Tuhun Ciang Degree Sang Kisam Takpi Hiam?

Aki gelhni: Wednesday, 28 December 2011

Agelh: Dr. Hau Za Cin

Degree sangpi na kisam hiam? A kisam takpi hiam? Khasum tamzaw leh nasep hong ngahsak takpi hiam? Hih dotna te tuhun khangthak laisimna ah a kilim dot mahmah thu khat ahi hi. Singapore gam ah sangnaupang a tamzaw in degree sangpi neih kisam sa vetlo uh hi. Degree masa ciang hun sa lel uh hi.

Tuhun ciang degree masa mah thupizaw: Banghangin tuhun ciang Master degree leh Doctorate te kisam kisa mello hiam? Tua te pen mimal lunglutna tawh zop ding hizaw a, nasep ngahna ding leh khasum tamna dingin kisam tuanlo hi cih ngaihsutna lian deuhdeuh hi. Bachelor degree ciangah mite in a sepnop uh semthei, a hih nop uh hih thei ahih manin a tunglamte pen 'a behlapna' (additional) hilel hi ci uh hi. Company leh industry te in 'nasem thei' 'nasep siam' 'khangno hilai' cihte thupisak in, degree sangpi thupisak masalo uh hi. Sangsia ding, thupi kankhia dingin kisam bek cise uh hi. Tukum 2011 sungin graduate khit ciang nasem pahte a dot kawikawi uh ciangin 10 lak ah 3 in degree sangzaw a sinkik sawmloh thu uh gen hi. Degree laidalpi khat lakna dingin sum tampi, hun tampi beisak ban ah kum upa to lai ahih manin industry leh company ah nasep ngah kik nading tampi ziakai hi, ci uh hi.

Degree sang neih a manphatna: Degree sangzaw na neih ciang na ngaihsutna hong tangzaizaw dinga, na khuamuhna hong lianzaw in, na nasepzia hong kidang ding hi. Singkung dawna tuang na bang dinga, pilna tampi na behlap hangin nasep siamna leh nasep hatna tawh kithuah khin tuanlo ding hi. Nasep na zon ciang mite in na nasep siamna, na nasepnop dan, na hahkat sawm dan, na sep ngeisa cih khawng thupi bawl ding uh a, nang pilna leh na khuamuhna a zaina bek thupi sa khinlo ding uh hi. Amau deihteng a sem mengmeng thei ding mi deih uh hilel a, a ngaihsun kikkik ding mite deih masa denlo uh hi. Tua manin nasep ngahna ding kibanglo cihna hi.

Degree sang a neite zong mundang ah kisuan pahpah thei ahih manin company te in deih masa khinlo hi. A kip, a kho a nasem den dingte kideih masa den himawk hi. Nasep kawma sangkah cih zong kideih mahmah khollo hi; ahang bel degree ngah leh a sepna nusia in mundangah kisuan ziau thei ding ahih man hi.

Nasem masa ding, tua ciang pilna sang: Degree sangzaw deih taktakte adingin graduate khit ciang nasep gina khat nei ding, tua pan dama part-time maw, ahih kei leh nasep khawl in sangkah kik phot maw cih bangin sin kik ding hoih hi. Tua hileh tua bang mite kipakta hi. A sepkhitsa, a sep theihsa tungah a sepzia ding a thak kibehlap cihna ahih manin.

Tua banga nasepna ah sepzia khangkhanna ding hilo, mimal lunglutna leh theihna behlapna dingin zong degree sangzaw bel hoih peuhmah hi. Gam khangtote ah mimal theihna leh muhna a behlap dingin degree tuamtuam sin kawikawi uh a, pilna tampi behlap den uh hi. Ahi zongin a nekzonna uh leh a nasepna uh nawngkaisak lo uh hi.

Adang bang omlai? Degree sangzaw ahih kei leh adang bang omlai? Mite huh (volunteer), nasep kisinna tawh nasep huh (attachment), nasep dang theihnopna tawh nasep dang kisin (job rotation), theihna hang limlim tawh kisintawm (getting mentor or coach or joining professional organization), cihte in mihing khat pilna leh theihna, khuahekdan, thumuhdan behlap mahmah hi. [Hih bel themkhat sum neihzek, hun neihzek, hanciam zawh diak kisam hi. A mun leh a hun tawh zong kisai hi; gam haute in hihzo zaw deuh hi.] Tua bang ahihzote lah a nuntak nuamin, a nuntak manpha diak hi.

Nasep laih kawikawi nuamte adingin lawm leh gual hauh ding, kitheihpih ulian hauh ding, kituahkhopna tuamtuam - khoppi, seminar, talks, events, etc. cihte ah kitamhel mahmah ding, a kul leh mite zong huh ding, sum leh thatang tawh zong panpih ngam mai ding ahi hi. Banghang hiam cih leh a kigenkhialo nasep tuamtuam tua mite tung pan na theih hong om ding a, tua mun ah nang hong kiguang thei ding hi.

A tawpna ah, degree sang na deihman bek, na lawmte in sin tah cihman bek in amaute eng in sin kei in. Nasep gina khat nei masa inla, tua ciangin na lunglut leh zomkikzaw in. Na lunglut taktak ahih leh zom bek inla, sum tam lametna leh min deihna bek tawh zomkha kei in. Banghang hiam cih leh graduate na hih khit ciangin 'mi picing khat' in hong kingaihsun a, 'mihing khat' septheih khempeuh a 'sem theita' in hong kisim hi (kum 25 na phakkhit nak leh!).


Hau Za Cin