, kikhawm ding te biakinn lamah pai mengmengin a sawtlo in kikhop hong tawppah hi. Kikhop tawp ciang Cinpu leh Cingpi zong misi inn lam ah si tutpih ding leh ngeina banga zanhak dingin a pai phei uh hi. Kha lah tanglo, khuasung meivak cih bang lah omselo ahih manin a datmei tang 3 thun kum 15 a zat khitsa pen mah de vava in a pai a, a maivua pai nupi pawlkhat bangin Cinpu datmei ngak in lampi ah na dinkhawl uh hi. A vekpi un tonkhawm in si inn a tung uh hi. Tangval upa lam pawl leh papila te in lasak na kipan uh a, nupi papite misi luang kiang naih lam ah tu in nungak tangval lia leh taang te pen pialkhang leh siluang tawh kigamla zaw deuh lamah a tu uh hi. La makaite in la hong pan uh a: Jordan gun gei ah ka dinga A gal lam ka en hi Kanaan gam nuam ka galmuh a, Ka luahna ding gam hi. Tua gam nuam sungah ei i khawl ding hi A nop tawntung gun gal gam ah, Nungciang in Moses leh Tuuno la sa khawm ding, Zeisu tawh maang tawntung dingin .... cih late a kisak khit ciang a banban in nupi te, papi te, la lunglut neite in la hong teel teel uh a, khua hong zan mahmah ta a, zankim hong hito pah hi. Cinpu leh Cingpi zong tutna khat ah tukhawm, liangko kisi hilhial in Cingpi paknamtui kiza veuveu lak ah la a sa hiathiat uh hi. Tutphah nuai ah Cinpu in a datmei tang 3 thun kum 15 a zat khit pen a koih khatvei leh pal kha, khatvei leh sikkha, khatvei leh a nungvua tute in sik kha cih bangin a kikhuk valval zel a, ahi zongin lasakna leh mipi nawngkaisak lo hi. Lasak khat leh khat kikal ciamnuih a gen uh ciang mite ciamnuih zong phawkkhalo dekdek in Cinpu leh Cingpi na kino man zel uh a, mite in amau banga ki it kingai pen muhnop asa mahmah uh hi. Nupi papi pawlkhat bangin amau hunlai kingaihdan tawh kibang sa in a paallai hunte bang uh a phawk vangvang liang uh hi. Amau lah sigal hinapi a dah hetkei uh a, sigal nuamsa cih bang ahi tuan kei uh hi. Dahna kawmkal ah zong lungnopna amu uh hi. Nitak zansawtma a nupi papite ciah madeuh, zanhak dingte bek a tutsuak hun ding nitaak hun zatna ah sineite inn kuan panin thugen uh a, "Tuni a, lametlohpi a ka tapa uh tangval lai a hong nusia ka dah mahmah uh hi. Ama nuntak sungin a hun tamzaw ah mite lungdamna ding a bawl tampi gending ka thei kei uh hi. Ama gamtatna pen ip omlo in khuazangbup in a theihsa hi a, a kilawmlo hong gamtat khak a omleh na maisak un..... cih bangin a thuumbawl hi. A nuntakna pahtawina hilo a, a sihna ah hehnem dinga mi hizah nong paikhop uh ko inntek panin mimal kim tungah lungdam thu kong puak uh hi..." ciin a gen ding tampi nei khollo ahih manin a tu kik hi. A misi pen kuamah in apaktat kholloh, zu khamkham, mi adinga phatuam hi khollo, khuasung ading zong khuapih dinga deih huai hetlo leh nu leh pa adinga zong tapa dinga teel huai hetlo hikha ahih manin amau zong mipi mai ah a maitai hetkei uh hi. Mipi in zong misipa itna tawh gal ding cihna hilo in nidang pek pan ngeina in a kinei nopni dahni a kitutpih ki kahpihte zuihna in a paikhawm bek uh ahi hi. Ahi zongin itna hik in a pehkhak Cinpu leh Cingpi adingin a si pen mipha maw misia maw a phawk man kei uh a, amau gel ki itna tui buah a, picinsak mengmeng ding bek a lungsim vuah a lianzaw hi. "Cingpi, na ihmut a suakta hiam?" "Suaklo e, nang kiangah om peuh leng ihmuh suak lamlam zong phawk khang e u Cinpu" "Sigal zankim zong khengta, lasak zong gimta ding kong sak man hi" "Sigal hi in sigalloh hileh zankim i kheng ngeina hilomaw u Cinpu?" "Tua bel himah ei Cingpi... en o hia lai ah nungak ten tuilum hong hawm uh ei" "Ken zong ka va hawmpih ding aw, na tu in aw u Cinpu" "Aw, va hawmpih aw, na ut leh, ahih hang nang sangsia khat hive cin khangnozaw te in hong hawm thei lello ding amaw?" "Khangnote khut bek ah koih zong hithei khin kei e, amau zong gim ding uh hi..." "Aw, tua bel himah ei, a picing deuh khat in na makaih uh zong a kisam zel aimah ve, va saipih in" "Awle va pai ningin, ka tutna na khaam sak in aw.. nungak dang na tusak kei o...ha ha ha..." "Ha ha ha.... na tusak kei lua ning ei Cingpi, nanglo ngal!" Tuilum