India gam Loksabha ah Lokpal Bill ki Pass ta

Aki gelhni: Saturday, 31 December 2011

Agelh: Pau Tun Thang

Bangzahvei kisim: 21

Share

0 Comments

Aki gengen Lokpal Bill pen a deihlo pawlkhat om kawmkalah Lok Sabha in pass ta hi. Ahizongin India gam danpi ah kikoih to zo nai lo suak hi. Neekguk do pawl member 9 omna Lok Pal din di tungtang pen Parliament kikhawpna ah nai 11 sung genkhawm uh hi.Member te in amau’ ngaihsutna ciat gen khia uh hi.Tua khit ciangin vote kila in tua hunah member 273 bek cian lai uh hi.Hih tawh kisai thugen sungin opposition member pawlkhat na nuakciah man mawk uh hi.Tua banah Congress lam zong member 12 om lo uh hi.Tuamanin kumpi thunei te lungkim hetlo uh hi. Hi dan picing saka gam danpi a suah zawh nadinga kigeel Constitutional Amendment Bill ah kithumin zo lo uh ahih manin Congress makai ten hih vote khia lo MP 12 te kigencian sak ding uh hi.Hih Bill tawh kisaia vote lak na ah UPA MLA16 kihel lo uh hi.Tuate laka Congress MP 6 te pen Gujarat State pan ahi uh hi.Hi te laka khat Union Minister, Dinsha Patel bel a tunu in pasal a neih mana session a kihel man lo suak hi. DMK MP 3 leh Trinamool Congress MP 2 zong om thei lo uh hi. Pi Sonia Gandhi in makai nih Girija Vyas leh Sandeep Dikshit te MP om lo te min leh a omlohna hang uh a kianga theisak ding in hilh hi.Constitutional Amendment Bill a paisuak zawhloh tawh kisai gen neuh neuh tam peuhmah. PM, Manmohan Singh bangin pawi sa peuhmah hi,hih a deihlo pawl lian pen BJP pen mipi ten omdan kilawm a hilh hun uh om kha ding hi ci vial hi.

BJPmakai, Yashwant Sinha leu leu in bel ama’ mi leh sate nangawn in panpih lo aihciang PM, Manmohan Singh pen makai tak zong hi nawn lo hi ciin kumpi thak bawl huai ta hi ci lai hi. Congress President, Sonia Gandhi in, Lokpal Bill tungtangah BJP te gial hong kidawk3mah mah hi ci hi.Hih dan a etkaai Parliamentary Standing Committee te’ tutkhawmna ah BJP tangmi ten zong Lokpal Bill pen gamdanpi a koih ding thukim uh hi.Ahizongin parliamentah a lungsim uh khelkik themthum uh hi ci.Lokpal Bill Lok Sabha in a thukimpih khit ciang December 28 nitak lamin Rajya Sabha ah kigenkhawm kik hi.

Minister of State for Parliamentary Affairs, Rajiv Shukla in hih Bill vaihawmna niamzaw(Lok Sabha) ah ki thukimpih khin ahihmanin a Rajya Sabha bangah lang lam ten zong thukimpih thei le uh hoihsa hi.Hih tawh kisai vote lak ahih ciang Congress member te bang House ah omkim thei le uh deihhuai sa hi. UPA lam panpih Trinamool Congress-a Rajya Sabha member 6-te December 28 ni zingsangin kimu khawm uh hi.Lokpal Bill tungtang genkhawm uh a,hih bill pen thukim pih ding maw thukimpih lo ding cih theih siam haksa uh hi.State thuneihna a khenthang thei ding lamsang ahih leh bel thukim het lo ding uh hi.

Lokpal Bill Pass ding deiha Mumbaia ann tang Anna Hazare zong a cidamna hoih nawn lo ahihmanin a siavuan Dr Ashwin Mehta-in ann tang nawnlo dingin ngen hi.Ann a tan tei tei lai leh a kal(kidney) hoihlo semsem ding ci hi. Amah a zui te banah bakah Maharashtra CM, Prithviraj Chavan in zong ann a ngawl nawn loh nadingin thuum uh hi.Tua manin MMRDA ground a mipi maiah ann tang nawn lo ding cih gen ta hi.Lokpal zong Lok Sabha ah ki thukimpih ta ahihmanin Lokpal Bill a deihte ngetna mangin ann ne ta ding hi.Maikuma State 5 Assembly kiteel nangah Anna Hazare in Congress langpangin campaign sawm hi.

Anna Hazare ann ngawlna munah amah a thapia om den mah leh ngaihsut zah in tamlo hi.A ann ngawl tawh kitawna amah support te kikhawpna dinga kigeel Delhi-a Ramlila Maidan bangah mi 30,000 tattheihna ah mi 200 khawng bek va pai uh hi. Team Anna member, Prashant Bhushan in bel phalbi khawvawh lai ahih manin mi a tawm hi ci sam.Mumbai ah zong a ann ngawlna munah sunma lam mi tam pai khawl lo hi ei.Nitak lam bel lasiam te pai ding kici ahihmanin mi 7000 phial paikhawm kici.

N.Pau Tun Thang
http://www.zogamaksi.net