Yangon meikang dongtuakte huhna kilimpiak

Aki gelhni: Saturday, 31 December 2011

Agelh: TONGSAN

Bangzahvei kisim: 31

Share

0 Comments

Abeisa December 29,2011 (Thursday) ni zankim laitak a Yangon khuapi, Mingalar Taung Nyunt Township, Blaze sung meikatna ah a site le a liam a baite ading NLD party, USDP party le Dongho huh kipawlna honkhat in huhna pia cih kiza hi. Phungzi ( Buddhist Monastery) sang khatah NLD te in " Nobel Heart " cih min tawh zatui piakna sai bawl uh a, USDP party in zong Pheon zatui sai bawlin cinate zatui pia uh ci hi. Meikat ni zingsang in NLD in Anphel tun 100 , Khauhsuai ( Noodels), silh le teen, kuang le keu cihte banah USDP in zong mi 500 ading anphel piakhia cih kiza hi.

Donghu kipawlna (Social Welfare) kipawlna tuamtuamte ahi BG sisan pia pawlte in sisa hawm uh a, Yee Daih Foundation te in tuidawn ding le akisam pah vante huh uh hi. YCDC Committee in zong sumtang Ks.1000000 /- huhna pia ci hi. Tua banah Kawlgam ah mihau minthang U Zaw Zaw ( Max Myanmar Company) le U Tay Zah ( Htoo Foundation) te in zong akisam bangbang huhna pia uh a, adiakdiak in Htoo Company in dongte Camp ah Ks. 15000000, aliam zato lumte ading Ks. 10000000/-, Meiphelh nasem asite mi khat Ks. 1000000/- huhna piak dingin pulak ci hi. Mimal le Innkuan nangawn in lainatpih ciat uh ahih manin huhna kipia ziahziah ci hi.

NLD makai Daw Aung San Suh Kyi in Dec.30,2011 ni-in meikatna mun le dongtuakte kiangah hawh kawikawi in, akisap pakte le adiakdiak in Inn lamkikna ding huhna piak dingin kamciam pia ci hi. Meikatna hang tawh kisai akikan ciangin Godown 6 sungah Acid le Chemical thauvui kikoihna khukpi khat om a, tuate a katna pan hizah tak a khauhpai hi ci in, Meiphelh thunei khatin ciantak genkhia hi. Tua Acid le Chamical thauvui omna mun lian pen pi (Ft.10') thukin lei kiasuk zo ci hi.

Meikatna ah meiphelh nasemte mihing 6 in a midangte ading a nuntakna pia in, a phual ah sipah uh hi. A si vekpi pen mihing 17 si-in, 108 liamin, a site sungah meiphelhte mihing 6 kihel uh hi. Meikatna mun pen Tamew tawh kinai ahih manin, a si meiphelh nasem 6 te le aliam 22 te zong Tamwe meiphelh zum pan vive ahi hi. Inn kisiate a tam zaw pen Meikatna sangin tua a ging ngaih mahmah a puakkham hang hi zaw ci hi. Innkatna hangin innkuan 1080, Inn kisia vekpi 124, le supna vekpi gawm sumtang in Kyats Awn 1136 val suplawh ding ki ummawh hi. Source: Tongsan/7 Day News