dawn sung papi te in zatep, tangvalte in a tutpih nungakte ciat tawh kiho, pawlkhat a kingai, pawlkhat a kihel ciil, pawlkhat a kingai zong hiseselo, pawlkhat a lawmte lawmngaihte tawh a tu khawm, alawmngaihpa/nu khua ah omlo khualzin cih khawng ahih manin. Tawmvei sung khawng hong gamlum henhan uh, mite innsung dimin tu khengkhang, gualnuam, holim khawng a muh ciang misipa nu a lungleng in hong kap duatduat a: "Mawtaw nau aw, na lawm na gualte nang ngai in pialkhang dimin tu demdam uh hiven mu nuamlo na maw nau aw.... aw aw aw....nang zong hong tho inla hong en in, na lawm na gual kim hi ven, nang zong hibang lianga na nu na pa hong khasia sak dingin hong nusia baih luateh bawi aw... aw aw aw... bu al khuang dia taikhua val ding kei na nu koi lam hek ding ka hiam nau aw.... aw aw aw... taikhuaval ciang na lawm na gual sianglam zong ding nanglah laikhun tungah lengbang khuanglo, pat bang tholo ding... na sakduang buanlei suak dinga thelbang thokik lo ding aw, nasa lua ing, na sa lua ing.... aw aw aw.... bawiiiii.... hong paisan baihlua veteh aw hong paisan baih lua teh... na tuun lung ka mawl man hiam, na zua lung ka mawl man uh hiam.... hong gen ve maw.... bang ding hong paisan pah na hiam... aw aw aw........ " ciin kap duatduat a, kiim a kianga te in ... khai, kapkap kei vo, hong za ding lah hi nawnkei ei, amah a hampha hi, gim leh tawl thei nawnlo ding, gilkial dangtak phawknawnlo dinga, vantungah Topa mai ah nuamsa ding hi e.... ciin na hehnem uh hi. Tuibuk tawh na khem uh a, a pa bel pasal ahih manin kipasalsak in kahtam lo seselo in tap gei pan a tuukbel tep kawmin a khitui na nul kawmkawm a, a lawmte in a holimpih uh hi. A khasiathuai zaw bel misipa tangthu gen peuhmah in amah phatna ding a neihloh uh ahi hi. A nu leh pa in zong a phatna ding uh omlo, khua leh tui in zong a phatna ding uh omlo, a khasiathuai ngiat khat hi sese hi. Ahi zongin Cinpu leh Cingpi adingin tua zan in tua thute sangin amau kikal ki itna bekbek a lianpen hi! Zingkhua hong vak ding hita, lasak zong gim pianpianta cih ciang akgil sunga akluipi in a kha hong zap duahduah a, a gei a ak giak teng zong phawng hileh kilawm takin a aaakkk duamduam uh hi. Tua ciang akha zap kik a, Titi ikik..... ciin hong khuanga, ak masa khuan ahi hi. Cinpu leh Cingpi zong a theihloh kal un zanhak ding ana hi mai uh a, a gim a tawl uh a phawkloh uh hang amau bek kingai hinawnlo in a mit uh zong na kingai mahmah man a, a lasak kawmkawm un a lusu dekdek uh hi. Ahi zongin ak masa khuang khinta ahih manin khuavak cianga zanhakte laih dinga hong pai ding nupi papi te phawng ding ak khuang khinta ahih manin a mit uh hak lela in lasak a zomkik liailiai uh hi. Khua hong vak in nupi papi hong lut zangzang uh a, zanhak nungak tangvalte annek matan khawng ihmu pak dingin a ciah ngeingai uh hi. Cinpu in Cingpi a inn vuah kha in, amah zong themkhat mengme pak dingin a ciahkik hi. Mengme panpan maw cih leh a nu in, "Cingpi, anne ni ei" a cih mumang phawk zuaizuaia, a thawhtoh leh zingsang annek hun na hita hi. Anne in a kithawi kik a, misi inn lam ah a pai kik pah hi. A u Cinpu zong hanto dingin hanmual lam ah bawngtu tawi in pai vangvanga, a sawtlo in Cingpi leh nungak dangte in hanmual ah niangtui a va puak uh hi. Cinpu in Cingpi hong pai cih a theih ciang hantawh bang hat deuhdeuh hileh kilawm hi. Cingpi zong a u Cinpu amuh ciangin a zanhahna mit san te zong nosuah mikmek kik hileh kilawm hi. Hantawh a zawh uh ciangin inn lamte in hankuang sungah misi sial in hanlam ah tanu bul leh tangval upa lamte in a zawnpih uh a, hanmual ah a vuita uh hi. Nitak lam ciangin khuasung sinung cih mah a dai khipkhep a, kuamah a gamlum cih bang zong a om kei hi. Misi inn ah khuazin zawh ciang tukhawma hehnepna lasak khawm ding mah hi a, tua ni Nipini dingin a gamdai mahmah nipini ahi hi. Khua khung mual tunglam ah Muvanlai nupa vanlam zuan in a lengto diaidiai uh a, vasa giak ding te in zong amau giahna ding sim leh mal zuanin a leng diamdiam uh hi. Thangmual lam manawh a leng muvanlai nupa te zong a len khawm kawm un aham zeekzeek zel uh a, nitum ding sakhi ni san singseng nuai ah tung sunni in mual hong khupsan ta hi....

