Zogam Khua 80 valah Natna kilawhthei namkhat laang

Aki gelhni: Thursday, 29 December 2011

Agelh: TONGSAN

Zogam, Falam Township huam sungah nung kal December 18,2011 kim pawl akipan a kilawhsawn thei natna nam khat laang mahmah in, mi 80 val bangin lupmun ngakin om uh cih kiza hi. Tua natna pen tu ciangciang khua 47 ah om ta in, tulaitak Hnahtial, Ngailan le Haimual khuate dongah kilawh ahih manin, Cidamna lam nasem Siavuante in a hihtheih bangin panla in buai mahmah uh ci hi.

Hih natna pen bukkhuh pan kipan in, khuasik leh lutangnate tawh kithuah hi. A diakin naupang kum 10 nuai siahte in veizaw deuh uh hi. A si a om nai zen loh hangin , sihna dong a piangsak thei dipkuat huai mahmah natna khat ahi hi. Inn 40 kim omna Hnahthial khua ah hihnatna avei tam pen mun dingin kigen a, a tawm pen Mi 50 bang cina in lupmun tung ngak uh ci hi. Tua banah Ngailian khua inn 14 bek omna ah mi 20 bangin hih natna vei uh a, Haimual inn 22 lak pan mi 10 in vei uh ci hi. Cidamna lam nasemte in bang natna lian hiam cih thei khia zo nai lo uh hi.

Kawlgam sung a om State and Division 14 sungah Zogam a zawng pen in United Nations in ciamteh uh a, Zogam ah mihing Half million omna ah Zato picing 12 bek om ta zen hi. Kitangsapna om mah mah na pi galkap kumpi in sang leh cidamna lam ministry te State level ah koih lo uh hi. Tua ahih manin, Zogam khantohna ding le cidamna dingin Zomi khempeuh in kipumkhat in thungetna tawh mapankhop hun ta hi. Source