Sivui khin nupi papi lo peuh amau inn lam ciat zuan uh a, nupi papite in si inn a va tawn uh hi. Nitak annek hun ciangin amau inn lam mah delh in ann a ne uh hi. Annek khit ciang Cinpu leh Cingpi zong si inn ah lia leh taang makaih a sigalna hunzatna dingah a pai sawm uh hi. Cingpi in ankuang a sen lamlam laitak in kongkhak hong kikiu a, "Hong lut aw" a cih khit lian leh, "Kua teng om nai vua?" ciin a u Cinpu a datmei tang 3 thun kum 15 a zatsa pen mah masuan in sangkil ah hong ding phei hi. "Ko anne khin pan ve ung e u Cinpu, nong nekpih diam?" "Ko zong ne khin phet, nong taisan khak ding laua hong delh pah vingveng ihi ve Cingpi" "No pipi taisan in i delh ding thei peuhmah khang ei, nang nong taisan zawk na mel.... " "ha ha ha..." "Na nute paita maw Cingpi?" "Pai nai kei, inn sungah kithawi uh hi, ka kuang hong seng mengmeng ning aw, mei na awi in... " "Kheih kheih... manlah kul kei lua... nang tawh om peuh leng manlahna ding omkei leitung ah... misi lah kivui khin, han sung pan hong pusuak in tai kik ding cih lah hisam kei.. he he he..." "Ha ha ha... ciamnuih zong a siam mahmah himawk ciai u Cinpu" "Cimphawng i cih man hi e, ciamnuih siam khol kai ve Cingpi" "Tua na gen zong na siam ngel ve, a dang zonghong gen lai sin aw u Cinpu" "Adang maw... ha ha ha... nidang ciang mihing pen kineu mahmah dingin manta kungah kikah thei ding ci ve uh aw... tua mah bangin mihing pen kipal mahmah dingin hoihtaka a kitengte pen sawtpi naupai lo ding uh hi, nausuak natna gimthuak cih zong omlo ding hi... ha ha... tua bek hilo lai, kuamah in naupai nuam nawnlo dingin test tube sungah khangkhia sak ding uh hi... ha ha..." "Mihingte ki advance mahmah ta ding cihna aive maw.." "He, ki 'advance' mah mah ta ding hi..." "Sese ciai, i mangpau theih sunsun hi ei..." "Guai, no sangsia ten mangpau thei kei le uh cin kuan thei ding ahia... i hong noh nop man bek hisam e" "A dang ciamnuih khat hong gen kik o, ... a man dekdek hita ing ei u Cinpu" "Thang Ho leh Lian Do te unau in taangtang kiphelhawm cih pen, phelhawm mah hi, ahih hang a phelkham ding kituh uh hi... ha ha ha..." "Ha ha ha... tua bel ka zak patna hi ei... a lianzaw tang ding zong kituh uh hi... ha ha ha..." "He, a phelkham ding kituh in kilai uh ahih manin a innvengpa un phelkhapsak hi... ha ha..." "Ha ha ha... na siam lua u Cinpu, va kithawi pak ning maw inn sungah" "Awle, hong sawtlua ken maw" "Awle" Cingpi kithawi sungin Cinpu in a datmei tang 3 thun kum 15 a zatkhitsa pen a velvel leh India bawl Eveready ahi cih thei saan a, amah bek na nuinui hi. "U Cinpu, bang ahia na nuihnuih?" "Aw, ka datmei ka velvel leh India bawl EVEREADY na himawk e" "Aw, ken lah khatvei innnuai ah aktui la dinga ka zat lai in ka mu pah a u Cinpu" "Aw haw haw.... en' en ngeilo hive hang, en nang bekbek hong en hive hang Cingpi, bangci datmei min i mu mah dia...." "Ha ha ha.... nang lah ciamnuih siamlua teh, pai ni ei leh kithawi khinta ing ei..." "Cingpi, tuni tak i sigalna ah lasak ciang hong en zel in aw, i tutkhawm hang midang kuamah en kei ni aw... ei gel bek ki enen ni aw..." "U Cinpu, nang midang na en zel maw, ken nang bek hiven kong etet... zan nitak in zong nungak dang en kei teh mawle?" "He, en keng ei, nungak dang ka et hang nang banga hoih om sa keng..." "Kei sanga hoihzaw a om hang kuamah dang en kei o" "Awle, awle... pai awle, pai ni, kong kong khak diam?" "Den ciang ka nute in hong khak lel un teh, amau paisan ni..." "Nu...na pai masa nung ei" "Awle bawi, na pai masa vua, khuazingah hoihtak pai un aw..." "Awle nu, ka u Cinpu in datmei tawi hilo maw, kidawm mah nung ei" "Sigal ding khangnote zong tampi na tungkhin uh e Cingpi, inn sungah mi dim dektak ta, ei zong lutpah ni ei" "Awle, ka zun hong tha pak ning ei... ka labu leh ka puanza na tawisak pak o" "Awle, koi leh..... (Cingpi puanza namtui si e, paknamtui nam viauviau hilo maw... hiiipppppp)" "Lungdam ei u Cinpu, lutta ni ei leh" "Lutphei suak inla, la makaipa nung gual tutphahsau a dawkto ah tu ni ei.. aw" "Aw..." Inn pha bel ah i pai ding hi Lungdamna tawh i kimu ding hi Tua mun nuam bel eiten i tan ciang Dahna om nawnlo ding... Tawpna la asak khit uh ciang sawmgiak dingte zong a nungak tonpih tek uh kha in vakkhia phot uh a, nupi papi te na tu dimdem uh hi. A sawtlo in sawmgiak dingte a zanpuan uh tawh hong lut uh a, nupi papi te zong a ciahpah sangsang uh hi. A sawtlo in tangval makaipa in "Lupna bawlta vo le" ci a, tangvalte zong amau lupna ding ciat a bawl pah sangsang uh hi. A lai ah lum ding hih utlo in a nawl ah lup ding kituh pian uh a, a lai ah lup pen meidawi vai sa uh hi. Ahi zongin a vek vua a nawl ah lum cih bang om theilo ahih manin a lupna bawl masasa in a nawl tang uh a, a bawl nunungnung in a lai tang uh hi. Lupna a bawlkhit uh, mei a suhmit khit uh ciang kongkhak innkatau hong kisik ging lamlam a, kongkhak kihong in a datmei tang lala kawm pan tangval zawlleng zansawt vakte hong tunga, a lup khit uh ciangin ak masa khuang pah hi. "U Cinpu, tu zan lasak sawt kei si e maw" "E, tuzan pen sivui zan hi a, zannitak ki zanhak khinsi, makaite in tawpna bawl baih uh hi" "Aw, ahi mah ve, kigim tek a, ihmut baih ding a deihna uh aive maw.. ei bel zanhak ni maw'' "Aive, ei bel zanhak theih hi. Ka khangno deuhlai, hih datmei ka lei ciil lai khawngin kei zong sawmgiak den hi in, lasak tawp ciang nungakte kha, ciah pah, sawm ah giak hiden hi. Tun bel ka datmei zong kum 15 bang phazo ahih manin khangnote lak ah sawmgiak zong nuam nawnlo in, khuapihte in zong hong theisiam uh... ahih hang, khat beka inn ah giak pen nuam kei... na theisiam hia?" "Aha, tua leuleu bel nang thu hiven. Nang ut a na teel hiven..." "Ut a teel bel hi kei in, a lem om thei mahmahlo hiveh aw... Cingpi..." "...niangtui khawng hawp kik ni ei, tuni na han hawhna khawng zong gim niciai..." "Niangphan leh Topa Jesu pen nolh ngeiloh ding kici hi. No inn bek ah niangtui kidawn ei. Ko bang bel a khumsakna ding zong neilo in a phan vive a dawnzaw ung..." "Eizong tu nitak bek a khum nei zo hang ei. Ka pute in zanni mikhualte hong khak uh hi a, i gim ding tawh a khum in dawn leng i cih man hi. Nong hawhhawh hang a niangtui takpi tawh zong hong do zo khang ei" "Khai, tua niangtui kisam kei lua, niangphan hileh zong na kiangah a khum pen hi mai... na aw za peuh leng niangphan aw, tuisik aw.. a vekpi in khum mai ei" "Kamsiam si cia U Cinpu... na zawlluite hampha ngel ei" "Zawllui te sang zawlthakte hampha sak zaw ding ka sawm hita... na utna" "Ei khawng i tangzo dia hia?" "Nang a masa pen a hampha dinga kong deih aiveeee..... " "Utlua a hong ciamnuih ihi vele,...." "Oh, I see" "Bang e?' "E, bangmah hi kei e, na melhoih hi a ci hi ing e..." "Hi kei ei, mangpau na zang bualbual veleh.... ken za hi veng" "Bangmah hi kei e Cingpi, na mel hoih hi a ci hibek ing" "Hi kei eeee... nong hilhnop kei leh lah nangthu hi...." "Cingpi na mei uh khulto vo, na u Cinpu in khuadam a sa kei dia" "Awle nu, mei am zong lum lel a ci hive ung" "Mawkmawk meiam bek tawh lum kei ei, mei cih un..." "Cingpi va ciahta ning aw, na nu zan zun nawn zonghong tho ta, zansawtta hi inteh" "Tu lai ve, a nuamlai veleh" "Na nute in sawt tu theilua hong sa kha inteh, zinglam ciang kimu kik ni aw" "Awleh" "Na mangpha in aw" "Nang zong a hoihzaw sem aw u Cinpu" "Aksi nelkai, zozam nelkai na man in aw Cingpi" Inn a ciahkawm in lampi ah la sa to hiauhiau a...(a lupna tung pan: hmmm.... tua u Cinpu i lasak pen ka zak ngei hi lua ei... ka lungzuangsak si e... a lungsima omtakpi mah hong sa khia ahitam aw, ka muhkik ciang bel ciamnuih ngel ning ei... cih ngaihsun kawmkawm in a ihmutsan ta hi... zzzzzz.....) Oh, oh, yeah yeah... Nang kong itna sialbang lian e Ka lungsima omte ka gentheilo... http://www.youtube.com/watch?v=kB8_NEezeAM&feature=related

Khitui Gospel Crusade ding hong tungta ahih manin Cinpu leh Cingpi zong Cingpi pa zuiin khuasung nungak tangval tawh Crusade Team te dawnin khuamual ah a pai uh hi. Cingpi nu ahih leh inn ah om in zindo dingin a kigingsa in om a, buh bel nihvei suangkik in, mehbel zong kek a, zinte hong tunma in Vok ann Kel ann pia khin in tui teng ana tawi dimdiam hi. Vaidawn dingte zong a tunzawh uh sawtta a vaidawnna Welcome Gate a bawl uh zong singsawl leh pak tawh zem in a lai ah banner laigelhsa "Welcome to Khitui Gospel Crusade" cih pen na suang bembam uh a, gate gei ah meikhul in niangtui na suangso setset uh hi. Meikhu kamta ahih manin nungak tangvalte zong holim in amau aa ciat tawh tukhawm uh a, lungzuan sinthu khawng mah a kikum ciat uh hi. Cinpu leh Cingpi zong na duai tuanlo in lamsak singbul dek ah sunmang tuamtuam leh itna ngaihna thu teng mah na malmal uh a, a pam a naupang singkung kahte ot zaizai khawng a zakloh hun uh tamzaw hi. A galvua Zolawkta tau ngeungeu leh vakiang ham zuazuate, vanungak gamta lengkhawm damdam leh ham keukeu te, tunglama muvanlai nupa lengkhawm hialhialte in amau lawmte kikholhna nawngkaisak lo a, a taktak in leitung in amau ki itna a nawngkaisak baanlo himawk hi. Nih bek om khawm lawm kingaite adingin leitung khempeuh amau hi a, amau khempeuh zong leitung hipah hi. "U Cinpu, nungkal teng na sangkhak zawh gim kisa peuhmah ni cia maw?" "Cingpi, nang tawh kikholhna te tawh kipeh zel ahih manin ka gim ka tawl zong ka phawk man kei hi" "Na pa tawh gamlak pai, sihna ah lah zanhak, ... na football suih nop tawh na tha bei tak in cia maw" "Nitak ciang nang kiangah tutkhawl a holim theia ka om ciang ka gimna teng bei zel e... na tongdam leh na niangphan mahmah zong ka damna hi... Cingpi aw" "Zingciang Crusade kipanta ding cileng nang zong na sep ding hong kipia tam si kei zong hong hopih man kei ni cia maw u Cinpu" "Nang tawh sem khawm kawmkawm ding ihih cianga kihona ding tamzaw lo ding maw" "Ka pa lah komiti vaihawm mi khat ahih tawh, kei bel ka nu huh in inn lam ah zinte na zindo zaw leng kilawm veh aw, kei sep ding hong kipia bel biakinn ah pak suan leh sun niangtui hawm ding khawng hi. Ahi zong Crusade Speaker ko inn ah hong tung ding ban ah makaite zong ka inn vive vuah kiphual ding ahih manin ka nu bek in sem zolo dinga, ka huh kisam zaw inteh... nang zong hong hawh kawmkawm ve maw.." "Kei sep ding khempeuh na pa ka dot zel kul dinga, nang kiang phalo in ka pai suak hitheilo hi... Topa lemgel ci kawikawi ni e" "Ahi ve maw... hong lemlem lel ding deihlua ing" "Kei zong nang tawh hun tampi zat ding mah lunggulh ing... Christmas ciang zong kikhawl zel ni aw.. nang longal ..." "Aw.. aw.. aw..." Khu-khui.... khu-khui... khu-khui... Khu-khui.... khu-khui... khu-khui... Khu-khui.... khu-khui... khu-khui... "Eheu, Crusade Team te gal mual ah hong ku ta uh ei, hong tung ding hita, nungak tangvalte hong paikhawm ta vo, niangtui kigingta un... naupangte zong hong paita vo, na pakkual te uh leh na thangkhuaite uh a kigingsa un na koih un...." ciin Cingpi pa, vaidawn makaipi in a ot buaibuai ciangin a sak a khang pan nungak tangval hong leng phangphang uh a, naupangte hong tun kim ciang vaidawn khempeuh a kisam khawm khinta uh hi. Niangtui hai gual diudeu in, nahteh tungah thangkhuai atsa in koih uh a, pakkual pia dingte a kigualh khit uh ciang mualpang pan papi aw khat hong khuh kheuhkheuh a, lampi hong ging phei sialsial in, ciangkhut tawh Crusade Speaker pa hong masa a, a nungah ama nungthuap teng hong dawk phei latlat in a pheituam mong uh khu vatvat in hong kalsuan phei uh a, nuihmai kimu in Cingpi pa in na khutlet pah a, maitai lungdam takin a banbanin khut kilen in, "Halleluijah" a ci ziahziah uh hi. Pakkual pia dingte in zinte kigual deudeu in pia pheiphei uh a, a tawpna ah niangtui hawmten, a zom ah thangkhuai hawmte'n.... a vek un naupangteng in zong niangtui hai a tawi khit uh ciang Cingpi pa in, "Lungdamkohna khat nei ni" ciin a nai lukhu lakhia a, vaidwnna kammal tomcik a gen khit ciangin a khut veilam tawh a mai khuh in Tungnungpenpa tungah lungdam a ko hi. Amen a cih khit bektak un Cingpi in a u Cinpu en phei a, a nih tuak un zum sim, nuamsa si... a nui hiuhiau uh hi. Tua khit ciangin niangtui dawn uh a, a dawn khit uh ciang inn lam a zuan khawm ngelhngelh uh hi. Naupang te lungdam in awng uh a, a masa ah a tai uh hi. Nungak tangvalte amau lawmnu lawmpa tek tawh kiton in a pai diamdiam uh a, zinte van a tawisak ciat uh hi. Cingpi pa zong Speaker pa tawh kiton in thu tuamtuam a holim uh hi. Cinpu leh Cingpi bel a nunung pen ah khangual zinte tawh holim kawm in a ton uh hi. Khuasung a lut uh ciang naupangte awng ngeingai ahih manin khuasung mi khempeuh na en ngeingai uh a, Cingpi te inn lam ah mikhual khempeuh a lut damdam uh hi. Tawmvei a tawlngak khit uh ciangin amau zintunna ding tek ah kikhen in nitak kikhop cianga kimu dingin a kikhen uh hi. "U Cinpu, annek lim aw... nitak ciang hong zawn in aw" "Awle.. no zong aw Cingpi" Nitak kikhop dak hong ging a, a nunung hih ding utlo ciat uh ahih manin ann kham masasa biakinn lam a zuan pah ngeingai uh hi. Cinpu zong a datmei tang 3 thun kum 15 a zatsa pen mah masuan in Cingpi te inn lam a zuanpah vangvang hi. Cingpi te inn ah Speaker leh makai diak pawlkhat zintung ahih manin lengla na tam mahmah a, pawlpi upa leh khuasung makaiteng na dim keei uh hi. Cinpu zong gamlum sa kawm, lah lutloh phamawh ci kawmkawm in, "Kua teng om nai vua?" ci kawm in kongkhak a kiuh leh Cingpi in na za pah a; "Hong lut aw" a cih kawm in Cinpu kongkhak a tungphei pah hi. "Hong tu phei in u Cinpu, tutna na kizon mai in" ciin Cingpi nu in na hopih a, Cingpi bel a kuangsawp tawh, a inn phiat tawh, a lengla do nop tawh a kicinglah mahmah hi. "Cinpu bel amah innteek hi e, a tut ngeina zel ah tu hen aw..." ciin Upa te khat in na ciamnuih a, Cinpu zong a zum sim, lah lungdam sim pian si in a om heeuhaau hi. "Inntek cih thadah zong hong hawh ngei kei ei, tu nitak hong hawh phophot ahiven" ciin Cingpi nu in na huai pah hi. "He, koi mah zong vakna ding theilo a hong dianglut mawk hi ing, ei bang peuh kuamah in lengla dingin zong hong deih kei veh aw Upa pa" "Cinpu nang bel migi, kuhkal, thanuam lai nungakte inn na sikna peuhpeuh bel kipenglip ziahziah lel ding hi" "Tua ci kei veh aw, kuamah kipenglipsak zo kei veng aw upa pa" "Tun Cingpi bang zong a zalo akineih hang a kuangsawp kawma i kihona teng na nuihpih simsim ding hilo maw... ha ha ha..." "Mawk peuhmah cia upa pa... ha ha ha...." ciin Cingpi a kuangsawp lai hong nui khia beba takpi hi. "Ka ci mah ve maw Cinpu... en ve Cingpi in a za sim veleh... Cingpi Cingpi... ha ha...." "Ha ha .... tua a hih leh va kithawi pah ning eleh upa pa, no lah siamlua uh teh" "Aw, va kithawi mengmeng, na u Cinpu in na powder gim khawng za nuam ta ahi... paipai..." "Cingpi, no lawmta i upa pa in hong kingaisak dekdek aive leh, hong nono leh hong kingai mai nuteh" "Tua hileh ut beek mah hang e Speaker pa... ka upa pa uh hong hawh zel leh ut peuhmah ing..." "Tua ding hi ei, innteknu, thungetna ah phawk ni ei..." "Hi ei Siapa, lungdam ei.... ciamnuih loh, i pai hunta hiveh aw, na man uh leh i pai diam" "Pai ta ni leh Cingpipa.." Upa te, Speaker te, makai teng ton uh a, a sawtlo in Cingpi zong a powder namtui kizut nam veuveu in a lupna lam pan hong pusuak a, a u Cinpu datmei tang 3 thun kum 15 a zatsa a kawm pen pia kik in, "Lungdam ei u Cinpu" ci kawma mit-hem ziau in, a gennop teng uh a kikum khin ziau uh hi. Kong khak a khak khit uh ciang biakinn kipat dak ginga amau lawmta zong ziakai lua lo dingin a nawh pai mahmah uh hi.

Speaker pa muakna leh zinte vaidawnna thugen Cingpi pa in a neih khit ciang solo, duet, trio, quarter, choir leh nupi te lapawl kizom diudeu a, a tawpna ah mipi dingto in "Innkuan in la sa khawm leng buaina lah om nawnlo" cih la sa in vekpi thungetna khit ciangin speaker in Pasian thu tawh thuhilhna kipan hi. "Tuni in na khua vuah Khitui Gospel Crusade a 1-veina kipan thei ahih manin Topa min i phat hi. Mailam ah zong Topa makaihna tawh hun tamzaw sem Topa tawh kikholhna hun i zat ding i lamen a, thu i ngen hi. Kei leh ka lawmte nong muakna uh leh nong zindona te khempeuh uh lungdam. Tuni tak i Lai Siangtho simna ding John 3:16 "Pasian in leitung mite hong it mahmah ahih manin A' tapa neih tangkhat bekbek nangawn hong pia ngam hi.... " cih a sim khit ciang Sermon kipan a, zan nai 9 ciangin tawpna la kisa a, kuamah lusu omvetlo hi. Vot mahmah taleh mipi dangkeu mahmah uh hi cih kithei hi. "Mi khempeuh a mawhsa i hi hi. Bangmah mawhna ka bawl kei na cih leh a zuaupi na hi hi. Na pumpi tawh na bawl kei zongin na lungsim sungah mawhnopna lungsim na neih leh zong a mawh khin na hi hi. Nungak lunggulhna na neih leh zong a mawh khin na hi hi. Pasal lunggulhna na neih leh zong na lungsim sungah na mawh khin hi. Lungsim a mawhna zong mawhna ahih manin mawh pulak a Topa kiangah maisakna i thum kisam hi. Mihing khempeuh i nu gilsung pan a mawhsa a suak ihih manin mawhmaisakna leh mawhmaisakpa Jesu ikisam hi. Tuni in na lungsim siangsak in. Na mawhna pulak in. Na mawhna kisik inla, siansakna ngah in. Topa in na mawhna khempeuh hong sawpsiang sak dinga, amah in hong lakmangsak ding hi..... Zinglam ciangin a ban zom zel ni in... mawhna pan suahtak khit ciang thupha i san dingte, thupha ngah bek hilo a ei mahmah midangte tungah thupha ihih theihna ding lampi te, i nuntak sung tawntung Topa tawh i tonkhop dan dingte i kikum toto lai ding hi.... Tuni tak i thugenna te Topa in thupha hong piaksak hen... Hong ciah ing, hong ciah ing, Vakkhia nawnlo ding Thupha tawh nanga hi ning Topa hong ciah ing.. a ki ap nuam khempeuh pulpit mai ah hong paiphei unla, Topa kiangah ki ap ni.... ......AMEN " Kikhop tawp ciangin Cinpu leh Cingpi zong mipi lakah a kizong mu pak kei uh hi. Mipi kikhawm tamlua, Cingpi zong pulpit mai lam ah na ki ap ahih manin tawp ciang a u Cinpu a muh pak ding zong a maizum keei hi. Mulo in lah a omzo kei a, a kimuh uh ciang ahi hiau huau uh hi. Kiho pakna ding omlo ahih manin a ki khutlet pong mawk uh hi! Cinpu in a datmei tang 3 thun kum 15 a zatsa pen hong mek de vava a, mailama pai nupi te puansa kising letlet khawng kimu thei in, vei leh tak ah mangpha kikhak ging kiza ngengngang hi. Amau lawmta zong nidang banga khut kilen kawma khuazingsungah ciahkhawm nawnlo in Pulpit tung pan thu kigen hangin a liangko uh zong kinawk kha lo, kikhoihkha lo in a pai uh hi. Inn ah a nu leh a lawmte na tung masa a, mei na khul kuang luahluah in, amau zong themcik a awi uh hi. "U Cinpu, tu nitak thugen hoih nasa hia?" "Hoih mah ei, i taw khai khai khaliang hang.. hong kisuanglahsak keei hilo maw..." "Bang kisuanglah keei na hia? No bang mihoihte adingin kisuanna ding om maw??" "Kalai, mihoih omlo, a mawhsa a suak vive ihihna thu hong gen hilo maw..." "Cingpi, na u Cinpu leh hiah na nunote niangphan na suah o" "Awle, nu.. ka puan va khek pak ning ei, koi maw u Cinpu na datmei kong kawm pak..." "Kawm kullo, na ut bangin zang in nanga dinga i neihsun zong ahih mel..." "Lungdam ei u Cinpu, na datmei bel hoihtak aive, India EVEREADY bel a hoih ngiat hi maw.. China Xingshu te tawh teh in..." "Hilua ei, EVEREADY sang bel nang mahmah hoihzaw thamtham lai ciai Cingpi.. ha ha... " "Ha ha ha.... hi lua ei Cinpu, siamlua teh..." ciin innsunga om khempeuh a nui ngeingai uh hi. "Heh o u Cinpu niangphan, heh o nunote niangphan..... na dawn vo, ka neihsunsun uh hi ei.." "Kalai lungdam si e Cingpi na u Cinpu bek na suah ding sa hang e, ei zong tang ding ihih leh lungdam ngel hilo maw... ha ha ha...." "Hi ei nunote, ka u Cinpu bel hong hawh ngeilo lua in suahlo ding ka hiam ka cih hiven... ha ha.." "Khuasung mite in Cinpu Cingpi te inn bekbek ah hawhta a ci keei uh a... en hih lai vive ah hong hawh sa hang e... ha ha.." "Hong hawh ngei mahmah kei ei, khatveivei a hawhna te a omloh ciang hong baang pak bek hi, hong ngai in hong hawh ngei kei veh aw..." "Kalai Cinpu, tua ci kei ve, Cingpi kiangah na hawhhawh o, i khuasungah i sangsia tangzang pen hi in maw, a mel lah hoih, a nuntak lah hoih, nang laisiam hisi, no laisiam tuaktuak kituak lua uhteh...mi dang cici nawn kei o, nidanga na hawhna te sang Cingpi ci zaw o..." "Nidanga hawhna cih zong a nei hi tuan kei hang e, lawmte a kizuizui bek hiveh aw.." "Nidanga na hawhna zel te bel zong pil, hau, siam, ahih hang kiphasak uh hi ei.. tulai ciang mite in mihoih mah cizaw ta uh hilo maw... hauhna khawng a hun in hong pha peuh leh zankhat thu hilel ei..." "Kheih kheih kheih.... vot peuhmah ei inn ka lam... no na tungta maw?" "He, hong tu suk vo, mei hong naih vo Siapa, na vekpi un, ko ka ci uh lumta ei, no hong naih vo..." "Kheih kheih no na tu phot un ko ka puan khawng uh hongkhek phot nung..." "Ko lumta ung ei Siate hong tusuk vo, meiawi kawm in kiholim ni ei." "Khaih, tu nitak kikhawm ka upmawh uh sang tamzaw e.." "He, khuazanga kicial hi in mi a kikhawm thei khempeuh hong kikhawm mah hipah inteh, tam gawp mah hang. Ka khua mipi uh tua zah leh pitek putek themkhat hong vakkhia zolo teng hipah ung ei" "Aw, tua leh na khua uh mi zong tam uh cia, na inn tamloh uh tawh tehna in... mi 800 bang val lua ding na hive vua... " "He, 900 kiim a kisim hi ung ei, khualzin leh a vakkhia pawlkhat tawh sim in... tam gawp ung" "Khaih, na holim un, kei na ciah ning ei, na vekpi un mangpha un maw Sia, siate" "Aw, tu lai ve a nuamdih ve, khaih tawmvei tulai aw Cinpu, zan sawt nailo pi... nungakte zong ihmuh suak nai ken teh... ha ha.... mate Cingpi?" "Bang e siapa... ha ha ha ..... ?" "Ha ha ha.... bang e nunote...." "Na u Cinpu ciah sawmta a Siate in hong ciamnuih uh hiveh.." "Ha ha ha.... "Ha ha ha..." "Mangpha cini maw u Cinpu, hong ciamnuih uh leh kong zui pah mai dia... ha ha..." "Aive mate hong zui pah mai ve... ha ha..." "Mangpha Cinpu... (lungdam ei Siapa)... mangpha Cinpu.... (lungdam ei Siate)...mangpha u Cinpu" Zan hong sawtta ahih manin lengla dangte zong khat khat in ciah uh a, Cingpi pa leh nu zong a lumta uh hi. Cingpi zong a lupna tungah thunget kipan a: "Topa aw hong maisak in. Hoih ka kisakna te khempeuh hong maisak in. Mawhna neilo ka kisak leh a neiluapi hi ing... Ka u Cinpu tawh ka nu leh pa lup khit ciang meikhul lo a khuazingah ka kikawi uh ciang ka u Cinpu ka lawmngaih masate bangin hangsan deuh leh aw ka cihte khiallua ing, a khut ka liangko pan themkhat khiasuk zek leh aw ka cihte khiallua ing Topa, ka lungsim in ka mawh hi... hong maisak in aw... ka lawmte in lawmngaih a neih uh ciang a omdan hong gen uh ciang ka engluatna te khempeuh hong maisak in, ka eng nawn peuhmah kei ding hi... ka lungsim in ka khial hi... hong maisak in.... AMEN" Cinpu zong a lupna tungah lum dingin kithawi a, Speaker pa thugen in a lungsim vut lua ahih manin mawhmaisakna a thum hi: "Topa aw, ka khial hi. Ka sangkahna ah ka sangkahpih numei te nik siing teenga hong pai uh ciang ka cilphul lianga ka mitphialo lianga ka et teta zel te ka khial hi... ka kidekta ding hi. Cingpi tawh ka kikholh uh ciang zan khuamial nuai ah ka datmei tang 3 thun kum 15 ka zatsa pen a vak pakpak loh cianga ka lungsim a om khempeuh hong paihkhiatsak in, ka khiallua hi. Ka lungsim in nang deihloh thute ka ngaihsun kha hi. Cingpi nu leh pa khualzin henla Cingpi bek inn ngak in om leh sawtpipi kitu thei ding ut leh kizanhak thei ding ci a ka ngaihsutna te hong maisak in... ko gel bek ka om uh ciang Cingpi in themkhat hong nehphei lai deuh leh hoih ding hi a, a liangko hilo in a mailam tawh hong neh mahmah leh hiding hi a ci-a ka ngaihsutnate khempeuh ka khial hi... mawhmaina hong thum ing..... AMEN" Sun zong sawt, zan lah tom ahih manin khangkhat zong lo manlo in khuavak nading akkhuang in a phawng pah uh hi. Zingsang ki ap hun hi a, dak ging khit bek leh biakinn lam zuanin mipi kidelh ngeingai a, Crusade nop kisa panpan ding hileh kilawm hi. Cingpi leh Cinpu zong zingsang thunget lap dingin nawhsa in biakinn lam zuanin a paina vuah a kibiing tuak uh hi... Ki-ap khit ciang zingann ne a sun ciang kikhawm kik dingin amau inn lam ciat a zuan uh hi. Cinpu ahih leh a ciahna lampi ah zan nitak biakinn ah solo nu lasak "Inn Lam Ka Zuan Hi, Zion Tembaw Tung Tuangin" cih pen a mangngilh thei kei a, a ciah kawmin a lungsim ah a sa hiauhiau hi: